Parti 1
Dios Realmente Ta Interesa den Nos?
1, 2. Cua pregunta hende ta haci tocante Dios i pakico?
NA UN dado momento den bo bida, kisas bo a puntra: ‘Si tin un Dios cu realmente ta interesá den nos, pakico e ta permití asina tantu sufrimentu?’ Nos tur a experenciá sufrimentu of conocé un persona cu a experenci’é.
2 En berdad, atraves di historia hende a sufri dolor i pena a causa di guera, crueldad, crímen, inhusticia, pobresa, malesa i e morto di sernan kerí. Den nos siglo 20 so, gueranan a mata mas cu 100 miyon hende. Cientos di miyones di otronan a ser heridá of a perde cas i posesionnan. Asina tantu cos horibel a sosodé den nos tempu, resultando den gran tristesa, hopi lágrima i un sintimentu di desesperacion di parti di cantidad incontabel di hende.
3, 4. Con hopi hende ta sinti encuanto e echo cu Dios ta permití sufrimentu ?
3 Algun hende ta bira amargá i ta sinti cu si tin un Dios, e no ta realmente interesá den nos. Of kisas asta nan ta kere cu no tin Dios. Por ehempel, un homber cu a sufri di persiguicion étnico cu a causa morto di amigunan i famia den Guera Mundial I a puntra: “Unda Dios tabata ora nos tabatin mester di dje?” Un otro homber, cu a sobrebibí e asesinato di miyones di hende dor dje nazinan den Guera Mundial II, tabata asina afligí dor dje sufrimentu cu el a mira cu el a bisa: “Si bo por a lembe mi curason, lo el a venená bo.”
4 Pues, hopi hende no por comprondé pakico un bon Dios lo a permití mal cosnan sosodé. Nan ta duda si realmente e ta interesá den nos of no of si e ta existí mes of no. I hopi di nan ta kere cu sufrimentu semper lo ta un parti di existencia humano.
[Plachi na página 2, 3]
Un mundu nobo liber di sufrimentu ta cerca?