Kaha di Pregunta

◼ Dikon nos mester ta kouteloso ora nos ta duna testimonio via karta?

Duna testimonio via karta ta un manera efektivo di kompartí e bon nobo, i esei a keda probá atraves di tempu. Sin embargo, akontesimentunan resien den mundu a pone ku hende ta tene masha kuidou pa habri pòst deskonosí. Hopi bes hende ta deskonfiá di ènvelòpnan for di un fuente deskonosí òf sin adrès di remitente, foral si e ènvelòpnan ta hopi diki i skirbí na man. Doñonan di kas kisas ta benta tipo di pòst asina afó sin sikiera habrié. Kon nos por evitá ku esaki ta sosodé?

Si ta posibel, nos mester taip tantu e karta komo e ènvelòp. E ènvelòp mester ta dirigí na e doño di kas usando su nòmber. No skirbi riba dje “Pa Habitante.” Ademas, semper pone e adrès di remitente. Si no ta konsehabel pa usa bo adrès personal, pone bo nòmber i adrès di Salon di Reino. No manda karta anónimo, sin pone bo nòmber i un adrès. Nunka usa e adrès di ofisina di sukursal.—Wak e Kaha di Pregunta di Nos Ministerio di Reino di novèmber 1996.

Bo por haña mas sugerensia i ehèmpel di un karta den e buki (na spañó) Benefisiá di e Edukashon dje Skol di Ministerio Teokrátiko, página 71-3. E puntonan aki lo yuda nos usa karta na un manera efektivo pa alkansá otro hende ku e bon nobo.