Pregunta di Lektor

Ken ta “e angelnan skohí” ku 1 Timoteo 5:21 ta menshoná?

Apòstel Pablo a skirbi Timoteo ku tambe tabata un ansiano: “Mi ta ordená bo solemnemente dilanti di Dios, Kristu Hesus i e angelnan skohí: Kumpli ku e instrukshonnan akí sin prehuisio i sin hasi distinshon di persona.”—1 Tim. 5:21.

Pa kuminsá, laga nos wak ken sigur e angelnan skohí ei no ta. Nan no ta e 144.000. Dikon? Pasobra tempu ku Pablo a skirbi Timoteo, no tabatin niun ungí den shelu. Pues, ni e apòstelnan ni e otro rumannan ungí no por tabata “e angelnan skohí.”—1 Kor. 15:50-54; 1 Tes. 4:13-17; 1 Huan 3:2.

Anto “e angelnan skohí” no por ta e angelnan ku tabata desobediente durante e tempu di Diluvio tampoko. Pasobra e angelnan ei a skohe pa uni ku Satanas i a bira demoño. Nan ta enemigu di Hesus. (Gén. 6:2; Luk. 8:30, 31; 2 Ped. 2:4) Den futuro, Hesus lo sera nan den abismo pa 1.000 aña i despues destruí nan huntu ku Satanas.—Hudas 6; Rev. 20:1-3, 10.

Pues, “e angelnan skohí” mester ta e angelnan den shelu ku ta leal na ‘Dios i Kristu Hesus.’

Tin míles i míles di angel ku a keda leal. (Heb. 12:22, 23) Parse ku no ta tur tin e mesun trabou. (Rev. 14:17, 18) Kòrda ku ta un angel so a haña e asignashon pa mata 185.000 sòldá asirio. (2 Rei. 19:35) Pero, kisas vários angel tin e asignashon di “separá for di [Hesus] su reino tur esnan ku ta pone hende trompeká i esnan ku ta kometé maldat.” (Mat. 13:39-41) Kisas ta otro angel lo “reuní su skohínan” pa bai shelu. (Mat. 24:31) I tambe tin otro ku ta ‘protehá nos unda ku nos bai.’—Sal. 91:11; Mat. 18:10; kompará ku Mateo 4:11 i Lukas 22:43.

Un angel ta guia un pareha den sirbishi na un kas. Un mener den e kas ta hasi orashon.

Pues, probablemente, “e angelnan skohí” ku 1 Timoteo 5:21 ta menshoná tin e asignashon pa yuda kuida e kongregashon. Ora nos analisá loke Pablo a skirbi, nos ta mira ku e tabata duna konseho na e ansianonan, kendenan tabata meresé rèspèt di e kongregashon. El a bisa ku e ansianonan mester a hasi nan trabou “sin hasi distinshon di persona” i no mester tuma desishon sin pensa. Anto el a splika ku e motibu prinsipal pakiko nan mester a hasi esei ta pasobra “Dios, Kristu Hesus i e angelnan skohí” ta opservá kon ansianonan ta trata e kongregashon. Ta klaru anto ku asignashon di algun angel ta pa yuda kuida e kongregashon. Esei ta enserá por ehèmpel, protehá Dios su sirbidónan, yuda nan ku e trabou di prediká i raportá na Yehova.—Mat. 18:10; Rev. 14:6.