“Abo Lo Por Ta un Bon Pionero!”
1. Kiko un ruman muhé a bisa tokante e trabou di pionero?
1 “Lo mi no por a haña un otro trabou ku ta duna mi asina tantu satisfakshon i ku ta asina rekompensador den sentido spiritual.” Esei ta loke Kathe B. Palm a bisa. Pa dékadanan el a hasi sakrifisio pa traha komo pionero na Chile, kaminda el a prediká di punta pa punta. Pensando riba e bida rekompensador di esnan ku ta den sirbishi di tempu kompletu, kisas un hende a yega di bisa bo: “Abo lo por ta un bon pionero!”
2. Splika dikon aktividatnan spiritual ta duna nos satisfakshon profundo.
2 Un Bida Ku Ta Duna Satisfakshon: Nos Ehèmpel, Hesus, tabata sintié ègt refreská ora el a hasi e boluntat di su Tata. (Juan 4:34) P’esei, ku sinseridat Hesus por a siña su siguidónan ku nan lo haña berdadero satisfakshon ora nan partisipá den aktividatnan relashoná ku adorashon di Yehova. Nos lo sinti nos satisfecho ora nos ta okupá ku obranan ku ta trese Yehova su aprobashon. Ademas, mas tempu, energia i rekurso nos usa pa yuda otro hende, mas felis nos lo ta.—Echo. 20:31, 35.
3. Ki goso nos por eksperensiá ora nos ta dediká mas tempu den sirbishi?
3 Mas tempu nos dediká na sirbishi, mas chèns nos lo tin di eksperensiá e goso di kuminsá i kondusí estudio di Beibel. I segun ku nos ta haña mas eksperensia i abilidat den sirbishi nos lo por deskubrí ku nos teritorio ta mas produktivo ku nos a pensa na promé instante, asta kaminda hopi doño di kas ta parse indiferente. Pioneronan por hasi bon uso di tur e edukashon ku nan haña na e Skol di Sirbishi di Pionero. Nan por asistí na e skol akí ora nan a traha pionero pa ún aña. (2 Tim. 2:15) Segun ku nos ta perseverá, ta posibel ku nos lo por planta simia di bèrdat ku despues lo produsí fruta.—Ekl. 11:6.
4. Kiko ta bon pa hóbennan ku ta kabando skol sekundario konsiderá?
4 Hóbennan: Miéntras boso ta kabando boso skol sekundario, boso a pensa seriamente riba boso futuro? Te ku awor, hùiswèrk ta loke a okupá un gran parti di bo skèdjel. Kon lo bo bai usa e tempu akí despues di graduashon? En bes di sigui tras di un karera, pakiko no hasi orashon i konsiderá e posibilidat di traha pionero regular? E eksperensia ku lo bo haña, esta, di prediká na hende di diferente antesedente, di vense opstákulonan personal, kultivá disiplina propio i e abilidat di siña hende, lo benefisiá bo pa restu di bo bida.
5. Kon tantu e mayornan komo e kongregashon por promové e spiritu di pionero?
5 Mayornan, boso ta animando boso yunan pa skohe sirbishi di tempu kompletu? Tantu boso palabranan komo boso bon ehèmpel por yuda nan pone interesnan di Reino na promé lugá. (Mat. 6:33) Ray, kende a kuminsá traha pionero ora el a terminá su skol sekundario, ta kòrda: “Mi mama semper tabata pensa ku e trabou di pionero ta e trabou ku ta duna mas tantu satisfakshon den bida.” Tur hende den kongregashon por promové e spiritu di pionero ku palabra i akshon. Jose, di Spaña, a bisa: “Mi kongregashon tabata konsiderá e trabou di pionero komo e mihó karera pa hóbennan. Nan komentarionan i apresio pa sirbishi di pionero i nan yudansa práktiko a hasié mas fásil pa mi kuminsá traha pionero.”
