Animá Uso di Beibel

NOS kier dirigí atenshon di tur hende na e Palabra di Dios, Beibel. E mensahe ku nos ta prediká ta basá riba e buki sagrado ei, i nos kier pa hende realisá ku loke nos ta bisa no ta bini di nos mes, sino di Dios. Hende mester haña konfiansa den Beibel.

Den Sirbishi di Vèlt. Ora bo ta preparando pa sirbishi di vèlt, semper skohe un òf mas teksto bíbliko pa lesa pa hende ku ta dispuesto na skucha. Maske bo tin pensá di hasi un presentashon kòrtiku pa ofresé literatura bíbliko, hopi bes ta bon pa lesa un teksto apropiá for di Beibel. E Palabra di Dios por motivá hende mansu manera karné mas lihé ku kualkier kos ku nos por bisa personalmente. Ora no ta posibel pa lesa dirèkt for di Beibel, bo por djis sita loke e ta bisa. Den promé siglo, no ta tur hende tabatin ròlnan di e Skritura. Sin embargo, Hesus i su apòstelnan a sita masha hopi for di nan. P’esei nos tambe mester hasi un esfuerso pa siña tekstonan bíbliko for di kabes, ya den kaso ku nos no por lesa nan direktamente for di Beibel al lo ménos nos por menshoná loke nan ta bisa.

Ora bo haña chèns di lesa for di Beibel, ten’é di tal manera ku e doño di kas por sigui bo lesamentu. Si e doño di kas por sigui bo den su mes Beibel, kisas su reakshon lo por ta asta mas faborabel.

Pero bo tin ku kòrda sí ku algun traduktor a tuma sierto libertat ku e Palabra di Dios di manera ku nan tradukshon no ta kuadra tur biaha ku loke e idiomanan original di Beibel ta bisa. Vários tradukshon moderno a kita e nòmber personal di Dios, i nan a skonde loke e teksto den e idioma original ta bisa tokante e kondishon di e mortonan i di Dios su propósito p’e tera. Pa bo por mustra un persona e kambionan ei ku nan a hasi, lo bo tin ku kompará e manera ku vários Beibel ta tradusí tekstonan klave òf konsultá tradukshonnan bieu den e mesun idioma. E buki Rasonamentu for di e Skritura tin diferente tema ku ta duna un komparashon di e manera ku vários vershon a tradusí ekspreshonnan klave di versíkulonan hopi usá. Ken ku ta stima e bèrdat lo ta gradisidu pa haña sa e echonan ei.

Na Reunionnan di Kongregashon. Mester animá tur presente na reunionnan di kongregashon pa usa nan Beibel. Esaki ta bon pa vários motibu: e ta yuda e ouditorio mantené su atenshon riba loke ta ser tratá, ademas loke e hendenan ta mira den Beibel ta reforsá e instrukshon ku nan ta tende di e oradó, i uso di Beibel ta graba den mente di hende resien interesá ku di bèrdat Beibel ta e base di nos kreensianan.

Ta dependé hopi di e animashon ku bo ta duna si bo ouditorio lo sigui bo lesamentu di tekstonan bíbliko den nan mes Beibel. Un di e mihó métodonan ta di invitá bo ouditorio direktamente pa buska e tekstonan.

Abo komo oradó tin ku disidí kua teksto bo kier enfatisá dor di laga e ouditorio busk’é. Ta mihó pa lesa e tekstonan ku lo yuda desaroyá bo puntonan prinsipal. Anto, si tempu ta permití, agregá un par di teksto mas pa apoyá bo argumentu.

Klaru ku por lo general no ta basta pa djis menshoná e tekstonan bíbliko òf invitá e ouditorio pa buska nan. Si bo ta pasa di un teksto pa otro sin duna e ouditorio sikiera un chèns pa haña esun promé, nan lo desanimá i lo stòp di sigui bo den nan Beibel. P’esei opservá bo ouditorio bon i lesa e versíkulonan ora ku mayoria hende a haña nan.

Pensa padilanti i menshoná bo tekstonan sufisiente tempu di antemano ya asina lo bo no pèrdè hopi tempu wardando riba e ouditorio pa haña e teksto. Ounke lo bo trata ménos informashon si bo duna e ouditorio tempu pa buska e tekstonan, e benefisionan lo ta bale la pena.