Rolel a Dousbech er a Ungil Chais el Mla er a Dios!
Beches el Babier el Mileketmokl el Mo Olengeseu er Kid el Lmuut el Mo Oldingel er Tirke el Semeriar e Omuchel a Omesubel a Biblia
1. Ngera el beches el babier el tilobed er sel “Bo Mkerekikl er a Uldesuem!” el Klou el Ongdibel a ngosukid el lmuut el mo oldingel er tirke el semeriar e omuchel a omesubel a Biblia?
1 Ngar sel Klou el Ongdibel el dai er ngii a kmo “Bo Mkerekikl er a Uldesuem!”, e ngmle dmeu a rengud el nguu a beches el babier el mo ngosukid el lmuut el mo oldingel er tirke el semeriar e omuchel a omesubel a Biblia. A Ungil Chais el Mla er a Dios! el babier a mo mtechir a Doruul el brochure. Ngdi osisiu ngii me a Doruul el brochure el di mekedeb a suobel er a chelsel me ngosukid el mo omuchel a omesubel a Biblia sel dekot el mengedecheduch er a chad. Me nguaisei, alta e a Doruul el brochure a milsaod aike el kirel a Kristiano el meruul, el ngii a sebechel el mo meringel er a redirk mlo mesuub a Biblia el mo kongei, engdi tia el beches el babier a mo mesaod el kirel a ungil chais el debetik er ngii er a Biblia.—Rel. 15:35.
2. Ngera uchul me ngmileketmokl a Ungil Chais el babier?
2 Ngera uchul me ngmileketmokl tia el babier? A rudam el meliuekl er a beluulechad el rokir a ullengit me lebo er ngii a babier el beot a omesodel el sebechel olechau er a chad el mei er a klemerang e dirrek el sebechir el ousbech er ngii el omuchel el mesuub er a uchei er a lebo er a Biblia Olisechakl el babier. A rechad el tir a kora medakt el mesuub er a buk a blechoel el sorir el mesuub a Biblia el ousbech er a brochure. Me a lmuut el tang, a brochure a beot er ngii el moiuid el mo er a betok el omelekoi.
3. Ngmekerang tia el babier e kuk ngodech er aike el bebil er a babier el dousbech el mesuub?
3 Rolel e Ngmileketmokl: A betok er aike el babier el dousbech el mesuub a mileketmokl me bo el sebechel a chad el di ngii el menguiu e mo omtab er a klemerang. Tia el babier a kuk ngodech a oketmeklel. Ngmilluches el kired el ousbech er ngii el mesuub el obengkel a chad. Me a leuaisei, e sel mnguu el msang a chad e ngungil a mosaod er a tang me a lechub e ngteblo el parakurab. Aike el parakurab a di mekedeb, me ngsebechem el mesaod er ngii er a medal a tuangel er a blil a chad me a lechub e ngsiobai er ngii. Alta ngungil a domuchel el mesaod er a kot el suobel, engdi ngdirrek el sebeched el omuchel a omesubel a Biblia el ousbech a ngii di el suobel el ngar tia el babier.
4. Ngmekerang tia el babier e ngosukid el mo olisechakl el ousbech er a Biblia?
4 Ngar er a betok el babilenged, e ngsebeched el metik a nger er a ker er a chelsel a parakurab. Engdi ngar er a chelsel tia el babier, e a nger er a ker a di sebeched el metik er a Biblia e merekong. A ruumesingd el chad a sorir el mesuub aike el tekoi el ngar er a Biblia er a bai losuub aike el ngar er a babilenged. Sei a uchul me a oumesingd er aike el bades a kired el menguiu. Tiang a ngosuir a chad el mesuub el mo medengei el kmo aika el losuub a mla er a Dios.—Isa. 54:13.
5. Ngera me ngklou a ultutelel el kirel a chad el olisechakl el mo ungil el kltmokl er a uchei er a bo losuub el obengkel a chad?
