Moutkeu er Tir!
1. Ngera el tekoi el mo duubech a meskid a ungil el techall el mo olecholt a ungil el omeruul, e ngera uchul?
1 A temel a Chedaol el Blsoil a meskid a kot el ungil el techelled el mo olecholt a ungil el omeruul el mo er a rechad. Ka molatk er tiang: Chelecha el rak e ngklou a techellel el mo kuk betok er a teruich el miliol el chad a mei er a Chedaol el Blsoil e mo orrenges a omesodel a eru el meklou el olechotel a bltikerreng el mleketmokl el okiu a olubet. (Jn. 3:16; 15:13) Te mo mesuub el kirel a klengeltengat el sebechir el ngmai el sengk er a Jehovah a uchul. (Isa. 65:21-23) Me nguaisei, engdi ngike el mo oltobed er a cheldecheduch a diak el di el ngii el tang a olecholt a ungil el omeruul el mo er a rechad. Tirke el rokui el ngar er a Chedaol el Blsoil a mo er ngii a techellir el meruul er tia el tekoi el oeak sel loutkeu er a rechad el mei.—Rom 15:7.
2. Kede mekerang e mo ungil el outkeu er tirke el mei er a Chedaol el Blsoil?
2 Ngungil a omolasem el mengedecheduch er tirke el ngar bita er kau er a bai di bo mdengchokl e mongiil el mo omuchel a prokuram. Tirke el mei er a Chedaol el Blsoil a locha sekemerur e dirrek el diak lodengei el kmo ngera mo duubech. Me sel lungil a klikm er kid e doutkeu er tir e te mo ungil a rengrir. Ngsebeched el oker er a chad el kmo ngmlei e le ngiluu a siotaikeng me a lechub e ngketengel el mei er a miting me a lechub e ngmedengelii a chad el ngar er a ongdibel. Ngdirrek el sebechem el olengit er ngii el mo dengchokl el obengkem e ko mousbech er a Biblia er kau me a blil a cheliteklem. A lsekum e kom ngar er a Blil a Ongdibel, e ngsebechem el olecholt aike el basio el ngar er a chelsel. A uriul er a cheldecheduch, e ngsebechem el onger a keril a lengar er ngii. A lsekum e ngkiriu el mereched el merael me bo el sebechel a kuk ta er a ongdibel el me soiseb, e ngsebechem el kmo: “Ngkmal soak el mo medengelii a uldesuem el kirel tia el prokuram, omomdasu e ngsebeched el lmuut el mo chadecheduch er a uriul?” E sola e ngsebechem el kutmeklii a taem el bo moldingel er ngii. A remechuodel a dirrek el kirir el mo kerekikl er tirke el mei er a Chedaol el Blsoil el tir a mla mo oudeleokl a omesiungir.
3. Ngera me ngklou a ultutelel a dolasem el mo outkeu er tirke el mei er a Chedaol el Blsoil?
3 A ruumesingd er a rechad el mei a ketengir el melechesuar er a deurreng, budech me a kltarreng el doldeu a rengud er ngii a rechedal a Jehovah. (Psa. 29:11; Isa. 11:6-9; 65:13, 14) Tirka el mei er a Chedaol el Blsoil ngmo ua ngera uldesuir? Tiang a di mo ultuil er aike el bo doruul sel doutkeu er tir sel lemei.