Remechuodel​—Ngsebechiu el Melisiich er “Tirkel Mesulang”?

A ta el mesobil el odos el ngklel a Angela,a a kora suebek a rengul el mengiil er a remechuodel. Ngera te mo melekoi er ngii? Ngmera el tekoi el kmo ngdimlak lebo er a bebil er a miting, engdi ngmera el mesaul a bedengel e le ngta el sils el luluureor el omekerreu er a remechuodel el chad. Ngdirrek el kmal di suebek a rengul el kirel a klisichel a bedengel a delal.

Omko ke mlo oldingel er a Angela, e ngmekerang a bo molisiich er ‘ngikal mesulang’ el chad? (Jer. 31:25) Engdi a kot e ngmekerang a omongetmokl er kau el mo melisiich er ngii?

MOLATK ER A BLEKERDELEL A KLENGAR ER A ODAM ER KAU

A lebebil er a taem, e ngmo mesaul a bedenged e le ngurered me a lechub e ngerecheled er a ongdibel a uchul. El di ua profet el Daniel el mlo mesaul a rengul er a lenguu a ues el dimlak lodengelii a belkul. (Dan. 8:27) A Daniel a mlongeseu er sera be ldum er ngii a anghel el Gabriel. Ngika el melekingel a Dios a milsang a Daniel a klemedengei, e dilu er ngii el kmo a Jehovah a rirenges a nglunguchel, e liluut el dmu el kmo a “Dios a betik a rengul er kau.” (Dan. 9:21-23) Me a uriul, e a ungil el tekoi el lullekoi a ta er a anghel a millisiich er ngika el profet er a bo lemesaul a rengul.​—Dan. 10:19.

Me ngdi osisiu, a uchei er a bo moldingel er a odam el locha mesaul me a lechub e ngmechitechut a rengul, e mousbech a taem el melatk er a blekerdelel a klengar er ngii. Ngera el mondai a lechelebangel er ngii? Ngmekerang aika el mondai e mengitechut er ngii? Ngera el ungil el blekeradel a lolecholt? A Richard el mla mesiou el ta er a remechuodel el betok er a 20 el rak a kmo: “Ak blechoel el melatk aike el ungil el omerellel a odam er ngak. Sel kulatk el kirel a blekerdelel a klengar er ngii er a uchei er a bo kuldingel er ngii, e ngmo sebechel el beot er ngak el omsang a omelisiich el oltirakl aike el lousbech.” Me a lsekum a ta er a remechuodel a obengkem el mo oldingel er a chad e melisiich er ngii, e ngungil a omdak el mesaod er a tekoi lechelebangel er ngii a odam er kemiu.

MONGELLAKL ER A RENGUL A ODAM ER KAU

Ke locha kongei el kmo a chad a mo merur sel sekum ngdi ngii el mesaod a tekoi el kirel. El uai tiang: A odam er kau a locha mo meringel er ngii el mengedecheduch er a remechuodel el me oldingel er ngii. Me a leuaisei, e ke mekerang e ngosuir el mo beot er ngii el mengedecheduch? A ungil el klikm me a ungil el tekingem a sebechel cholleklii a rengul. A Michael el mla mesiou el ta er a remechuodel el betok er a 40 el rak, a blechoel el melekoi aika el tekoi sel bo loldingel er a chad el kmo: “Ke medengei el kmo ngerang, a ta er a kot el ungil el techall el lobang a ta er a remechuodel, a sel bo loldingel er a rudam er a rekeblirir e bo lungil el medengelterir. Me ngmera el dmeu a renguk el mlo sebechek el me oldingel er kau er chelechang.”

Sel bo moldingel er a chad e ngsebechem el olengit er ngii me ko meluluuch. Ngar er a nglunguchel, e a apostol el Paulus a milsaod el kirel a klaumerang, bltikerreng me a ducherreng er a rudam er ngii. (1 Th. 1:2, 3) Sel mosaod er a uldesuem el kirel a ungil el blekerdelel a odam er kau, e ngua omongetmokl er a rengum me a rengul el kirel a cheldechedechemiu. A tekingem a dirrek el sebechel uchul e ngmo chelellakl a rengul. A ta er a remechuodel el ngklel a Ray a melekoi el kmo: “A lebebil er a taem, e kede obes aike el ungil tekoi el meketmokl sel doldingel er a rudam er kid. Engdi sel sekum a chad a omeklatk er kid el kirel, e ngkmal melisiich a rengud.”