5 Tia el babier a diak losaod aike el rokui el bades. E ngera uchul? Ngmileketmokl el mo melisiich er a chad el mesuub el mo oker a ker e dirrek el rullii ngike el olisechakl el mo meduch el olisechakl. Sei a uchul me ngklou a ultutelel a dongetmokl er kid er a uchei er a bo dosuub. Ngklou a ultutelel a dolatk er tia el tekoi el kmo: Lak desal di mengedecheduch. Alta ngkmal soad el mesaod a Bades, engdi ngblechoel el ungil sel sekum e kede olengit er a chad el dosuub el obengkel me losaod er a uldesuel el kirel a bades. Sel bo dungil el ousbech a ker, e ngsebeched el ngosuir me bo el sebechel el di ngii el mo ungil el medengelii a belkul a bades.—Rel. 17:2.
6. Ngmekerang a dousbech er tia el babier sel (a) sekum a rechad a oumededenger el kirel a Dios me a Biblia? (b) doldingel a obliil? (c) domuchel a omesubel a Biblia sel leketenged el mengedecheduch er a chad? (d) deluut el mo oldingel er tirke el semeriar?
6 Tia el babier a di uai a bebil er a babilenged el dousbech el omuchel a omesubel a Biblia e le ngsebeched el merous er ngii er a ngii di el taem. A rebetok a mo dmeu a rengrir el ousbech er ngii el omuchel a omesubel a Biblia sel lekot el mengedecheduch er a chad. Ngdirrek el uai aike el mildung er a temel a klou el ongdibel, sel dousbech er ngii el mengedecheduch er a chad el mle semeriar e “ngrullid el mera el mo soad el lmuut el mo oldingel er tirke el semeriar.”—Momes aike el baks el ngar er a 5-7 el llel.
7. Ngmekerang a dousbech er tia el babier sel dosuub a Biblia?
7 Rolel a Dosuub el Obengkel a Chad: Ngsebeched el omuchel el oeak a donguiu aike el mechedelekelek el ker. E a uriul e monguiu aike el parakurab me aike el bades el ngar er a ulebengelel a parakurab. Mousbech a ungil el ker el mo olengeseu er a chad el mo ungil el medengei a belkul a bades. E a uchei er a obo er a ongingil el suobel, e molengit er a chad me longer er sel chedelekelek el ker me bo el sebechem el medengei el kmo ngmla mo medengelii tia el suobel me a lechub e ngdiak. Sel bo moldingel er ngii, e ngungil a lsekum e ke di mesaod er a di chimong er aike el mechedelekelek el ker. A cherengel a taem e ngmo sebechem el komengetii a suobel el mosuub er ngii.
8. Ngmekerang a domuchel el mesaod a bades, e ngera uchul?
8 Aike el bades el ngar er ngii a tekoi el “monguiu” el oeak uchei er ngii a onger aike el mechedelekelek el ker. Sel bo mosaod a bades e ngungil a lak mdu el kmo, “A apostol el Paulus a milluches el kmo” me a lechub e ke kmo “Ka momtab aika el lulemlaoch a Jeremia.” A chad a sebechel el mo omdasu el kmo ke menguiu a di tekingir a rechad. Ngbai ungil a molekoi el kmo, “A Tekingel a Dios a kmo” me a lechub e ke kmo “Ka momtab aika el lulemlaoch a Biblia.”
9. Ngkirel a rokui el bades el mechuiu sel dosuub?
9 Ngkired el menguiu a rokui el bades me a lechub e ngdi ike el ngar er ngii a “monguiu” er a uchei er ngii? Tiang a di mo ultuil er a blekeradel el omngar er ngii. A rokui el bades a mocholt e le ngar er ngii a ungil el uchul. A derta er ngii a olecholt a suobel el klou a ultutelel a dosaod. Engdi a lebebil er a taem e ngkired el di menguiu aike el bades el ngar er ngii a “monguiu” er a uchei er ngii, e le chad el dosuub el obengkel a diak a temel, diak el semeriar, me a lechub e ngdiak el sal meduch el menguiu.
