SIGUI VIGILÁ!
Dikon Polítika Ta Dividí Hende?—Kiko Beibel Ta Bisa?
Rònt mundu, hende ta mas dividí ku nunka debí na polítika. Un enkuesta ku Pew Research Center a hasi den 19 pais na 2022 ta mustra ku 65% di e hendenan adulto ku a partisipá na e enkuesta ta bisa ku, den nan pais, e hendenan ku ta apoyá diferente partido polítiko no ta di akuerdo ku otro riba kasi niun tereno.
Kaminda bo ta biba tambe mas i mas hende ta dividí riba tereno polítiko? Dikon esei ta e kaso? Tin solushon? Laga nos wak kiko Beibel ta bisa.
Aktitut ku ta kousa divishon
Beibel a profetisá ku den nos tempu, esta, den “e último dianan,” hopi hende lo tin un aktitut ku ta pone ku ta imposibel pa hende ta uní.
“Den e último dianan lo bini tempunan krítiko, difísil pa trata kuné. Pasobra hende lo stima nan mes; . . . nan lo no ta dispuesto pa sera ningun akuerdo.”—2 Timoteo 3:1-3.
Hopi gobièrnu tin difikultat pa funshoná bon apesar di e esfuersonan ku hopi hende ta hasi. Hende ku punto di bista kompletamente diferente ta haña ku ta difísil, òf imposibel, pa traha huntu pa resolvé problema. Loke mundu ta eksperensiá ta konfirmá loke Beibel a bisa hopi tempu pasá.
“Hende ta dominá hende, i esei ta kousa sufrimentu.”—Eklesiástes 8:9.
Sinembargo, Beibel ta mustra kiko ta e solushon: un gobièrnu dirigí pa un persona ku por eliminá tur problema ku mundu ta konfrontá awe.
Un lider kualifiká ku ta stima hende
Beibel ta papia di un solo lider ku ta kualifiká: Hesukristu. Hesus tin poder, outoridat i deseo pa uni hende i pa trese pas.
“Durante su reinado, hende hustu lo ta manera mata ku ta sprùit di nobo, i lo tin pas tur kaminda.”—Salmo 72:7.
“Tur nashon lo sirbié.”—Salmo 72:11.
Hesus ta un lider ideal pasobra e ta stima hende, i e ke yuda hende, spesialmente hende ku ta ser tratá inhustamente.
“Lo e libra hende pober ku ta sklama pa yudansa; lo e libra hende oprimí i hende ku no tin niun persona pa yuda nan. Lo e tene kompashon ku hende oprimí i ku hende pober, i lo e salba bida di hende pober. Lo e libra nan for di opreshon i violensia.”—Salmo 72:12-14.
Siña mas tokante e Reino di Dios, esta, e gobièrnu den shelu ku Hesus na kabes. Haña sa ki benefisio e Reino ei ta trese pa bo i kon bo por apoyá e Reino ei.
Wak e vidio Kiko e Reino di Dios Ta?
Lesa e artíkulo “E Reino di Dios—Un Gobièrnu sin Korupshon.”