Komunikashon via Karta

KARTA a yega di drecha bida i komportashon di miónes di hende. Originalmente, mayoria buki di e Skritura Griego Kristian tabata karta. Nos awe por skirbi karta pa animá kreyentenan nobo, mantené kontakto ku amigunan, enkurashá rumannan ku a aseptá un responsabilidat spesial, fortalesé esnan ku ta konfrontá difikultat i transmití informashon nesesario pa atendé aktividatnan di kongregashon.—1 Tes. 1:1-7; 5:27; 2 Ped. 3:1, 2.

Ademas, karta ta un medio efikas pa duna testimonio. Tin kaminda ku hopi hende ta biba den edifisionan di apartamento ku medidanan estrikto di siguridat òf den áreanan restringí unda nos no por prediká libremente. Tin hende ku kasi nunka ta na kas, pues nos no ta topa nan ora nos ta prediká di kas pa kas. Otronan ta biba den lugánan hopi aislá, inkluso den prizon.

Malesa, mal wer òf toke de keda tin biaha por obligá bo keda kas. Lo bo por skirbi un karta pa sigui duna testimonio na un famia òf un persona ku bo a kòmbersá kuné den un manera informal? Un di bo studiantenan di Beibel a muda? Podisé un karta di bo ta nèt loke e mester pa mantené su interes spiritual bibu. Òf kisas bo por kompartí informashon bíbliko oportuno ku hende ku resientemente a kasa, a haña yu òf a pèrdè un ser kerí.

Predikashon via Karta

E promé kos ku bo tin ku hasi ora bo ta skirbi un hende ku nunka bo a yega di topa ta, introdusí bo mes. Lo bo por splika ku bo ta partisipando den un obra internashonal di karakter boluntario. Si bo ta kere ta apropiá, menshoná ku bo ta un Testigu di Yehova i laga e persona sa dikon bo ta skirbiendo un karta en bes di hasi un bishita personal. Skirbi komo si fuera bo ta papiando kara-kara ku e persona. No opstante, di akuerdo ku e instrukshon pa “sea kouteloso manera kolebra i inosente manera palomba,” wak bon ki informashon personal bo ta divulgá di bo mes.—Mat. 10:16.

Skirbi den bo karta loke lo bo a bisa e persona si bo por a bishit’é. Talbes bo por adaptá un introdukshon for di e foyeto chikí Con pa Cuminsá i Continuá Consideracionnan Bíblico (òf for di e buki Rasonamentu) òf usa un presentashon bíbliko for di un edishon resien di Nos Ministerio di Reino. Lo bo por hasi un pregunta i animá e persona pa pensa riba dje. Algun publikadó ta splika simplemente ku nos tin un programa grátis di kontestá preguntanan bíbliko, anto nan ta menshoná e títulonan di algun kapítulo di un di nos publikashonnan ku nos ta usa pa studio. Na página 73 tin un ehèmpel di un karta pa duna testimonio. E por duna bo algun idea, pero ta bon pa varia e kontenido, sino ku tempu hende por haña e mesun mensahe bes tras bes.

Tin hende no ta gusta lesa karta largu di personanan deskonosí. Pues lo ta sabí pa tene bo karta kòrtiku. Terminá bo karta promé ku e persona kansa di les’é. Lo ta bon pa inkluí un papel di invitashon pa asistí na e reunionnan na Salòn di Reino. Òf lo bo por agregá un tratado, un foyeto òf un edishon di E Toren di Vigilansia òf Spièrta! i splika e persona ku e por haña nan riba un base regular si e ta deseá esei. Tambe lo bo por puntr’é si bo tin mag di bishit’é na kas pa sigui papia riba e tema ku bo a trata.

Algun Palabra Tokante e Presentashon

Tira un bista awor riba e karta modelo. Tuma nota di lo siguiente: (1) E karta ta bon organisá, sin muchu kos riba otro. (2) Asta si e persona na kua e karta ta dirigí pèrdè e ènvelòp, lo e tin e nòmber i adrès di esun ku a mand’é. (3) E propósito di e karta ta pará skirbí den e promé paragraf na un manera simpel i direkto. (4) Kada idea prinsipal ta ser tratá den un alinia òf paragraf separá. (5) Teniendo kuenta ku e propósito di e karta, e no ta muchu familiar ni muchu serio.

Den un karta di karakter mas formal, manera un karta ku e sekretario di kongregashon ta manda pa sukursal, mester inkluí e nòmber di e kongregashon i e nòmber i adrès di e sekretario i e fecha. Tambe mester tin e nòmber i adrès di e persona òf organisashon na ken e karta ta dirigí, siguí pa un saludo apropiá. Den algun idioma, e karta ta terminá ku un ekspreshon manera “Atentamente,” anto bou di dje ta pone firma. E firma semper mester ta skirbí na man.

Den tur karta, sòru usa bon ortografia, gramátika, puntuashon i, mas ku klaru, wak pa e ta nèchi. Tur e kosnan ei lo duna dignidat na bo karta i na e mensahe ku e ta kontené.

Pafó riba e ènvelòp, semper pone e adrès di remitente (afzender), preferiblemente bo propio adrès. Si bo ta haña ku no ta prudente pa pone bo mes adrès ora di prediká via karta na hende deskonosí, puntra e ansianonan si bo tin mag di usa e adrès di Salòn di Reino komo remitente. Nunka no pone e adrès di sukursal komo remitente, ya ku esei lo duna e impreshon robes ku ta sukursal a manda e kartanan. Si bo no pone adrès di remitente i tòg inkluí nos publikashonnan huntu ku e karta, esaki tambe lo por duna e impreshon robes ku ta sukursal ta esun ku a mand’é.

Hasi sigur ku bo a pone sufisiente stampia, foral si bo inkluí publikashon. Si e montante di stampia no ta sufisiente, nan por kobra e persona ku haña e karta e suma ku falta, i esaki lo rebahá bo mensahe. Kòrda ku den hopi pais ora bo inkluí un foyeto òf revista, e tarifa postal ta mas ku loke bo ta paga pa un karta so.

E Tono Adekuá

Unabes bo a kaba e karta, les’é pa evaluá e kontenido. Kon e ta zona? E ta amigabel i respetuoso? Amor i bondat ta algun di e kualidatnan ku nos ta hasi esfuerso pa desplegá den nos trato ku otro hende. (Gal. 5:22, 23) Si bo detektá un tono negativo òf un indikashon di pesimismo, kambia e palabranan.

Un karta por bai kaminda abo no por yega, i e echo aki ta hasié un instrumento balioso pa sirbishi di vèlt. Ya ku bo karta ta representá abo i bo norma- i balornan, analisá su kontenido, su presentashon i e tono ku e tin. Podisé e karta ta perkurá nèt lo nesesario pa yuda un alma presioso kuminsá kana riba e kaminda ku ta hiba na bida, òf haña e fortalesa òf animashon pa sigui den dje.