Lmuut el Mo Ungil a Duch er Kid el Ngar er a Omesiunged—Olecholt a Klemeriarreng el Mo er a Rechad

A Uchul Me Ngklou a Ultutelel: A Jesus a ulemes er a rederta el chad, e ullecholt a bltikerreng me a klemeriarreng er ngii el mo er tir. El ua tiang, ngmla er ngii a ta el taem el Jesus a milechesuar a ta el mechad el chad el kora mle merur, me sera lomekungil er ngii e ngmirruul er tia el tekoi el cheroid er a osengir a rechad. (Mk. 7:31-35) Ngullecholt el kmo ngmillatk er a redisaiplo er ngii e mle medengei a chelitecheterir me ngdimlak losaod a betok el tekoi el mo er tir. (Jn. 16:12) Ngmo lmuut er a lengar er a deruchellel el ngar er a eanged, me a Jesus a ullecholt a klemeriarreng er ngii el mo er a derta el chad. (2 Ti. 4:17) Me kid el oltirakl er a Kristus a soad el oukerebai er ngii. (1 Pe. 2:21; 1 Jn. 3:16, 18) Kede dirrek el lmuut el mo ungil a duch er kid el ngar er a omesiunged sel dolatk er a chad er a blai e domtab er a blekerdelel a klengar er ngii, me aike el soal el tekoi, me aike el suebek a rengul er ngii. Nglocha mo kongei el orrenges er kid a lsekum e ngmelechesuar el kmo kid a diak di bo doldingel er ngii e le ngsoad el omerk er a klumech me a lechub e kede di omechei a babier, e kede bai omes er ngii e le kede kmal semeriar er ngii.

Rolel a Moruul er Ngii:

Bo mungil kltmokl e mchelellakl, e lungil a klikm er kau, e bo lungil a blekerdelem.
Bo mungil el omtab a blekeradel. Ngsebechem el mesa el kmo ngoungalek? Ngsoal melalem a dellomel me a lechub e ngar er ngii a chermel? Ngar er ngii a omesang el tekoi el kirel a klechelid el loumerang er ngii? Alta ngsebechem el ngodechii a uchelel a cheldechedecham el mo oltirakl er a blekerdelel a klengar er ngii.
Moker er a uldesuel, e bo mkerekikl el orrenges a longedecheduch e lak moleb a cheldechedechal el diak a ungil el uchul. Molemolem el omes er ngii el ochotii el kmo ke orrenges er ngii. Moureng a sulel el kirel a uldesuel, e a lungilbesul e mchetengii el mera el ngar er a rengum. Mongeroid er kau er a klaititekangel.
Bo beot el kongei a omelodech. A lsebechel, e mngedechii a cheldechedecham el mo mesaod aike el tekoi el suebek a rengul er ngii. Tiang a diak el meringel, e le babilenged el tract, brochure, me a magazine a mesaod a betok el kakerous el suobel. A lsekum e ke mlong er a mekngit el taem, el uai sel lemechesang, e mouchais er ngii e mkedebengii a cheldechedecham.

Molasem er Tiang er Chelecha el Buil:

Molasem a tekoi el bo molekoi sel bo moldingel er a temel a omengull el telungalek er kemiu. Me sel morael er a delongelel a obliil el oldingel, e mnguu a di telkib el taem el olengull, e molasem a tekoi el bo molekoi el obengkel a publisher el mdak me bo modengelii a rolel a omolodech a cheldechedecham el mo mesaod a tekoi el bo lolekoi a chad er a blai.
A lebebil er a taem er sel temel a miting er a odingel, e ngike el odam el oungerachel a sebechel el mesaod me a lechub e ngocholt a bebil er a rolel a dolecholt a klemeriarreng el mo er a rechad.