Instruktivo Pa Bo Ouditorio

PA BO presentashon por ta instruktivo pa bo ouditorio, bo tin ku hasi mas ku solamente papia riba un tema importante. Puntra bo mes: ‘Dikon e ouditorio aki tin ku skucha e informashon aki? Kiko lo mi por bisa pa laga e ouditorio sinti ku di bèrdat nan a benefisiá di e presentashon?’

Den e skol, ora bo parti ta di duna testimonio na un persona, ta bo doño di kas lo ta bo ouditorio. Den otro kasonan, kisas bo ta dirigí bo mes na henter e kongregashon.

Loke Bo Ouditorio Sa Kaba. Puntra bo mes kiko bo ouditorio sa kaba di e tema, pasobra esei lo determiná na unda bo ta kuminsá. Si bo ta dirigí bo mes na un kongregashon ku tin hopi kristian maduro, no djis ripití bèrdatnan básiko ku mayoria di nan sa kaba; mas bien, amplia riba nan. Klaru ku si tin hopi hende interesá tambe presente, bo tin ku tene kuenta ku e nesesidatnan di ámbos grupo.

Adaptá e ritmo di bo presentashon na loke bo ouditorio sa. Trata na un manera relativamente lihé e detayenan ku probablemente mayoria di nan konosé kaba, pero splika mas trankil e ideanan ku ta nobo pa kasi nan tur, ya asina nan por kapta esakinan klaramente.

Informashon Instruktivo. Pa un parti ta instruktivo no ta semper bo mester tin algu nobo di bisa. Algun oradó tin un manera asina simpel di bisa sierto bèrdatnan konosí, ku ta e ora ei numa hopi hende den ouditorio lo komprondé e bèrdatnan ei bon pa promé bes.

Den sirbishi di vèlt, si bo kier duna un ehèmpel ku nos ta bibando den e último dianan, no ta basta pa bo djis menshoná un suseso ku a sali den notisia. Usa Beibel pa mustra e nifikashon di e suseso. E ora ei bo mensahe lo ta realmente instruktivo pa e doño di kas. Asina tambe, ora bo ta menshoná un òf otro detaye di un lei di naturalesa òf di e mundu di bestia òf mata, bo meta no mester ta pa simplemente presentá un echo sientífiko fasinante ku nunka e doño di kas a yega di tende. Mas bien, bo meta mester ta pa kombiná evidensia di kosnan den naturalesa ku deklarashonnan bíbliko ku ta mustra ku tin un Kreadó ku ta stima nos. Esaki lo yuda e doño di kas mira e asuntu for di un perspektiva nobo.

No ta fásil pa papia ku un ouditorio riba un tema ku nan a tende hopi biaha kaba. Pero si bo kier ta un maestro efikas bo tin ku siña hasié bon. Kon?

Un faktor importante ta investigashon. En bes di inkluí den bo diskurso solamente ideanan ku ta bini na bo mente, usa e fuentenan di informashon menshoná na página 33 pa 38. Kòrda riba e sugerensianan duná einan relashoná ku e metanan ku bo mester tin. Durante bo investigashon kisas bo ta topa un dato históriko poko konosí ku ta direktamente relashoná ku bo tema, òf un par di deklarashon ku a sali resientemente den notisia i ku lo ilustrá e punto ku bo kier trata.

Segun ku bo ta analisá e informashon, stimulá bo mes kapasidat di pensa dor di hasi preguntanan manera kua?, ki?, kiko?, dikon?, na ki tempu?, ken? i kon? Por ehèmpel: Dikon esaki ta bèrdat? Kon mi por demostrá ku ta asina? Kua kreensianan popular ta stroba algun hende di komprondé e bèrdat bíbliko aki? Dikon e ta importante? Ki efekto esaki mester tin riba bida di hende? Ki ehèmpel ta demostrá e benefisio di pon’é na práktika? Kiko e bèrdat bíbliko aki ta revelá tokante e personalidat di Yehova? Dependiendo di e tipo di informashon ku bo ta trata, lo bo por puntra: Na ki tempu esaki a sosodé? Ki lès práktiko nos por siña for di dje awe? Lo bo por asta hinka bida den bo presentashon dor di hasi algun di e preguntanan ei i kontestá nan durante bo diskurso.

Podisé bo tin ku usa tekstonan bíbliko ku bo ouditorio konosé bon. Kiko bo tin ku hasi pa nan por siña algu for di nan? No djis lesa nan; splika nan.

E análisis di un versíkulo konosí lo ta mas instruktivo si bo parti e teksto na pida-pida i isolá e palabranan òf ekspreshonnan ku ta relashoná ku e tema di bo diskurso i splika nan. Pensa por ehèmpel riba e posibilidatnan ku un teksto manera Mikéas 6:8 tin, segun e Tradukshon di Mundu Nobo. Kiko ta “hustisia”? Ken su norma di hustisia e versíkulo ta trata? Kon lo bo ilustrá kiko kier men “hasi hustisia”? Òf kon lo bo ilustrá “stima bondat amoroso” òf ser “modesto”? Kon lo bo apliká e informashon den kaso di un persona di edat? E splikashonnan ku lo bo duna naturalmente ta dependé di faktornan manera bo tema, bo meta, bo ouditorio i e tempu asigná.

