Tempu Ta Kabando pa Planeta Tera?

Kon lo bo kontestá e siguiente pregunta?

Den futuro serkano, kondishonnan riba tera lo

(a) mehorá?

(b) keda meskos?

(c) bira mas malu?

BO TA purba mantené un punto di bista positivo di futuro? Tin hopi benefisio si bo hasi esei. Estudionan ta indiká ku ta bai mas mihó ku hende ku tin un punto di bista optimista, tantu den sentido mental komo físiko. Un estudio riba término largu asta a saka na kla ku hende hòmber ku tabata optimista tabatin ménos chèns di haña problema ku kurason na komparashon ku esnan ku tabatin un punto di bista pesimista di bida. E resultadonan di e estudio akí ta na armonia ku loke Beibel a bisa siglonan pasá: “Un kurason kontentu ta un bon remedi, ma un spiritu abatí ta seka wesu.”​—Proverbionan 17:22.

Sinembargo, en bista di loke sientífikonan ta pronostiká tokante planeta Tera, hopi hende ta haña ku ta difísil pa ta kontentu i optimista. Ban wak djis algun pronóstiko alarmante ku ta den notisia.

Un Planeta den Peliger

Na aña 2002, e respetabel Instituto di Medio Ambiente di Stockholm a spièrta ku si no logra baha e impakto negativo ku humanidat tin riba medio ambiente djis pa protehá desaroyo ekonómiko, esaki probablemente lo kousa “susesonan ku por kambia e klima i ekosistema di e planeta radikalmente.” E rapòrt ta sigui bisa ku pobresa mundial, inhustisia kontinuo i destrukshon konstantemente di rekursonan di naturalesa por pone sosiedat kai den “un krísis ekológiko, sosial i di siguridat tras di otro.”

Na 2005, Nashonnan Uní a publiká e Informe di Síntesis di e Evaluashon di Ekosistema di Milenio. Esaki tabata e resultado di un estudio di medio ambiente realisá rònt mundu pa kuater aña, na kua mas ku 1.360 eksperto for di 95 pais a partisipá. E informe tabatin e siguiente spièrtamentu fuerte: “Aktividat humano ta eksigí asina hopi for di e siklonan di naturalesa ku no tin garantia mas ku e ekosistema di e planeta por sostené generashonnan di futuro.” Pa prevení kalamidat lo ta nesesario pa hasi “kambionan signifikativo den pólisa-, institushon- i práktikanan ku ainda no a ser hasí,” e informe ta deklará.

Anna Tibaijuka, direktora ehekutivo di e Programa di Nashonnan Uní pa Establesimentu di Poblashon Humano, ta ekspresá loke mas i mas investigadó ta kere. E ta bisa: “Si nos sigui asina, un futuro teribel ta spera nos.”

Un Motibu pa Ta Optimista

Testigunan di Yehova, ku ta publiká e revista akí, tambe ta kere ku kambionan drástiko ku lo tin efekto riba tera ta na kaminda. Sinembargo, nan ta konvensí ku en bes di hiba na un futuro desastroso, e kambionan akí lo habri kaminda pa kondishonnan maravioso nunka bisto aki riba tera. Dikon nan tin e punto di bista optimista akí? Pasobra nan ta konfia den e promesanan ku tin den Beibel, e Palabra di Dios. Tuma nota di un di e promesanan akí: “Aki poko tempu e malbado lo no t’ei mas; maske kuantu bo buska su lugá, e lo no t’ei. Ma e humildenan lo heredá e tera, i lo deleitá nan mes den pas abundante.”​—Salmo 37:​10, 11.

E speransa ei ta simplemente un soño? Promé ku nos kontestá e pregunta akí, pensa un ratu riba lo siguiente: Ku eksaktitut Beibel a predisí míles di aña di antemano hopi di e problemanan serio ku ta asotá tera i humanidat awe. Ta bon pa lesa e tekstonan menshoná den e siguiente artíkulo, i kompará loke nan ta bisa ku loke ta pasando den mundu. Di e manera ei, lo bo haña mas konfiansa ku Beibel por predisí futuro ku eksaktitut.