Beibel Por Yuda Hende ku Tin Malesa Króniko?

E kontesta ku Beibel ta duna

Sí. Dios ta interesá den su sirbidónan ku ta malu. Por ehèmpel, Beibel ta bisa di un fiel sirbidó di Dios: “SEÑOR lo sosten’é riba su kama di malesa.” (Salmo 41:3, Beibel Santu) Si bo ta un hende ku ta sufri di malesa króniko, e siguiente tres kosnan por yuda bo trata ku e situashon:

1. Pidi Dios forsa pa soportá. Bo por haña “e pas di Dios ku ta surpasá tur komprondementu” ku por yuda bo sigui padilanti apesar di bo kondishon.—Filipensenan 4:6, 7.

2. Sea positivo. Beibel ta bisa: “Un kurason kontentu ta un bon remedi, ma un spiritu abatí ta seka wesu.” (Proverbionan 17:22, Beibel Santu) Si bo tin un bon humor, esei por yuda bo pasa dor di tempunan difísil i e por kontribuí na un bon salú.

3. Fortalesé bo speransa pa futuro. Bo speransa sólido den Dios su promesanan pa futuro por yuda bo keda positivo, apesar di bo lucha ku malesa króniko. (Romanonan 12:12) Beibel ta profetisá ku lo yega e dia ku “ningun habitante lo no bisa: ‘Mi ta malu.’” (Isaías 33:24, Beibel Santu) Dios lo kura hende di malesa króniko pa kua siensia moderno no tin kura. Por ehèmpel, Beibel ta bisa ku hende di edat avansá lo bolbe bira yòn i salú: “Laga su karni bira mas suave ku esun di mucha, lag’é bolbe na e dianan di vigor di su hubentut.”—Yòb 33:25, Beibel Santu.

Nota: Aunke nos komo Testigunan di Yehova tin e konfiansa ku Dios ta yuda nos, nos ta buska tambe tratamentu médiko pa malesa króniko. (Marko 2:17) Pero, nos no ta rekomendá ningun tratamentu médiko en partikular. Ta keda na kada ken pa tuma su mes desishon ora ta trata asuntu di salú.