Momerk el Mo er a ‘Rebek el Chad’
1. Te mekerang a rumerk er a klumech e mo ua meduch el daiksang?
1 A meduch el daiksang a ngar er ngii a betok el dongu er ngii, e medengei el kmo ngoingerang e mekerang a lousbech a derta er ngii. Me ngdi osisiu, kid a ngar er ngii a betok el dongu er kid el sebechel el ngosukid el mo churrengelii a urered er a berkel a klumech. El uaitiang, ngbetok el brochure el mesaod a bek el bedengel a suobel a mla meketmokl el mo ngosuterir a ‘rebek el chad.’—1 Ko. 9:22.
2. Ngoingerang e ngungil el taem el dorous a brochure?
2 A Ungil el Taem el Dorous a Brochure: A daiksang a melilt er sel dongu el chatter er a ureor el loruul er ngii. Me ngdi osisiu, ngsebeched el merous a brochure er sel taem el dodengei el kmo ngmo uchul a klungiolel a chad, el diak di el sel buil el kired el merous er ngii. El uaitiang, a lsekum e ngkired el merous er a Biblia Olisechakl el babier, e mengedecheduch er a chad el kiei er a beluu el diak a Rekristiano er ngii me ngdiak a kmal klemeriarreng er ngii er a Biblia, e ngbai ungil el debsang a brochure, e a uriul e ngsebeched el ochotii er ngii a Biblia Olisechakl el babier a lsekum e kede mla mekurulii a klemeriarreng er ngii.
3. Ngera uchul me ngkired el mo meduch el ousbech a dongu er kid el omerk er a klumech?
3 A Bades a ouchais a ungil el tekoi el kirir tirke el mle meduch el chad er a ureor. (Osi. 22:29) Me ngklemerang el tekoi, ngdiak a lmuut el klou a ultutelel el ureor er chelechang el sebechel el mekesiur a ureor er a berkel a “evangkelio ra Dios.” (Rom 15:16) Me a lsekum e ngsoad el mo meduch el ‘chad ra ureor, el diak a ngeral de merur er ngii,’ e ngkired el mesuub el mo meduch el ousbech a dongu er kid.—2 Tim 2:15.