Siguridat di Hende Muhé​—Kiko Beibel ta bisa?

“Na mucha, tur dia mi ruman hòmber tabata abusá di mi físikamente i verbalmente. I ora mi a kasa, mi suegra a sigui ku e abusu. E huntu ku mi suegro tabata trata mi manera un katibu. Mi tabata pensa di mata mi kurpa.”—Madhu,a India.

Organisashon Mundial di Salú a bisa ku: “Violensia kontra hende muhé ta algu ku ta pasa rònt mundu.” Nan a kalkulá ku kasi ún di kada tres hende muhé, na dado momento den nan bida, ta bira víktima di abusu físiko òf seksual.

Si algu asina a pasa ku bo, kisas bo por sinti ku unda ku bo bai bo ta kore peliger di ku un hende ta bai abusá di bo verbalmente, físikamente òf seksualmente. Mirando ku tin tantu violensia kontra hende muhé, kisas bo ta pensa ku ‘hende muhé no ta bal nada.’ Pero ta asina Dios ta pensa?

Kiko Dios ta pensa di hende muhé?

Teksto di Beibel: “El [Dios] a krea nan hòmber i muhé.”—Génesis 1:27.

Nifikashon: Dios a traha tantu hende hòmber komo hende muhé. Pa Dios, tur dos meresé rèspèt. Ademas, e ta ferwagt pa un esposo “stima su esposa manera e ta stima su mes.” Dios no ke pa un esposo purba di dominá su kasá, anto sigur no ku insulto òf violensia. (Efesionan 5:33; Kolosensenan 3:19) Ta bisto ku siguridat di hende muhé ta importante pa Dios.

“Na mucha, tabatin hende den mi famia ku a abusá di mi seksualmente. Ora mi tabatin 17 aña, mi doño di trabou a menasá di kita mi fo’i trabou si mi no drumi kuné. Anto ora m’a bira mas grandi, mi kasá, mi mayornan i mi bisiñanan tabata humiá mi. Pero ku tempu, m’a siña konosé Yehova,b e Kreador. E ta respetá hende muhé. Esei ta sigurá mi ku e ta stima mi i ku mi ta balioso p’e.”—Maria, Argentina.

Kiko por yuda bo kuminsá dil ku bo trouma?

Teksto di Beibel: “Tin amigu ku ta stima bo mas ku un ruman.”—Proverbionan 18:24.

Nifikashon: Un berdadero amigu òf amiga lo ta un bon apoyo pa bo. Si ta posibel, konta un hende asina loke bo ta sinti.

“Pa 20 aña largu mi no a bisa niun hende ku mi tabata víktima di abusu seksual. Esei a pone ku mi tabata hopi infelis i mi tabatin ansiedat i depreshon. Por fin m’a logra konta un hende ku kier a skucha tokante kiko a pasa ku mi. Ora m’a hasi esei, m’a sinti un gran alivio.”—Elif, Turkia.

Teksto di Beibel: “Tira tur boso inkietut riba [Dios], pasobra e ta interesá den boso.”—1 Pedro 5:7.

Nifikashon: Ora bo hasi orashon, Dios ta ègt skucha bo. (Salmo 55:22; 65:2) Dios stima bo masha hopi mes, p’esei e por yuda bo mira kon balioso bo ta.

“E echo ku mi a siña tokante Yehova a yuda mi kuminsá kura e heridanan emoshonal ku otro hende a kousa mi. Awor mi por hasi orashon i konta Dios tur kos. E ta un amigu ku ègt ta komprondé kon mi ta sinti.”—Ana, Belize.

Dios lo kaba un dia ku abusu di hende muhé?

Teksto di Beibel: ‘Yehova . . . lo sòru pa huérfano i hende oprimí haña hustisia,pa hende no pone nan haña miedu mas.’—Salmo 10:​17, 18.

Nifikashon: Pronto Dios lo kaba ku tur inhustisia. Esei ta inkluí krueldat i violensia kontra hende muhé.

“Ora ku m’a haña sa ku Yehova pronto lo kaba ku abusu kontra hende muhé i mucha muhé, esei tabata manera un remedi pa mi heridanan. Esei a duna mi un gran alivio.”—Roberta, México.

Bo ke siña tokante e speransa ku Beibel ta duna, dikon bo por konfia den su promesanan i kon Testigunan di Yehova por duna bo yudansa for di Beibel? E ora ei, pidi un bishita.

Download e artíkulo akí si bo ke prent e.