Kon Pa Mehorá Bo Sirbishi​—Siña Kon pa Skirbi Karta

DIKON ESAKI TA IMPORTANTE: E buki di 1 Korintionan ta un di e 14 kartanan ku apòstel Pablo a skirbi pa animá su rumannan kristian. Ora un persona ta skirbi karta, e tin tempu pa skohe su palabranan bon, i e persona ku ta lesa e karta akí por les’é vários biaha. Skirbimentu di karta ta un bon manera pa duna testimonio na nos famia i konosínan. Ademas, skirbimentu di karta ta un manera efikas pa duna testimonio na hende ku nos no ta haña oportunidat di topa personalmente. Por ehèmpel, tin hende ta mustra interes, pero ta difísil pa haña nan na kas. Kisas ta difísil pa haña algun hende den nos teritorio pasobra nan ta biba den edifisio di apartamento ku tin hopi siguridat, den zona residensial será pa públiko òf den área isolá. Kiko nos tin ku tene kuenta kuné ora nos ta skirbi karta, spesialmente na hende ku nos no konosé?

KON PA HASI ESAKI:

• 

  Skirbi loke lo bo tabatin gana di bisa e persona si bo a top’é personalmente. Na kuminsamentu di e karta, laga e persona sa ken bo ta i dikon bo ta skirbi un karta p’e. Bo por hasi e persona un pregunta pa e pensa riba dje i bis’é ku e por haña mas informashon riba nos website. Despues, splik’é kon un kurso di Beibel ta bai i bis’é ku e por haña e kurso akí grátis na kas. Ademas, bo por menshoná tema di algun kapítulo di un publikashon di estudio. Si bo ta deseá, bo por pone un karchi di kontakto, un invitashon òf un tratado huntu ku e karta

• Sea breve. Si bo karta ta muchu largu, kisas e persona lo no les’é kompleto.—Wak ehèmpel di un karta

• Kontrolá e karta pa wak si tin fout den dje; wak si e ta representabel i fásil pa lesa. Kòrda ku e karta mester ta skirbí ku takto i e mester tin un tono agradabel i positivo. Si mester pone stampia, hasi sigur di pone sufisiente