10. Ngoingerang e ngmo sebeched el omuchel er a Biblia Olisechakl el babier?
10 Ngoingerang e Ngsebeched el Mo Omuchel er a Biblia Olisechakl el Babier: A uriul er a bla mosuub el kemanget el taem e ngmo sebechiu el mesuub er a Biblia Olisechakl el babier me a lechub e ko melemolem el mesuub er a Ungil Chais el babier el dimerekmo mrekir. Tirke el mesuub el obengkel a chad a sebechir el di tir el melilt el kmo ngoingerang e ngmo sebechir el mesuub er a Biblia Olisechakl el babier. Me a leuaisei, e ngkmal kired el omuchel er a uchelel tia el babier? Ngdiak a llach el kirel tiang, e le a derta el chad a kakerous a blekerdelir. Me nguaisei, engdi a ruumesingd el chad a mo ngmai a klungiolir sel lluut el mo dmolech el mesuub a osisiu el suobel el ngar er a Biblia Olisechakl el babier.
11. Ngera me ngkired el mo ungil el ousbech er tia el beches el babier?
11 Ngar tia el beluulechad el diak a kmal ungil chais er ngii, e ngar er ngii a klou el techelled el omerk er sel kot el ungil chais, el ngii a kmo a Rengedel a Dios a mengedereder e di kmedung e ngmo kutmeklii a beches el beluulechad el mui a llemalt er a chelsel. (Mt. 24:14; 2 Pe. 3:13) Ngmera el ulterekokl a rengud el kmo tirke el rongesii tia el ungil chais a mo kongei aika el tekoi el kmo: “Ng ua ngeral ungil a bo desa tal oderuchel el ngar a ikel rois el mei, el olab a ungil chais el chisel a budech! Ng ouchais er a klisiich e dmu er a Sion el kmo, ‘A Dios er kau a king!’” (Isa. 52:7) Me bo dousbech er tia el beches el babier el mo omesterir tirke el ngar er a basio el doldingel er ngii a ungil chais el mla er a Dios.
[Baks el ngar er a 5 el llel]
Sel Sekum a Rechad a Oumededenger el Kirel a Dios me a Biblia:
● Ngar er a bebil er a basio, e tirke el oldingel a metik el kmo sel dosaod er a “Dios” me a “Biblia” e ngmo chetirir a rechad el mengedecheduch. Sel bo dechelebangel a chouaisei el blekeradel, e ngungil a dosaod a kuk bebil er a tekoi er a beluu, el uai a uchul me ngusbechall a ungil el kabelment, kede mekerang e ngmai a ungil ngeso el kirel a telungalek me a ngera mo duubech er a ngar medad el taem. A uriul er a bla dongedecheduch er a chad el betok el taem el mesaod er a uchul me kede medengei el kmo a Dios a mera el ngar er ngii me a uchul e ngsebeched el oumerang er a Biblia, e ngsebeched el ochotii a Ungil Chais el babier.
[Baks el ngar er a 6 el llel]
Sel Doldingel a Obliil:
● “Ak mle oldingel er kau e le ngsoak el ochotii a beot el rolel e kede mo medengelii a moktek er a Dios el kirel a ngar medad el klebesei. Ngmla ta el molatk el kmo a Dios ngmo choroid a ringel el dechelebangel? [Mongiil er a nger er ngii.] Tia el babier a ochotii a nger er tia el ker er a Biblia. [Bsang a babier, e mchiuii sel kot el parakurab el ngar er a kot el suobel me a Jeremia 29:11.] Sel domes er tiang, e a omomdasu a Dios ngsoal a bo el ungil a klengar er kid er a ngar medad el klebesei? [Mongiil er a nger er ngii.] A lsoam, e ngsebechem el nguu tiang me ngbabilengem. Sel kluut el mei, e kede mo mesaod er sel ongeru el parakurab me bo dodengelii a nger er a Biblia el kirel tia el ker el kmo, ‘Ngmekerang a Dios e mo choroid aike el uchul e kede chuarm?’” A lsekum a chad a ngar er ngii a temel sel omkot el mengedecheduch er ngii, e ngsebechem el menguiu e mesaod er a ongeru el parakurab me aike el kldei el bades. Mketmeklii a taem el mluut el mong e mosaod er sel ongeru el ker.
