Mousbech er a Rolel a Cheldecheduch el Oureor
1. Ngera desuubii er a Rekristiano er a irechar el kirel a kakerous el rolel a dongedecheduch er a rechad?
1 A Rekristiano er a irechar a ulemerk er a ungil chais el mo er a rechad el kakerous a siukang me a klechelid er tir. (Kol. 1:23) Alta klemechir a mle osisiu el mesaod el kirel a Rengedel a Dios, engdi a rolel a lomerk er ngii a mle kakerous el oltirakl er a rechad el lulengedecheduch er tir. El uai tiang, a Petrus er a longedecheduch er a Rechijudea el tir a uleba klou el omengull el kirel a Bades, e ngulemuchel el melekoi a tekingel a profet el Joel. (Rel. 2:14-17) Engdi ka kuk momtab er a rolel a Paulus er a losaod a tekoi el mo er a Rechigrik el ngar er a Rellir 17:22-31. Chelecha el taem, e a rechad el ngar er a bebil el territory a oba omengull el kirel a Bades, me ngsebeched el mesaod er a Biblia el mo er tir sel doldingel a obliil. Me nguaisei, engdi nglocha kired el mo kerekikl sel dongedecheduch er a rechad el diak el semeriar er a Biblia me a lechub e ngklechelid me a lechub e te diak el Kristiano.
2. Ngmekerang a dousbech aike el babier el dorous el olengeseu er tirke el oba omengull el kirel a Biblia me tirke el kuk diak?
2 Bo Mungil el Ousbech er a Babier el Dorous er Ngii: Aike el babier el bo dorous er chelecha el rak er a omesiou a mo mengodech er a bek el eru el buil e mo mesaod a magazine, tract, me a brochure. A lsekum a rechad el ngar er a territory a diak el semeriar er a Biblia, e ngsebeched el mesterir a babier el mesaod a tekoi el lesemeriar er ngii. Me alta ngdiak donguiu er a Biblia sel dekot el mo mengedecheduch er a chad, engdi a lesemeriar e ngsebeched el lmuut el mong el mo ngosuir el mo omekeroul er a klaumerang er ngii er Ngike el Ulemeob me a Tekingel. Engdi a kuk domerk er a klumech er a basio el ngar er ngii a rechad el olecholt a omengull el mo er a Biblia, e ngsebeched el ousbech a babier me a rolel a cheldecheduch el ungil el kirir. Ngsebeched el mesterir a Biblia Olisechakl el babier me a lechub a Molengesenges er a Dios Me Bo Mkiei el Mo Cherechar el brochure er a ngii di el taem. Ngklou a ultutelel a dousbech er a rolel a domerk er a klumech el omeksemeriar er a chad el kirel a Jehovah.
3. Ngoeak a ngera el rolel e a rengrir a rechad el ngar er a territory a uai a chutem?
3 Mketmeklii a Chutem: A rengul a chad a di uai a chutem. (Lk. 8:15) A bebil el chutem a ousbech a klou el omengetmokl er a uchei er a bo lemukeroul a tane er a klemerang er a Biblia. A rumerk er a klumech er a irechar a mle sebechir el melalem er a bek el bedengel a chutem, e tiang a milsterir a klou el deurreng. (Rel. 13:48, 52) Kid me ngdirrek el sebeched el mo melechesuar er a osisiu el tekoi sel dekerekikl er a rolel a dongedecheduch er a rechad.