Proyekto di Konstrukshon Ku A Tuma Lugá Promé ku e Pandemia

Tur aña sentenares di míles di hende ta batisá. P’esei, nos tin mester di mas i mas edifisio pa adorá Yehova. Pa e motibu ei, Departamento Lokal di Diseño i Konstrukshon rònt mundu a plania pa konstruí òf renobá mas ku 2.700 lugá di adorashon durante e aña di sirbishi 2020.a

Lamentablemente, e pandemia di COVID-19 a stroba e plannan akí. Pa protehá nos rumannan i kumpli ku regla di gobièrnu, Komité di Publikashon di Kuerpo Gobernante a stòp mayoria di e proyektonan di konstrukshon rònt mundu temporalmente. Sinembargo, durante e aña di sirbishi 2020, nan a logra konstruí i renobá mas ku 1.700 lugá di adorashon promé ku e pandemia a kuminsá. Ademas, nan a kaba ku mas ku 100 di e proyektonan grandi di konstrukshon di diferente sukursal. Ban wak kon dos di e proyektonan akí a benefisiá nos rumannan.

Sukursal di Kamerun. E sukursal bieu ku tabata keda den e stat Douala tabata muchu chikitu i tabatin mester di un renobashon grandi. Komité di Publikashon a pensa pa renobá e sukursal, pero e gastunan pa hasi esei lo a surpasá e balor di e edifisionan. Ademas, nan a hasi investigashon pa mira si ta posibel pa konstruí riba un tereno nobo òf pa kumpra un edifisio i renob’é. Pero niun di e opshonnan ei no tabata posibel.

Mientrastantu, e rumannan a haña sa ku gobièrnu tabatin plan di traha un kaminda banda di un di nos Salònnan di Asamblea na e parti nort di Douala. Konstrukshon di e kaminda ei lo a hasié mas fásil pa yega einan i pa haña awa, koriente, telefòn, Internet, etcetera. Esei tabata eksaktamente loke e sukursal tabatin mester. Pues, Kuerpo Gobernante a aprobá konstrukshon di un sukursal nobo riba tereno di e Salòn di Asamblea.

Pa aselerá e trabou i spar plaka a disidí di usa testigu di Yehova i tambe kontratista ku no tabata testigu di Yehova pa traha riba e proyekto. De echo, e proyekto a sali mas ku dos mion dòler ménos di loke nan a spera. E famia di Bètel a logra muda pa e sukursal nobo nèt promé ku e pandemia di COVID-19 a kuminsá.

Awor e bètelitanan na Kamerun tin un mihó lugá pa biba i traha, i nan ta mira e sukursal nobo komo un regalo di Yehova. Un pareha a bisa: “Nos ke traha mas duru i mustra nos apresio pa e regalo akí di Yehova.”

Ofisina di Tradukshon (RTO) di Tojolabal, na México. Pa hopi aña, e tim di tradukshon di idioma tojolabal tabata na e sukursal di Sentroamérika, ku no ta muchu leu for di Siudat di México. Sinembargo, hende tabata papia tojolabal prinsipalmente den e statnan Altamirano i Las Margaritas. E statnan ei ta keda kasi 1.000 kilometer for di e sukursal! Komo resultado, tabata difísil pa e traduktornan keda al dia ku e idioma. Ademas, tabata difísil pa sukursal haña ruman kualifiká den bisindario pa yuda ku e trabou di tradukshon i e grabashonnan na tojolabal.

Pa e motibunan akí, Komité di Redakshon di Kuerpo Gobernante tabata ke pa e tim di tradukshon di tojolabal muda bai kaminda nan ta papia e idioma ei. Pues, sukursal a disidí di kumpra un edifisio i renob’é. Esei tabata mas barata ku konstruí òf hür ofisina.

Un traduktor a splika kon e ta sinti: “Den e último dies añanan ku mi a traha komo traduktor na sukursal, mi no a topa ni un famia den bisindario ku ta papia mi idioma. Awor nos ofisina ta den e área kaminda nan ta papia tojolabal. Pues, tur dia mi por papia ku hende na tojolabal. Esaki a yuda mi amplia mi vokabulario i hasi mi trabou mihó.”

Proyekto di Konstrukshon pa e Aña di Sirbishi 2021

Pa e aña di sirbishi 2021, si sirkunstansia permití, tin plan pa traha riba 75 proyekto. Esei ta inkluí RTO i lugá pa tene e skolnan bíbliko. Nos lo sigui traha riba 8 proyekto grandi na diferente sukursal. Esei ta inkluí konstrukshon di e edifisionan nobo di Sede Mundial na Ramapo, New York, i e proyekto pa muda e sukursalnan di Argentina i Italia. Pero esei no ta tur. Nos tin mester di mas ku 1.000 Salòn di Reino nobo. Di otro banda, mas ku 6.000 di e lugánan unda nos rumannan ta reuní ta inadekuá i mester ser remplasá i tin 4.000 Salòn di Reino mas ku tin ku ser renobá.

Kon tur e trabounan akí di konstrukshon ta ser finansiá? Ruman Lázoro González, un miembro di Komité di Sukursal di Sentroamérika, a kontestá e pregunta ei ora e tabata papia tokante e proyekto di konstrukshon di e ofisina di tradukshon di tojolabal. “E rumannan den e teritorio di nos sukursal ta di rekurso limitá. Pues, si no ta pa e apoyo di henter e hermandat mundial, lo tabata imposibel pa traha un ofisina di tradukshon pa nos rumannan ku ta papia idioma indígena. Donashon di e rumannan rònt mundu ta yuda e traduktornan muda bai kaminda e idioma ta ser papiá. Nos ta gradisí nos hermandat mundial pa nan apoyo generoso.” Sí, e proyektonan di konstrukshon akí ta posibel danki na boso kontribushon na e obra mundial. Hopi di e donashonnan akí ta ser hasí via donate.jw.org.