A Nglunguuch a Ngar Ngii a Lerellii er Kau

A Pamela a mlora ukeruul e le ngkmal mle oberaod a rektel. Me nguaisei, engdi ngdirrek el milluluuch el mora Dios el olengit a klisiich me bo el sebechel loutekangel er tia el meringel el blekeradel. Me a nglunguuch ngngilsuir?

Ngmesaod el kmo: “Sera kngar er a ukeruul el kirel a rektek el kasinoma, e ak mle blechoel lomelechesiu er ngak el di medakt. Engdi sel kululuuch el mora Jehovah el Dios, e ngmo chelellakl a renguk e mo sebechek el ungil omdasu. Ngdirk betok a ringelel a bedengek engdi nglunguuch a ngosukak el mo ungil a uldesuek. Me a rechad sel loker el kmo ak uangerang, e ak dmu el kmo, ‘Ngdiak el mesisiich a bedengek engdi ngdmeu a renguk!’”

Me nguaisei engdi ngdiak dongiil el mo chelebangel a meringel el blekeradel e bochu doluluuch. Kede rokui el mo chelebangel a meklou me a mekekerei el omelsemai e ousbech a ngeso el mo mesmechokl. A nglunguuch ngsebechel ngosukid?

A Biblia a melekoi el kmo: “Bsa RUBAK a berredem, e ng mo ngosukau. Ng kmal diak bo le bechere melemalt me bo lubuu.” (Psalm 55:22) Tia mera el mengelaod er kid! Me ngmekera nglunguuch e ngosukau? Sel omoluluuch el mora Dios el ngar er a melemalt el rolel, e ngmo meskau sel mousbech er ngii el mo outekangel a omelsemai.—Momes er a baks el “Aike el Sebechel a Nglunguuch el Meskau.”

Aike el Sebechel a Nglunguuch el Meskau

Budech er a uldasu

“Molengit er a Rubak er a bek el nglunguchiu, a ikel mousbech, . . . E a budech er a Dios, el diak el sebechel a chad el mo cherrungel el medengelii, a mo mtebechel a rengmiu ma uldesuiu el oltirakl er a Kristus Jesus.” (Filipi 4:6, 7) Sel mouchais er a Dios a tekoi el suebek a rengum el kirel e ngmo ngosukau el mo chelellakl a rengum e ungil melilt a tekoi alta ngoberaod a uldesuem.

Llomeserreng er a Dios

“A le ngar ngii er kemiu olengesonges er a llomeserreng, e lolengit er a Dios, me le bsang; ele Dios a ungil a tekingel el diak a le kiresii er a ngii di le chad.” (Jakobus 1:5) Sel dechelebangel a meringel el blekeradel e ngdiak deblechoel lungil melilt. Me a lsekum ke meluluuch lolengit a llomeserreng, e a Dios a sebechel ngosukau el lmatk a betok el ungil omellach el ngar er a Tekingel el Biblia.

Klisiich me a ongelaod

“Ng melisiich er tirkel mechitechut e mesulang.” (Isaia 40:29) A Jehovah el Dios a Olab a Bek el Klisiich me ngsebechel meskau a klisiich el mousbech el mo outekangel a omelsemai me a lechub e ngringel. A Biblia a dirrek el omekedong er a Jehovah el “Dios er a bek longelaod.” Ngsebechel mengelaod er kid er a “chelsel a ngiidil ringel.”—2 Korinth 1:3, 4, BT.

KE MO NGMAI A KLUNGIOLEM?

A Jehovah a diak lorrimel er kau el meluluuch el mo er ngii. Ngbai oeak a bltikerreng e mengemedaol er kau el mo meruul uaisei. (Jeremia 29:11, 12) Engdi ngmekerang a lsekum ke milluluuch er a ngar er a mong e dimlak lemonger a nglunguchem? Lak bo el mechitechut a rengum me a lechub e meterob. A rungil loungalek a locha diak bo lengesuterir a rengelekir el ngar er a rolel me a lechub e ngtaem el sorir a rengelekir. Te locha medengelii a lmuut el ungil rolel e te ngosuterir. Engdi ngulterekokl a ta el tekoi el kmo, te mo ngosuterir a rengelekir.

A Jehovah el Dios el ngike el kot el ungil loungalek a dirrek el soal ngosukau. Me a lsekum ke mo kerekikl el merriter aika el ulekrael el bla desaod e oltaut, e a Dios a mo onger a nglunguchem el ngar sel kot el ungil rolel!—Psalm 34:15; Mateus 7:7-11.