● “A rebetok el chad a sorir el meluluuch, tokubets sel lebo er ngii a mondai er tir. Kau ke meluluuch a lebebil er a taem? [Mongiil er a nger er ngii.] A omomdasu e a Dios ngorrenges a rokui el nglunguuch, me a lechub e ngar er ngii a bebil er a nglunguuch el diak lodeuir a rengul? [Mongiil er a nger er ngii.] Tia el babier a olecholt a rolel e ngsebeched el metik a nger er a Biblia el kirel aika el ker. [Bsang a babilengel, e mosaod er sel kot el parakurab er a 12 el suobel e monguiu aike el bades.] Ngmera el ungil el tekoi e le Jehovah a kongei el orrenges er kid. Engdi a lsoad el ngmai a klungioled er a nglunguuch, e ngkired el mo ungil el medengelii a Dios. [Momiis el mo er a 2 el suobel e mocholt aike el mekekerei el dai.] A lsoam e ngsebechek el meskau tia el babier, e sel kluut el mei e ngsebeched el mo menguiu a nger er a Biblia el kirel aika el ker.”
● “Te betok a melatk el kirel aike el mo duubech el mei er tia el beluulechad. A omomdasu ngsebechel a blekeradel er tia el beluulechad el mo ungil? [Mongiil er a nger er ngii.] Te betok a mechas a rengrir el mo medengei el kmo a Biblia a meskid a ungil chais el uchul a omelatk. Aikakid a bebil er a ker el sebechel a Biblia el onger.” Bsang a babier, e molengit er ngii me lengiltii a ta er a ker el ngar er a ikrel tia el babier el lesemeriar er ngii. E sola e bo er sel suobel, e mochotii a rolel a dosuub. Mketmeklii a taem el bo mosaod er sel ongingil el ker el ngar sel suobel.
[Baks el ngar er a 7 el llel]
Domuchel a Omesubel a Biblia Sel Leketenged el Mengedecheduch er a Chad:
● “Ngsoak el ochotii er kau tia el beches el rolel a omesubel a Biblia. Tia el babier a ngar er ngii a 15 el suobel er a chelsel el olecholt el kmo ngar er ker er a Biblia a sebeched el metik a nger er a meklou a ultutelel el tekoi. [Mochotii a ikrel tia el babier.] Ke mla melasem el mo medengelii a Biblia? [Mongiil er a nger er ngii.] Aika el suobel a kmal beot a teletelel. [Mosaod er a kot el parakurab er sel ongedei el ker el ngar er a 3 el suobel, e mchiuii a Ocholt 21:4, 5. A lsekum e ngdi ungil, e mosaod er sel ongingil el parakurab me a bades el ngar er a ulebengelel a parakurab.] A lsoam e ngsebechek el meskau tia el babier. Ngsebeched el mesuub er a ta er aika el suobel el kot me a lsoam e ngsebechem el melemolem. Sel kluut el mei, e ngsebeched el mo mesaod er sel kot el suobel el di chimong a llel.”
[Baks el ngar er a 7 el llel]
Mochotii a Babier Sel Omluut el Mo Oldingel er Tirke el Semeriar:
● “Ngmera el dmeu a renguk el lmuut el mesekau. Ak ngiluu tia el babier el mei el ngii a meskid a nger er a Biblia el kirel a betok el ungil el ker. [Bsang a babilengel, e molengit er ngii me lesang a ikrel.] Ngera er aika el suobel a soam el mesaod er ngii? [Mongiil er a nger er ngii. E sola e momiis el mo er a suobel el lengileltii.] Me bo desa el kmo ngmekera e sebeched el metik a nger er ngii er a Biblia.” Mochotii a rolel a dosuub el oeak a omosaod er a tang me a lechub e ngteblo el parakurab me aike el bades el ngar er a ulebengelel. Tiang a beot el rolel e ngsebechem el omuchel a omesubel a Biblia. Bsang a chad a babilengel, e mketmeklii a taem el mluut el mong. Sel omrekir a suobel, e ngsebechem el mo mesaod er a ongingil el suobel el bla lengiltii me a lechub e ke omuchel er a uchelel tia el babier.