Ngera Oterekeklii a Ungil Klengar el Kirem er a Ngar Medad?

AIKE EL LOUMERANG A REBETOK

OMENGUIU EL BTUCH: A rebebil oumerang el kmo a blechebechel a btuch er sel taem er a lemechell a ngalek a oterekeklii el kmo ngmo uangera klengar er ngii er a ngar medal. Me te menguiu a horoscope le ngsorir el mo medenge tekoi el mo duubech me bo lsebechir moiub er a tellemall e mo ungil melilt.

FENG SHUI: A rekuk bebil oumerang el kmo a bo lungil a klengar er kid e ngkired el rullii a blid me a klokled el mo oltirakl er a diak lemeues el klisiich el omtebechel er a beluulechad. A Lo Winga el kiei er a Hong Kong a kmo, “A sensei er a feng shui a dilu el kmo ak llia ileakl el crystal er a ileakl el basio er a chelsel a stoang er ngak e ngmo ngosukak el korker a betok el udoud.”

OLTUUBLADEK: E ngar ngii a rebebil loumerang el kmo ngkirir el mengull er a remla mad el chederir me a lechub e ngkuk bebil chelid me bo lomekerreu e lomekngeltengat er tir. A Van el kiei er a Vietnam a melekoi el kmo: “A kuluumerang el kmo a kungull er a rebeldekek e ngmo ungil a klengar er ngak er chelechang e dirrek el mo oterekeklii a ungil klengar el kirek ngak me a rengelekek er a ngar medad.”

REINCARNATION: A rebetok oumerang el kmo a klengar a diak el lengemed. A chad a me ngar e mad e lmuut el mechell el ta er a bedengel e mad e lmuut el mechell e melemolem a blechebechel a klengar el uaisei. Te oumerang el kmo a ungil me a mekngit el bo lechebangel a chad a uaisei e le ngblekerdelel a klengar er tir er a uchei a uchul.

Me alta rekuk bebil a kmo te diak loumerang aika el tekoi, me nguaisei engdi te dirk mo omes er a remenguiu a chim, horoscope, Ouija^® board, remenguiu a kat, me a tekoi el uaikang. Te omdasu el kmo nglocha sebechel aikang el ngosuterir el mo medengelii a ngar medad.

AIKANG NGMERA EL SEBECHEL NGOSUKID?

Tirke el oumerang aikang te mla metik er a ungil klengar e mla oterekeklii a klengar el kirir er a ngar medad?

Molatk er a Hào el ngii a kiei er a Vietnam. Ngika mlo ousbech a omenguiu el btuch, feng shui, me a omengull er a rebladek el mo omekrael er ngii. Ngmle sebechel ngosuir? A Hào a melekoi el kmo: “A kurriid a betok el udoud, mlo blals, dilubech a mondai er a telungalek er ngak, e kmal mlo depressed.”

A Qiuming el chad er a Taiwan a dirrek el uluumerang a omenguiu el btuch, reincarnation, oltuubladek, me a mesisiich el reng el mla oterekokl a rokui el tekoi. A uriul er a bo lungil merriter aika el tekoi e ngdilu el kmo: “Ak mlo mtebengii el kmo aika el osisechakl a kmal kebosech e dirrek el rullid el kmal mo rrau a rengud. Ak milsa el kmo aike el lulemlaoch a btuch a mle blechoel klsuul. E a doltirakl er a osisechakl er a reincarnation, e ngmekera sebechem el ngodechii a klengar er kau er chelechang me bo lungil a klengar er kau er sel kuk ongingil a lsekum e ngdiak modengei a tekoi el dilubech er sel uleak uchei el klengar er kau?”

Me a Hào, Qiuming, me a relmuut el bebil a mla mo mtebengii el kmo a klengar er a ngar medad a diak loltirakl er a mesisiich el reng, btuch, rultuubladek, me a reincarnation. Me tia ngbelkul a kmo ngdiak a klisiched er a klengar er kid el kirel a ngar medad?

A rebetok a omdasu el kmo a ngarbab el skuul me a kerruul a oterekeklii a ungil klengar er a ngar medad. Ngera dilubech el mora rebebil el oumerang el uaisei?