BESTERIR A NGAT ER A RENG

Me nguai a Paulus, ngsebechem el omesterir a “ngat er a reng” el oeak sel mouchais er tir a uldasu el ngar er a Bades. (Rom 1:11) El uai tiang, a odam el mechitechut a rengul a locha mo omdasu el kmo ngdiak a ultutelel, el uai ngike el milluches er a Psalm el ulemekesiu er a blekerdelel el ua ‘blil a bilong el dikea belkul.’ (Psa. 119:83, 176) A uriul er a kedeb el omesodel tia el tekoi, e ngsebechem el ouchais er ngii el kmo ngulterekokl a rengum el kmo ‘ngdirkak lobes’ a llechul a Dios.

A leuaisei, e a okesiu el kirel a ririid el udoud el silber, ngsebechel el ngosuir a odos el mla mo cheroid er a ongdibel me a lechub e ngmla mo oudeleokl a omesiungel? (Lk. 15:8-10) Tia el ririid el udoud a locha mla er a olbiungel el rruul er a betok el silber el udoud. Sel omosaod er tia el okesiu, e ngika el odos a sebechel el mongeseu el mo mesa el kmo ngdirk klou a ultutelel er a chelsel a ongdibel er a Rekristiano. Me a uriul er a omosaod er tiang, e ngsebechem el mesaod el kmo a Jehovah a omekerreu er ngii el uai a kekerei el cheremel el sib.

A rekldemed er a klaumerang a dmeu a rengrir el mesaod a uldesuir el kirel a tekoi el ngar er a Biblia. Me a leuaisei, e ngungil a lak di blechoel el mengedecheduch. A uriul er a omchiuii a bades, e molengit er ngii me losaod er sel tekoi el ngar er a chelsel el melutk el kirel. El uai tiang, a uriul er a lechiuii a 2 Korinth 4:16, e a ta er a remechuodel a sebechel el oker el kmo, “Ngmla ta el omchelebangel a tekoi el ochotii el kmo a Jehovah a millisiich er kau?” Sel omoruul er tiang e ngsebechel el mo uchul e ko mo kasisiich er a delongeliu.​—Rom 1:12.

Ngdirrek el sebechem el melisiich er a odam er kau el oeak a omosaod er a chad el ngar er a Biblia el mlo chelebangel er a osisiu el tekoi el uai ngii. A chad el mechitechetong a rengul a locha mo semeriar el mo medengei el kirir a reua Hana me a Epafroditus, el tir a lebebil er a taem e ngmlo mechitechut a rengrir engdi te millemolem el mekreos er medal a Dios. (1 Sa. 1:9-11, 20; Fil. 2:25-30) Me ngungil a mosaod a bebil er a kerebai el ngar er a Biblia a lsekum e ngungil el kirel.

MOCHOTII A KLEMERIARRENG ER KAU EL KIREL

Ngsebechem el ochotii el kmo ke omekerreu er a rudam me a rudos er kau el oeak sel mochotii a klemeriarreng er kau er a uriul er a omoldingel er tir. (Rel. 15:36) Sel bo lemerek a odngelem, e ngungil a omrellii a taem el sebechiu el mo dmak el oldingel a obliil. A Bernard el meketeketa el mesiou el ta er a remechuodel a melekoi el kmo, sel lluut el mengedecheduch er a odam me a lechub e ngodos el dirk blo loldingel er ngii, e ngoker er ngii el kmo, “Ngmlo ua ngera tia el tekoi?” Sel molecholt er a chouaisei el klemeriarreng, e ngsebechem el mo medengei el kmo ngdirk ousbech a ngeso me a lechub e ngdiak.

Chelecha el taem, e a rudam me a rudos er kid a kirir el mo medengei el kmo te ngar er ngii a omekerreu er tir, e betik a rengrir er tir, e medengei aike el tekoi el lechelebangel. (1 Th. 5:11) Me a leuaisei, e a uchei er a bo moldingel el melisiich er a odam me a lechub e ngodos, e mousbech a taem el melatk el kirel a tekoi lechelebangel er ngii. Moluluuch e mosiik a bades el ungil el kirel. A omoruul el uaisei e ke mo metik a ungil el tekoi el sebechel el mo melisiich er “tirkel mesulang”!