Hopi bes ta bon pa duna un definishon simpel di e palabranan. Pa algun persona e nifikashon di e palabra “reino” menshoná na Mateo 6:10 ta un gran revelashon. Asta un kristian ku tin hopi aña den e bèrdat kisas ta komprondé un teksto bíbliko mas mihó ora bo rekòrd’é di e definishon di un sierto palabra. Un bon ehèmpel di esei ta 2 Pedro 1:5-8. Despues di lesa e teksto ei nos por duna un definishon di e vários palabranan ku e ta menshoná: fe, birtut, konosementu, dominio propio, perseveransia, santidat (“deboshon na Dios,” NW), kariño fraternal i amor. Ora ku den e mesun konteksto tin palabranan ku tin kasi mesun nifikashon, ta bon pa bo definí nan ya bo ouditorio por distinguí nan mihó for di otro. Un ehèmpel di esei ta e palabranan ku nos ta lesa na Proverbionan 2:1-6, manera sabiduria, konosementu, disernimentu i komprondementu.

Si bo djis rasoná riba un teksto bíbliko bo ouditorio por siña algu. Hopi hende ta keda asombrá ora nan realisá ku den e teksto original na hebreo, Génesis 2:7 ta bisa ku Adam tabata un alma bibiente i ku segun Ezekiel 18:4, alma ta muri. Na un okashon Hesus a sorprendé e saduseonan dor di sita Éksodo 3:6, ku nan a bisa di ta kere aden, i a us’é komo argumentu na fabor di e resurekshon di e mortonan.—Luk. 20:37, 38.

Tin biaha por ta masha instruktivo pa hala atenshon na e konteksto di un versíkulo, e sirkunstansianan bou di kua el a wòrdu skirbí i e identidat di e persona ku ta papia òf di esun ku ta skucha. E fariseonan tabata konosé Salmo 110 hopi bon. Pero tòg Hesus a hala nan atenshon riba un detaye importante ku tin den e promé versíkulo. El a puntra: “‘Kiko boso ta pensa di e Kristu, ken su yu e ta?’ I nan a kontest’é: ‘Yu di David.’ El a puntra nan: ‘Dikon anto, den spiritu, David ta yam’é “Señor,” bisando: “SEÑOR a bisa mi Señor: ‘Sinta na mi man drechi, te ora mi pone bo enemigunan bou di bo pianan’”? Si t’asina ku David ta yam’é “Señor,” kon anto e por ta su yu?’” (Mat. 22:41-45) Ora bo rasoná riba e Skritura manera Hesus a hasi, bo ta yuda hende lesa e Palabra di Dios ku mas atenshon.

Si un oradó menshoná na ki tempu un buki bíbliko a wòrdu skirbí òf na ki tempu un sierto suseso a tuma lugá, e mester deskribí tambe e kondishonnan ku tabata reina n’e tempu ei. Di e manera ei, e ouditorio lo komprondé mihó e importansia di e buki òf di e suseso.

Kompará kos ku otro tambe ta hasi bo informashon mas instruktivo. Lo bo por mustra e kontraste entre un opinion popular ku loke Beibel ta bisa riba un sierto asuntu. Òf lo bo por kompará dos relato bíbliko di e mesun suseso. Tin diferensia? Dikon? Kiko nos ta siña for di nan? Hasiendo esaki lo bo por laga bo oyentenan wak e asuntu for di un ángulo nobo.

Den kaso ku bo tin ku trata un sierto aspekto di sirbishi kristian, lo bo por mehorá bo presentashon dor di kuminsá ku un resúmen. Mustra kiko mester ser hasí i dikon, i kon e ta relashoná ku e metanan ku nos tin komo Testigu di Yehova. Kaba splika na unda, na ki tempu i kon lo hasié.

Kiko si bo diskurso mester trata algun di “e profundidatnan di Dios”? (1 Kor. 2:10) Kuminsá ku menshoná i aklará den bo introdukshon algun punto klave di e tema, asina e públiko lo komprondé mihó e detayenan ku bo ta bai presentá despues. I si bo konkluí ku un resúmen breve di e informashon, bo ouditorio probablemente lo keda ku e sensashon agradabel ku nan a siña algu.

Konseho pa Bida Kristian. Pa bo públiko saka mayor benefisio, bo tin ku mustra nan kon e informashon di bo diskurso ta toka nan personalmente. Segun bo ta eksaminá e tekstonan bíbliko di e informashon asigná, puntra bo mes: ‘Dikon e palabranan aki a keda konserbá den e Skritura te na nos dia?’ (Rom. 15:4; 1 Kor. 10:11) Pensa riba e situashonnan di bida ku e personanan den bo ouditorio ta konfrontá, i analisá nan teniendo kuenta ku e konseho i prinsipionan di Beibel. Den bo diskurso, mustra kon e Skritura por yuda un hende enfrentá e situashonnan ei. No limitá bo na algun deklarashon general; menshoná aktitutnan i akshonnan spesífiko.

Pa kuminsá, pone na práktika un òf dos sugerensia di e kapítulo aki den bo próksimo parti, i segun ku bo ta haña eksperensia, apliká e otronan. Ku tempu lo bo ripará ku bo ouditorio ta ansioso pa tende bo diskursonan, konvensí ku loke nan ta bai skucha lo benefisiá nan.