Molengeseu er a Rechad el Mo Olengesenges er a Dios

1. Ngera el brochure a mlotobed er sel ileakl el eru el sils el ongdibel er kid el dai er ngii a kmo “A Rengedel a Dios Lemei”, e ngera uchul me ngmeklou a ultutelel el dongu el sebeched el ousbech?

¹ Ngar sel ileakl el eru el sils el ongdibel er kid el dai er ngii a kmo “A Rengedel a Dios Lemei,” e ngmla er ngii a teblo el brochure el mlotobed, el ngii a Molengesenges er a Dios Me Bo Mkiei el Mo Cherechar me a Listen to God.a Aika el brochure a beot e mereched a doliuid e le ngdi mekesai a tekoi er a chelsel. Tia el Molengesenges er a Dios Me Bo Mkiei el Mo Cherechar el brochure el tekoi er a Merikel a ngiluu a kengei el mo moiuid el ngar er a 431 el omelekoi.

2. Te rua techang a mo ngmai a klungiolir er aika el brochure?

² Te rua techang a mo ngmai a klungiolir er aika el brochure? Ka momtab aika el blekeradel el blechoel el duubech el meliuekl er a beluulechad:

• A publisher el mesaod a tekoi el obengkel a chad er a blai, el ketengel el mengedecheduch er ngii me a lechub e nglmuut el mo oldingel er ngii, a mesa el kmo ngika el chad a diak el sebechel el menguiu me a lechub e ngdiak el sal meduch el menguiu.

• A publisher a omerk er a klumech el mo er a rechad el ousbech er a omelekoi el dirkak lemoiuid me a lechub e ngdi mekesai el babilenged a mla moiuid el ngar er ngii el omelekoi. Me a lechub e a oumesingd er a rechad el ngar er a territory a meduch el melekoi er tia el omelekoi engdi te metitur el menguiu er ngii.

• A publisher a ousbech er a sign language el omerk er a klumech el mo er a remechad el ngar er a territory er ngii.

• A chedam me a lechub e ngchedil a soal el olisechakl er a klemerang el mo er a kekerei el ngelekel el dirkak bo lemeduch el menguiu.

3. Ngmle ua ngerang a oketmeklel a Listen to God el brochure?

³ Rolel e Ngmileketmokl Aika el Babier: A Listen to God a di mekesai a tekoi er a chelsel, e ngar er ngii a kedeb el omesodel me a Bades el ngar cheungel a bek el llel el melisiich a meklou a ultutelel el tekoi. E ngera uchul? Ka molatk er a chad el milskau a brochure el ngar er a omelekoi el diak el sebechem el chiuii, el ousbech a llechukl el diak modengei. Kau ke mo semeriar el nguu tia el brochure el ngar er ngii a klebokel el siasing er ngii? Nglocha diak. Me nguaisei, a rechad el diak el sebechir el menguiu a diak el sal sorir a babier el betok a tekoi er ngii. Sei a uchul me a derta el llel tia el brochure a meklou a siasing er ngii el ngar er ngii a arrow el olengeseu er kau sel mosaod er a ta el siasing el mo er a chimong.

4. Ngmle ua ngerang a oketmeklel a Molengesenges er a Dios Me Bo Mkiei el Mo Cherechar el brochure?

⁴ A Molengesenges er a Dios Me Bo Mkiei el Mo Cherechar el brochure a ngar er ngii a osisiu el siasing er ngii el ua Listen to God. Ngdirrek el sebeched el ousbech er ngii el mesuub el obengterir tirke el diak el sal meduch el menguiu me a lechub e te mesuub el mo menguiu. Tiang a sebeched el ousbech er ngii sel dosuub el obengkel a chad el oba Listen to God el brochure. Ngar er a derta el suobel, e ngngar er ngii a ker el ngar er a klitechetud el mo monger er a bek el suobel me a dirrek el omesaod me a bades el obengkel a siasing. Ngdirrek el ngar er ngii a baks el ngar er ngii a bebil el tekoi me a Bades el sebeched el mesaod, e tiang a di oltirakl er a klemedengei er ngike el mosuub el obengkel.

