Un Seri Nobo pa Kuminsá Estudio di Beibel

1. Kua seri nobo lo sali den E Toren di Vigilansia, i kon nos tin ku us’é?

¹ E luna akí lo sali un seri nobo den E Toren di Vigilansia pa yuda nos kuminsá estudio di Beibel. E seri ta titulá “Siña Konosé e Palabra di Dios.” Sin duda algun hende den teritorio lo disfrutá di lesa artíkulonan di e seri akí. Sinembargo, e idea ta pa nos trata nan ku e doño di kas.

2. Kiko ta algun detaye práktiko di e artíkulonan ei?

² Detayenan Práktiko: E título i suptemanan ta den forma di pregunta i nos lo por usa nan ora nos ta papia ku e doño di kas. E tekstonan klave ta ku lèter skùin i no ta sitá, ya asina e doño di kas por lesa nan dirèkt den Beibel. E paragrafnan ta kòrtiku, pues nos por trata nan ku e doño di kas pará na porta mes. Kada artíkulo ta referí na e buki Beibel Ta Siña pa yuda bo bai den e buki ei ora ta apropiá.

3. Ora nos ta traha di kas pa kas, kon nos por usa e seri nobo pa kuminsá estudio di Beibel na porta?

³ Kon pa Us’é: Ora bo ofresé e revistanan, lo bo por hasi e doño di kas un pregunta tokante e tópiko di e artíkulo ku por lanta su interes. Por ehèmpel, e edishon di febrüari ta siña hende konosé Dios mas mihó. Lo bo por puntr’é: “Bo ta kere ku realmente nos por haña sa kon Dios ta? [Permití e persona kontestá.] Mi tin algu interesante tokante e tópiko akí.” Hasi e promé pregunta, lesa e paragraf i buska e teksto klave. Bolbe hasi e pregunta, i pidi e doño di kas pa kontestá e pregunta. Trata e kantidat di informashon adekuá, usando e preguntanan den e sekuensia ku nan ta aparesé. Promé ku bo bai, hala atenshon na e siguiente pregunta i traha afsprak pa trat’é e siguiente biaha. Hasi esfuerso pa bai bèk pa trata un porshon di e artíkulo tur siman te ora bo a trata tur e preguntanan. Un otro opshon ta pa usa e método direkto i simplemente ofresé e doño di kas un estudio di Beibel. Kaba usa e artíkulo di e revista pa mustr’é kon nos ta studia Beibel ku hende.

4. Kon nos por usa e artíkulonan akí ora nos ta hasi rebishita?

⁴ Tambe bo por usa e seri nobo na un manera efektivo ora bo ta bishitá hende ku ta riba bo ruta di revista i ora bo ta hasi rebishita. Lo bo por djis bisa: “Tin un seri nobo den E Toren di Vigilansia. Laga mi mustra bo kon bo por benefisiá di dje.” Nos ta pidi den orashon pa e seri nobo akí yuda mas hende “yega na konosementu di e bèrdat.”​—⁠1 Tim. 2:⁠4.