Rolel a Dousbech er a Babier el Te Rua Techang a Meruul a Soal a Jehovah er Chelechang?
Beches el Babier el Mileketmokl el Mo Olengeseu er a Remesuub a Biblia el Mo Medengelii a Cheldebecheled
1. Ngerang aike el edei el uchul e ngmleketmokl a Soal a Jehovah el babier?
1 Ke mla omuchel el ousbech er sel beches el babier el Te Rua Techang a Meruul a Soal a Jehovah er Chelechang? A moktek er ngii a (1) mo olengeseu er a remesuub a Biblia el mo medengelkid, (2) mo ngosuterir el mo medengei aike el tekoi el doruul, e (3) mo ocholt aike el loruul a cheldebecheled. Tia el Soal a Jehovah el babier a di mekedeb a suobel er a chelsel me ngsebeched el ousbech a eim el mo bedul a teruich el bung el mesaod sel bo demerek el mesuub.
2. Mosaod er a teletelel tia el babier.
2 Teletelel: Tia el babier a mesaod a kldei el kakerous el tekoi el kirel a cheldebechelel a Jehovah el ua aike el mildung er bab. A dai er a derta er aike el 28 el suobel a llechukl el ker, e aike el mechedelekelek el mekekerei el dai a onger er ngii. Ngar er ngii a siasing er a kuk betok er a 50 el beluu el olecholt er a klungel a ureor el doruul er ngii er a beluulechad el rokir. A betok er aika el suobel a ngar er ngii a baks el dai er ngii a kmo “Bo Modengei a Lmuut el Betok,” el mesaod a tekoi el sebechem el melisiich er a chad el mosuub el obengkel el mo meruul.
3. Ngmekerang a dousbech er a Soal a Jehovah el babier?
3 Rolel a Omousbech er Ngii: Ngsebechem el omuchel el oeak sel mochotii a dai er a suobel. E sel mdak el menguiu er a suobel, e mosaod aike el mechedelekelek el mekekerei el dai. E a uriul, e mosaod aike el omelekl el ker el ngar er a ulebengelel a suobel. Ngsebechem el chiuii a ta el suobel el rokir me a lechub e ke oudertelkib el menguiu e mesaod er ngii. Bo mungil el melilt aike el bades el bo monguiu. Lak mobes el mo mesaod aike el siasing me sel baks el “Bo Modengei a Lmuut el Betok.” Alta ngblechoel el kired el mesaod a suobel el ngar er a blechebechel, engdi a lsekum e ngar er ngii a tekoi el lesemeriar er ngii a chad, e ngsebechem el mo omes er ngii. El uai tiang, a lsekum e ngolekedang a ta er aike el meklou el ongdibel, e ngsebechiu el mo omes er a 11 el suobel.
4. Ngera me ngdmeu a rengum el kirel tia el beches babier?
4 Sel dosuub a Biblia el obengkel a chad, e kede olengeseu er ngii el mo medengelii a Demad el ngar er a eanged. Me nguaisei, engdi ngdirrek el kired el osisecheklii el kirel a cheldebechelel a Jehovah. (Osi. 6:20) Ngmera el dmeu a rengud el ngar er ngii tia el babier el rullii el mo beot er kid a meruul el uaisei.