Apoyando e Reino​—Konstrukshon di Lugánan di Adorashon i Trabou di Ousilio

BO TA kana drenta bo Salòn di Reino i kasi bo no ta rekonosé e lugá. Semper bo tabata orguyoso di e edifisio akí. Bo tin asta grato rekuerdo di tempu ku bo a yuda ku su konstrukshon algun aña pasá. Pero awor bo ta mas orguyoso ku nunka di e Salòn di Reino, ya ku nan a transform’é temporalmente den un sentro pa koordiná trabou di ousilio. Resientemente un orkan a kousa inundashon i destrukshon den bo área, i mesora e Komité di Sukursal a organisá un manera pa e víktimanan di desaster por haña kuminda, paña, awa limpi i otro yudansa. E artíkulonan ku e sentro a risibí di donashon ta nèchi ordená. Fila di ruman ta drenta i haña loke nan tin mester. Hopi di nan ta yora di alegria.

Hesus a bisa ku e karakterístika sobresaliente di su pueblo lo ta nan amor pa otro. (Huan 13:34, 35) Den e sekshon akí nos lo bai mira kon Testigunan di Yehova ta demostrá amor kristian den e proyektonan di konstrukshon i e trabounan di ousilio ku nan ta hasi. Tur e muestra di amor akí ta un prueba konvinsente ku nos ta bibando bou di gobernashon di e Reino di Hesus.