Uso di Informashon Asigná

BEIBEL ta kompará e kongregashon kristian ku e kurpa humano. Kada parti ta nesesario, pero tur “no tin e mesun funshon.” Na armonia ku esei, nos tin ku hasi esfuerso pa kumpli ku e tareanan ku ser konfiá na nos. Pa por hasi esaki nos mester balorá e asignashonnan ku nos risibí pa papia den públiko i presentá nan bon, i no balotá e importansia di algun tema pasobra nos ta pensa ku otro temanan lo ta mas interesante. (Rom. 12:4-8) E esklabo fiel i prudente tin e responsabilidat di perkurá alimento spiritual ‘na e debido tempu.’ (Mat. 24:45) Ora nos ta usa nos abilidatnan personal pa prepará nos partinan segun e instrukshonnan ku nos a risibí, nos ta mustra apresio pa e programa di alimentashon ei, i esaki ta kontribuí na un bon funshonamentu di henter e kongregashon.

Kiko pa Inkluí. Si bo ser asigná pa papia riba un tema den e skol, wak pa bo konsentrá riba e tema ei i no riba otro kos. Den mayoria kaso nan lo asigná bo spesífikamente e informashon publiká ku bo tin ku usa komo referensia. Ora no ta asina, bo por skohe informashon for di e fuentenan ku abo ta deseá. Sin embargo, segun ku bo ta prepará bo parti, hasi sigur ku henter e presentashon ta drei rònt di e tema asigná. Ora di disidí kiko pa inkluí, tambe bo tin ku tene kuenta ku bo ouditorio.

Analisá e informashon asigná i e tekstonan bíbliko ku e tin. Pensa riba kon bo por us’é pa bo ouditorio saka e máksimo probecho for di dje. Skohe dos òf tres punto for di dje pa bo usa komo e ideanan prinsipal di bo diskurso. Tambe skohe e tekstonan ku bo tin pensá di lesa i analisá.

Kuantu informashon bo mester kubri? Solamente loke bo por analisá na un manera adekuá. No sakrifiká bon manera di siña djis pa bo por inkluí yen di informashon. Si algun parti di e informashon no ta kuadra ku e meta di bo diskurso, konsentrá riba e partinan ku sí lo yuda bo alkansá e meta ei. Usa e puntonan ku lo ta mas instruktivo i di probecho pa bo ouditorio. E propósito di e punto di konseho aki no ta pa wak kuantu informashon bo por kubri, sino pa usa loke a ser asigná komo base pa bo parti.

No ta e intenshon pa bo parti ta simplemente un resúmen di e informashon asigná. Bo mester prepará pa splika sierto puntonan, amplia riba nan, ilustrá nan i si ta posibel duna un ehèmpel kon nan ta apliká. Ideanan adishonal mester sirbi pa desaroyá aspektonan importante di bo informashon asigná i no pa remplasá e informashon.

Rumannan kapasitá komo maestro ku risibí e invitashon pa duna instrukshon den e Reunion di Sirbishi ta komprondé ku nan tin ku konsentrá riba e informashon asigná, i no remplas’é ku otro kos. Asina tambe rumannan ku tin ku duna diskurso públiko ta haña un boskeho. Maske esei ta duna nan sierto fleksibilidat, e boskeho ta indiká bon kla kua ta e puntonan prinsipal i e argumentunan ku ta apoyá nan i tambe e tekstonan bíbliko ku nan tin ku usa komo base pa e diskurso. Un oradó ku siña duna diskurso basá riba e informashon asigná na dje ta preparando su mes hopi bon p’e risibí otro privilegionan relashoná ku dunamentu di instrukshon públiko.

E training aki lo por hasi bo mas kapas tambe pa kondusí studionan bíbliko progresivo. Lo bo siña dirigí atenshon na e informashon di studio en bes di desviá for di e tema i enfatisá otro puntonan ku ounke kisas ta interesante, no ta nesesario pa komprondé e tema. Pues, si bo a kapta e idea di e lès aki bon, lo bo no bai pega asina estrikto na e informashon di studio ku bo no ta agregá ningun splikashon ku e studiante lo por tin mester.