6. Kiko nos por hasi si aktualmente nos no tin gana di traha pionero?
6 Vense Opstákulo: Pero kiko si bo bisa, ‘Mi no tin gana di traha pionero’? Si esei ta e promé kos ku ta bini na bo mente, resa na Yehova tokante loke bo ta pensa i bis’é, ‘Mi no sa si e trabou di pionero ta pa mi, pero mi ta deseá di hasi loke ta agradá bo.’ (Sal. 62:8; Pro. 23:26) Anto despues buska su guia mediante su Palabra i organisashon. Hopi pionero regular a “purba” traha komo pionero ousiliar promé, i e goso ku nan a sinti a motivá nan pa hasi esfuerso pa drenta den sirbishi di tempu kompletu.—Sal. 34:8.
7. Si nos ta pensa ku nos no por logra traha 70 ora pa luna, kon nos lo por kita e duda ei?
7 Kiko si bo no ta sigur ku bo por logra traha 70 ora? Pakiko no papia ku pioneronan ku tin e mesun sirkunstansia ku bo? (Pro. 15:22) I despues traha diferente skèdjel riba papel. Kisas lo bo ripará ku ta hopi mas fásil ku bo a pensa pa kita tempu for di kosnan ku no ta importante i hasi bon uso di e tempu ei.—Efe. 5:15, 16.
8. Dikon nos mester evaluá nos sirkunstansia tempu tempu?
8 Evaluá Bo Sirkunstansia Atrobe: Hopi biaha sirkunstansia personal ta kambia. Ta bon pa bo evaluá bo sirkunstansia tempu tempu. Por ehèmpel, bo ta serka di baha ku penshon? Randy, kende a baha ku penshon trempan, a bisa: “E desishon akí a habri kaminda pa mi kuminsá traha pionero regular huntu ku mi esposa, i esaki a duna nos e oportunidat pa muda i sirbi kaminda tin mas nesesidat. Mi a haña masha hopi bendishon, pero e bendishon di mas grandi ta ku mi tin un konsenshi limpi.”
9. Kiko ta bon pa parehanan kasá konsiderá?
9 Despues di un eksaminashon kuidadoso, algun pareha a yega na e konklushon ku no ta nesesario pa nan tur dos traha henter dia. Ta mas ku klaru ku esaki kisas ta nifiká ku e famia mester simplifiká nan estilo di bida, pero e sakrifisio ta bale la pena. John, kende su esposa a kita for di trabou resientemente pa e por hasi mas den sirbishi, a bisa: “No tin nada mas mihó ku sa ku mi esposa ta okupá ku Yehova su sirbishi durante dia.”
10. Kiko ta konmové kristiannan pa pensa riba e trabou di pionero?
10 Un Muestra di Amor i Fe: Yehova a disidí ku e predikashon ta e trabou mas importante pa nos. Pronto e sistema bieu akí lo ser destruí, i solamente esnan ku invoká e nòmber di Yehova lo salba. (Rom. 10:13) Un kurason yen di amor i gratitut pa loke el a hasi pa nos lo motivá nos pa kumpli ku entusiasmo ku e trabou di prediká ku su Yu a manda nos hasi. (Mat. 28:19, 20; 1 Juan 5:3) Ademas, fe ku nos ta bibando den e último dianan lo konmové nos pa hasi tur loke nos por den sirbishi miéntras nos tin tempu ainda, en bes di hasi uso plenamente di e mundu.—1 Kor. 7:29-31.
11. Ora un hende bisa ku nos lo por ta un bon pionero, kon nos mester tum’é?
11 Traha pionero no ta simplemente un asuntu di traha mas ora den sirbishi; e ta un muestra di nos deboshon na Dios. Pues, si un hende bisa bo ku abo lo por ta un bon pionero, tum’é komo un kòmplimènt. I huntu ku orashon konsiderá e posibilidat di uni ku esnan ku ta partisipá den e aspekto di sirbishi akí ku ta duna satisfakshon.
[Komentario na página 4]
Mayornan, boso ta animando boso yunan pa skohe sirbishi di tempu kompletu?
[Komentario na página 5]
Yehova a disidí ku e predikashon ta e trabou mas importante pa nos.