Bo Ta Imitando Nos Dios Imparcial?

IMPARCIALIDAD—unda bo por hañ’é? Tin un Persona cu ta totalmente imparcial, liber di prehuicio, faboritismo i discriminacion. Esei ta Jehova Dios, e Creador di humanidad. Sin embargo, pa loke ta hende, e escritor ingles di siglo 19 Charles Lamb a skirbi francamente: “Mi ta, senciyamente bisá, un bulto di prehuicio—consistiendo di gustu i disgustu.”

Ora ta toca imparcialidad, relacionnan humano ta laga hopi di deseá. Hopi siglo pasá Rey sabí Sálomon di Israel a remarcá cu “hende a dominá hende pa su mes perhuicio.” (Eclesiástes 8:9) Odio racial, conflictonan nacional i pleitu di famia ta sigui multiplicá. P’esei, ta realístico pa kere cu, riba su mes, hende por desaroyá un sociedad imparcial?

Esfuerso conciente ta necesario pa controlá nos actitud i libra nos mes di cualkier prehuicio cu rais profundo. (Efesionan 4:22-24) Sin realisá esei, nos por tin tendencia di poseé actitudnan cu a ser formá dor di nos ambiente social i educacional i cu a haña rais den nos antecedente familiar, racial i nacional. E inclinacionnan aparentemente leve aki hopi biaha tin rais profundo i ta promové actitudnan cu ta hiba na parcialidad. E hurista i editor escoses, Lord Francis Jeffrey, asta a admití: “No tin nada cu un homber por ta asina tantu tempu inconciente di dje, cu e grado i intensidad di su prehuicionan.”

Lenaa ta un persona cu ta admití cu esfuerso conciente ta necesario pa bringa e inclinacion pa ser parcial. E ta bisa cu pa sofocá sintimentunan di prehuicio den bo mes “ta exigí bastante esfuerso pasobra e manera cu bo a ser criá ta un influencia hopi fuerte mes.” Tambe Lena ta reconocé cu recordatorionan constante ta necesario.

Jehova Su Registro di Imparcialidad

Jehova ta un ehempel perfecto di imparcialidad. For dje promé páginanan di Bijbel, nos ta lesa con el a manifestá su imparcialidad den su trato cu hende. Nos por siña hopi for dje ehempelnan i recordatorionan excelente aki.

Jehova a mustra imparcialidad den maniobrá asuntunan di manera cu e apostel hudiu Pedro a proclamá e bon nobo na Cornelio i otro gentilnan na 36 E.C. N’e tempu ei Pedro a bisa: “Dios no ta parcial, sino den tur nacion e hende cu ta tem’é i ta obra husticia ta aceptabel p’e.”—Echonan 10:34, 35.

Den tur su trato cu e famia humano, Jehova consistentemente a demostrá su imparcialidad. Cristo Jesus a bisa di su Tata: “E ta haci su solo sali pa hende malbado i bon i ta haci awa yobe pa hende hustu i inhustu.” (Mateo 5:45) Elogiando Jehova mas aleu como un Dios imparcial, Pedro a declará: “E tin pacenshi cu boso pasobra e no ta deseá pa ningun ser destruí sino ta deseá pa tur alcansá repentimentu.”—2 Pedro 3:9.

Den tempu di Noe, ora “e maldad di hende tabata abundante riba tera i tur inclinacion dje pensamentunan di su curason tabata solamente malu tur ora,” Jehova a decretá e destruccion dje mundu ei di humanidad. (Génesis 6:5-7, 11, 12) Sin embargo, riba mandato di Dios i di un manera cu su contemporáneonan por a observá fácilmente, Noe a construí un arca. Miéntras e i su yu hombernan tabata construí e arca, Noe tabata tambe “un predicador di husticia.” (2 Pedro 2:5) Apesar di tabata sa dje mal inclinacion di curason dje generacion ei, di un forma imparcial Jehova a manda un mensahe cla pa nan. Dor di a laga Noe construí i predicá, el a duna nan chens di revelá kico nan tabatin den nan mente i curason. Nan tabatin tur oportunidad pa reaccioná, pero en bes di esei nan “no a haci caso te cu e diluvio a bini i a bari nan tur.”—Mateo 24:39.

Ki un ehempel excelente di Jehova su imparcialidad! Den e último dianan crítico aki, e ehempel aki ta impulsá e sirbidornan di Dios pa proclamá e bon nobo di Reino cu e mésun imparcialidad. Ademas, nan no ta hala atras di declará e dia di vengansa di Jehova. Den pleno bista público, nan ta presentá e mensahe di Jehova sin parcialidad pa tur hende tende.—Isaías 61:1, 2.

Jehova su promesanan n’e patriarcanan Abraham, Isaac i Jacob a haci cla cu e ta un Dios imparcial. Via nan liña specífico di famia lo bini Esun señalá pa medio di ken ‘tur nacion dje tera siguramente lo bendicioná nan mes.’ (Génesis 22:18; 26:4; 28:14) Cristo Jesus a resultá di ta Esun señalá ei. Pa medio di Jesus su morto i resureccion, Jehova a percurá e caminda di salbacion pa tur humanidad obediente. Sí, e beneficionan dje sacrificio di rescate di Cristo ta disponibel sin parcialidad.

