Kiko Beibel Ta Bisa Tokante Boluntat Liber? Ta Dios Ta Determiná Bo Destino?
E kontesta ku Beibel ta duna
Dios a duna nos un boluntat liber, esta, e kapasidat pa tuma nos mes desishonnan. No ta Dios ta kontrolá nos bida ni nos no ta mará na un destino. Laga nos wak kiko Beibel ta bisa riba e punto akí.
Dios a krea hende den su imágen. (Génesis 1:26) Distinto for di bestia ku ta djis bai tras di nan instinto, nos tin e kapasidat di reflehá e kualidatnan di nos Kreador, manera amor i hustisia. I meskos ku nos Kreador, nos tin un boluntat liber.
Básikamente, ta nos mes ta disidí nos futuro. Beibel ta animá nos pa “skohe bida . . . dor di obedesé [Dios] su bos,” esta, skohe pa obedesé su mandamentunan. (Deuteronomio 30:19, 20, Beibel Santu) E opshon akí lo no tabatin sentido i lo tabata asta kruel si nos no tabatin un boluntat liber. En bes di fòrsa nos pa hasi loke e ke, Dios ta animá nos di kurason: “Mara bo a pone atenshon na mi mandamentunan! E ora ei bo pas lo tabata manera un riu.”—Isaías 48:18, Beibel Santu.
Nos éksito òf frakaso no ta mará na destino. Kiko ku bo ke logra den bida, bo tin ku traha pa alkans’é. Beibel ta bisa: “Tur loke bo man haña pa hasi, hasié ku tur bo forsa.” (Eklesiástes 9:10, Beibel Santu) E ta bisa tambe: “E plannan di hende balente siguramente ta kondusí na abundansia.”—Proverbionan 21:5, Beibel Santu.
Boluntat liber ta un regalo presioso di Dios, pasobra esei ta permití nos stim’é ku “henter [nos] kurason,” no pasobra nos ta sinti nos fòrsá, sino pasobra ta nos mes ke.—Mateo 22:37.
No ta Dios ta kontrolá tur kos?
Beibel ta siña nos ku Dios ta Todopoderoso, esta, ku su poder no tin límite. (Yòb 37:23; Isaías 40:26) Sinembargo, e no ta usa su poder pa kontrolá tur kos. Por ehèmpel, Beibel ta bisa ku Dios a “dominá [su] mes” i no a tuma medida mesora kontra Babilonia di antigwedat, un nashon enemigu di su pueblo. (Isaías 42:14, Beibel Santu) Di igual manera, pa un tempu Dios ta opta pa tolerá hende ku ta hasi mal uso di nan boluntat liber pa hasi daño na otronan. Pero lo e no hasi esei pa semper.—Salmo 37:10, 11.