Ngsebechem el Mo Oldingel a Lekebesengei?
1. A doltirakl er a ta el chad el meluches a babier, e a apostol el Paulus nguleldingel a obliil er oingerang?
1 A doltirakl er a babier el Daily Life in Bible Times, e a apostol el Paulus a mle blechoel el oldingel a obliil el “omuchel er a 4 p.m. el mo lmuut er a kebesengei.” Ngdiak dodengei el kmo nguleldingel er a chouaika el taem me a lechub e ngdiak, engdi kede medengei el kmo ngmle soal el ‘meruul a tekoi el rokui el di kirel a Ebangkelio.’ (1 Ko. 9:19-23) E tiang a mle uldimukl er a longetmokl a tekoi el kirel el meruul, me bo loldingel er aike el taem el sebechel el mengedecheduch er a rechad.
2. Ngera uchul me ngungil a doldingel a obliil a lekebesengei?
2 Tirke el publisher el ngar er a betok el beluu a blechoel el mo oldingel a obliil a letutau. Me a leuasei, engdi tia ngungil el taem el sebechem el mo oldingel? A ta el pioneer a mesaod el kirel a basio el loldingel er ngii el kmo: “Ngkmal meringel a debetik er a rechad el ngar er a blai sel lemellomes. Engdi a ruumesingd el chad a ngar er a blai a lekebesengei.” A doldingel sel lekebesengei e ngmeskid a ungil el techall el mengedecheduch er a resechal el kirel a ungil chais. Ngar tiaikid el taem e a rechad er a blai a blechoel el mededaes e sorir el mengedecheduch. Me a lsekum e ngmo uchul a klungiaol a doruul el uaisei, e a remechuodel a kirir el kutmeklii a miting el kirel a odingel a lekebesengei.
3. Ngoeak a ngera el rolel e ngsebeched el olecholt a sekutaberreng sel doldingel a lekebesengei?
3 Mousbech a Sekutaberreng: A sekutaberreng a kmal klou a ultutelel sel doldingel a lekebesengei. El uai tiang, a lsekum ke mo oldingel e a chad a mechesang el omengur, e ngungil a omolekoi er ngii el kmo ke lmuut el mei er a uriul. E a lsekum e ngmla mo milkolk, e ngungil a bo mdechor er a basio el sebechel el mesekau e mouchais el kmo kau ke techang e ngera uchul me ke ngar sei. Ngdirrek el ungil a omoldingel el obengkel a ta er a chad me a lechub e ng group e mngar er a basio el kmard a light er ngii e diak di el kau el tang. Ngungil a lak bo meoud el mo oldingel me bo mongesang er a rechad er a blai sel bla bo el temir el mo mechiuaiu. (2 Ko. 6:3) Me a lsekum a hang el obo er ngii a kengaol sel bo lemilkolk, e ngungil a bo moldingel sel dirk lemellomes.—Osi. 22:3.
4. Ngera el klengeltengat a bo dengai sel doldingel a lekebesengei?
4 Klengeltengat el Bo Dengai: Kede mo dmeu a rengud er a omesiunged sel bo el sebeched el ousioning el mo er a rechad. E sel deblechoel el mengedecheduch er a rechad, e ngmo klou a techelled el olengeseu er a rebebil me “bo le sobel e bo lodengelii a klemerang.” (1 Ti. 2:3, 4) Kau ngsebechem el ngodechii a schedule er kau me bo mteloi er a odingel a lekebesengei?