Den e dianan di Moises, Jehova su imparcialidad a manifestá su mes den un manera masha interesante en coneccion cu e yu muhernan di Zelofehad. E cincu muhernan aki a enfrentá un dilema relacioná cu e herencia di nan tata den e Tera Primintí. Esaki tabata asina pasobra tabata custumber den Israel pa tera di herencia pasa di un homber pa su yu hombernan. Sin embargo, Zelofehad a muri sin laga un yu homber pa ricibí un herencia. P’esei e cincu yu muhernan di Zelofehad a trece nan peticion pa un trato imparcial dilanti Moises, bisando: “Pakico e nomber di nos tata mester ser kitá for di meimei di su famia pasobra e no tabatin yu homber? O duna nos un posesion meimei dje ruman hombernan di nos tata.” Jehova a scucha nan súplica i a instruí Moises: “Den caso cu un homber muri sin tin un yu homber, e ora ei boso tin cu laga su herencia pasa pa su yu muher.”—Númeronan 27:1-11.

Ki un precedente imparcial amoroso! Pa garantisá cu e herencia dje tribu no ta ser pasá pa un otro tribu ora e yu muhernan a casa, tabata necesario pa nan casa solamente den “e famia dje tribu di nan tatanan.”—Númeronan 36:5-12.

Mas comprendimentu penetrante den Jehova su imparcialidad ta ser mirá den e dianan dje hues i profeta Samuel. Jehova a comision’é pa ungi un rey nobo dje tribu di Huda den e famia di Jese e betlehemita. Pero Jese tabatin ocho yu homber. Ken lo a ser ungí como rey? Samuel a keda impresioná cu e estatura físico di Eliab. Sin embargo, Jehova no ta ser influenciá pa aparencia exterior. El a bisa Samuel: “No mira su aparencia i e haltura di su estatura . . . Pasobra no dje manera cu hende ta mira ta e manera cu Dios ta mira, pasobra e simpel hende ta mira loke ta parce na bista; pero en cuanto Jehova, e ta mira loke e curason ta.” David, e yu homber di mas yong di Jese, a ser scogé.—1 Samuel 16:1, 6-13.

Siñando for di Jehova Su Imparcialidad

Ancianonan cristian ta haci bon di imitá Jehova dor di mira e cualidadnan spiritual di un compañero creyente. Ta fácil pa husga un individuo segun nos propio normanan, permitiendo nos sintimentunan personal tapa nos huicio. Manera un anciano a expres’é, “Mi ta purba trata cu otronan den un manera cu ta agradá Jehova, no basá riba mi mes ideanan formá di antemano.” Ta ki beneficioso pa tur Jehova su sirbidornan usa su Palabra como nan norma!

E ehempelnan bíblico anterior ta yuda nos resistí sintimentu di prehuicio racial of nacionalista cu t’ei ainda den nos mente. Dor di imitá Jehova su imparcialidad, nos ta protehá e congregacion cristian for di prehuicio, discriminacion i faboritismo.

Apostel Pedro a siña cu “Dios no ta parcial.” (Echonan 10:34) Faboritismo ta un enemigu di imparcialidad i ta violá e principionan di amor i unidad. Jesus a haci un apelacion na hende pober, débil i humilde i el a haci nan carga leve. (Mateo 11:28-30) El a resaltá na contraste skerpi cu e lidernan religioso hudiu, cu a haci nan mes doño riba e pueblo, cargando nan cu un carga pisá di regla. (Lucas 11:45, 46) Haciendo esaki i mustrando faboritismo na hende ricu i prominente siguramente no tabata na armonia cu e siñansanan di Cristo.—Santiago 2:1-4, 9.

Awe, ancianonan cristian ta someté nan na Cristo su hefatura i ta trata henter Jehova su pueblo dedicá sin parcialidad. Segun cu nan ta ‘pastoreá e tou di Dios bou di nan cuido,’ nan ta abstené di mustra faboritismo basá riba posicion económico, diferencianan di personalidad of lasonan familiar. (1 Pedro 5:2) Dor di imitá e Dios imparcial i haci caso di su spiertamentu contra actonan di faboritismo, ancianonan cristian ta promové e spiritu di imparcialidad den e congregacion.

E congregacion cristian di Testigonan di Jehova ta un hermandad internacional. E ta un evidencia bibu cu un sociedad imparcial, liber di prehuicio por ta un realidad bou dje guia di Jesucristo. E Testigonan a “bisti e personalidad nobo cu a ser creá segun e boluntad di Dios den berdadero husticia i lealtad.” (Efesionan 4:24) Sí, nan ta siñando for dje ehempel perfecto dje Dios imparcial, Jehova, i tin e speransa di haña bida eterno den e mundu nobo liber di tur parcialidad.—2 Pedro 3:13.

[Nota]

[Plachi na página 26]

Apostel Pedro a siña cu Dios no ta parcial