5. Ngoingerang e mekerang a dorous aika el brochure?

⁵ Rolel a Dousbech Aika el Brochure: Sel moldingel a obliil, e ngsebechem el merous a ngii di el ta er aika el brochure a lsekum e ke omdasu el kmo ngmo uchul a klungiolel a chad el mongedecheduch er ngii. E tiang a sebechem el meruul er ngii alta e ngdiak el temel a omerusel a brochure er sel buil. (Momes er a baks el “Rolel a Dorous Aika el Brochure.”) Ngsebechem el ousbech er ngii sel mluut el mo oldingel er a chad el semeriar el oeak sel mdu er ngii el kmo ngngar er ngii a babier el soam el lochotii er ngii e sola e mnguu el msang.

6. Ngmekerang a dousbech aika el brochure sel dosuub el obengkel a chad?

⁶ A Listen to God el brochure a diak a ker er ngii, me sel bo mosaod a suobel e ngdiak el oeak a ker me a nger el uai sel mosuub er a Biblia Olisechakl el babier. Ngar er a bek el beluu, e a rechad a sorir el orrenges a cheldecheduch. Me mousbech aike el siasing el ouchais aike el cheldecheduch el ngar er a Biblia. Moba klemeriarreng el mesaod aike el siasing. Molengit er ngike el mosuub el obengkel me louchais el kmo ngngera uldesuel el kirel a suobel. Monguiu aike el bades el ngariou e msodii a belkul el mo er ngii. Moker er ngii a ker me bo el sebechel el mo ungil medengei aike el losuub. E a lsekum e ngngousbech er a Molengesenges er a Dios Me Bo Mkiei el Mo Cherechar, e mdak el menguiu aike el omesodel me a bades sel mosaod a bek el siasing.

7. Ngmekerang a dengesuir ngike el mesuub el mo olengeriakl?

⁷ Mngesuir a Chad el Mesuub el Mo Olengeriakl: Kede oureng el kmo aike el mosaod el obengkel ngike el mesuub a mo rullii el mo soal el mo meduch el menguiu me bo el sebechel el menglou er a klemedengei er ngii er a Jehovah. (Mt. 5:3; Jn. 17:⁠3) Me nguaisei, a lsekum e ko mesuub er a Listen to God, e a omerollel a taem e nglocha mo sebechem el oker er ngii a lsoal a mosisecheklii el mo meduch el menguiu, e sola e ko mo mesuub er a Molengesenges er a Dios Me Bo Mkiei el Mo Cherechar. A lsekum a chad a mo merek el mesuub er a ta er aika el brochure, e ngdiak el belkul a kmo ngmla mo sebechel el mo metecholb. Ngkiriu el mo mesuub er a Biblia Olisechakl el babier me a lechub a kuk ta er a babier el sebechel el menglou a klemedengei er ngii er a Biblia.

8. Ngera uchul me ke oba omereng el saul el kirel aika el beches el klekedall el dousbech er a ureor er a berkel a klumech?

⁸ A rechad a kirir el orrenges er Ngike el Kot el Ngarbab er a uldekial a eanged me a chutem a lsekum e ngsorir el mo kiei el mo cherechar. (Isa. 55:⁠3) E a Jehovah a soal a “rokui el chad,” el uldimukl er tirke el diak el sebechir el menguiu el mo mesuub el mo olengesenges er ngii. (1 Ti. 2:​3, 4) Kede mera el oba omereng el saul el kirel aika el beches el klekedall el sebeched el ousbech el olisechakl er a rechad er a rolel a dolengesenges er a Dios!

[Footnote]

[Baks el ngar er a 3 el llel]

Rolel a Dorous Aika el Brochure

Mochotii a 2-3 el llel el mo er a chad er a blai e mdu el kmo: “Kau ngsoam el kiei er a beluulechad el uai tiang? [Mongiil er a nger er ngii.] A Bades a tibir [me a lechub e ngtia el chedaol el Biblia a tibir] el kmo a Dios a di kmedung e ngmo meruul er tia el beluulechad el mo klebokel e mo er ngii a budech er ngii e mo diak a chad el chebuul me a lechub e ngsmecher el kiei er a chelsel. Momtab el kmo ngngera kired el meruul me bo el sebeched el kiei er chouaitia el basio. [Monguiu er a Isaia 55:​3, el mocholt er a bebul a 3 el llel.] Tiang a mengelechel er kid el mo kmeed er a Dios e mo olengesenges er ngii. Engdi ngmekerang a dolengesenges er a Dios?” Momiis el mo er a 4-5 el llel e mosaod er a nger el obengkel. A lsekum e ngdiak a temel, e bsang a brochure e mketmeklii a taem el mluut el mong e mosaod er a nger er ngii.