A Jehovah Ngilsukemam el Mo ‘Meloseb er Sel Ki Mdelalem er Ngii’

A Mats me a Ann-Catrin Kassholm a mlora skuul er a Gilead er a 1979 e a chelsel aika el betok el rak e ngmla mo betok el taem el “lemedalem” me a lechub e te assign er tir el mo mesiou el ngar er a beluu er a Iran, Mauritius, Myanmar, Tanzania, Uganda, me a Zaire. Ngar er a Gilead e te rirengesii a Jack Redford el ta er a sensei el melekoi er tia el advice el ngii a ngilsuterir er a “lemedalem,” “lemetecheb,” e lluut el “medalem” el betok el taem. Hall e lesodii.

Mats, ka ba kot e mouchais er a rolel e ke mlei er a klemerang.

Mats: A demak a kiliei er a Poland er a Ongeru el Mekemad e miles a betok el cheleblad el omeruul el lurruul a ikelesia er a Katolik. Me nguaisei engdi ngmle blechoel el melekoi el kmo, “Ngulterekokl el ngar ngii a klemerang el klechelid er a kmung ker.” Cherengel a taem ak mlo metik el kmo ngklemerang a tekingel. Ak milechar a betok el used el book el bo kunguiu. A ta er ngii a mle mellemau a chiro er ngii el dai er ngii a kmo, A Klemerang el Choitikikid el Mora Klengar. Ngkmal miltab osengek er a dai er ngii me sel kesus er ak nguu e ak chiliuii el rokir. Seikid el tutau ak mlo medengei el kmo ak mla metik er a klemerang!

Ngulemuchel er a April 1972 e ak milenguiu a lmuut el betok el babier el loltobed a Resioning er a Jehovah e miltik a nger er a kerik el kirel a Biblia. Ak mlo feel el ua ngike el chad er omsaso el klalo er a okesiu er a Jesus er sera lebetik er a ngisel a chesiuch e ngulterau a rokui el kloklel e mecherar. Ak “ulterau” a telbilek el mora daingak e mo toktang me bo lsebechek el mecherar a “ngisel a chesiuch” er a klemerang el bla kbetik er ngii. (Mt. 13:​45, 46, BT) Ak miltecholb er a December 10, 1972.

Chelsel a ta el rak e a rechad er a blik me a ochellek a dirrek el kilengei er a klemerang e miltecholb. E a July 1973 e a kulemuchel el regular pioneer. Ngmla er ngii a ta el ungil el redil el kmal mle betik a rengul er a Jehovah e dirrek el ta er a pioneer el ngklel a Ann-Catrin. Aki mle fall in love e mlo bechiil er a 1975. Chelsel aike el ongingil eua el rak e aki kiliei er a Strömsund, el klebokel el basio er a Sweden el rebetok el chad er ngii a mle sorir el mesuub er a Biblia.

Ann-Catrin: A demak a silubii a klemerang er a mo ulebongel er a skulel er a daingak er a Stockholm. Ngdirk mle edei el buil a klungek er tiakid el taem engdi ngulebekak el ngar er a miting me a odingel. A delak a kmal dimlak el soal tia el tekoi me ngmillasem el prove el kmo a Resioning a cheleuid. Engdi ngkmal dimlak el sebechel ngbai cherengel a taem e ngmiltecholb. Sera lebo el 13 a rekik e ak miltecholb e a lebo el 16 a rekik e a kulemuchel el pioneer. Ak mlo mesiou er a Umeå el beluu lousbech a ngeso er a ruumerk er a klumech e a uriul e ak mlo special pioneer.

Uriul er aki bo bechiil e ngkmal mlo dmeu a rengmam el ngosuterir a rebebil el mo suubii a klemerang. A ta er tir a ngeasek el redil el ngklel a Maivor el ngii a chilitii a klengar er ngii lousekool a sports e mlo pioneer partner er a merrengek. Te mlora skuul er a Gilead er a 1984 e mesiou el missionari er a beluu er a Ecuador.

Ko milekera oltirakl er a advice el “moloseb er sel omdelalem er ngii” er a chelsel aika el kakerous el assignment er kemiu el missionari?

Mats: Te mle blechoel melecheb e “lmuut el melalem” er kemam er a beches el assignment. Engdi aki mle blechoel el melasem el ‘lomak a risam’ er a Jesus loeak aki bora tkurrebab el sebecham loukerebai er ngii tokubets a klengariourreng er ngii. (Kol. 2:​6, 7, BT) El ua tiang, ngdimlak ki molasem el meruul er a re local el odam me a odos el mo oltirakl a rolam aki bai millasem el mo medengei a uchul me te mirruul a tekoi el uaisei. Ngmle soam el mo understand a siukang er tir me a rolel a lomdasu. Sel ki moukerebai er a Jesus e ngmle sebecham el mo omelechesiu el kmo aki delalem er a tkul omoachel e sebecham el meloseb er a ngii di el basio el le assign er kemam el mo er ngii.—Psa. 1:​2, 3.

Ann-Catrin: A lluut el mukeroul a kerrekar el metecheb e lmuut el medalem e ngousbech er a dichel a sils. A Jehovah mla meketeklii el kmo ng “sils” er kemam. (Psa. 84:​11, NW) Ngmla meskemam a mekeald el bltikerreng er a rudam me a rudos er a klereng. El ua tiang, ngar er a kekerei el ongdibel er kemam er a Tehran er a beluu er a Iran, e a rudam me a rudos a kmal mle bekururau e blechoel el omtechakl er a rechad. Ngmekltkam er a rolel e tirke el ngar er a Biblia ulemetechakl er a rechad. Ngkmal mle somam el di kiei engdi a July 1980 e a urerir a Resioning er a Jehovah blo lorrob er ngii a beluu, me te milsekemam a eru el klebesei el mo tuobed er tia el beluu. Te mle reassign er kemam el mora Zaire (el chelechang e ngokedongall el Congo) er a beluu er a Africa.

Sera kkot el mo medengei el kmo aki mora Africa e ak di lilangel. Ak mle medakt a bersoech me a rakt el krirenges el kirel a Africa. Engdi reteru el kmal kmeed el sechelimam el mla mesiou er a Africa el betok el rak a dilu er kemam el kmo: “Kemiu a dirkak a ta el obo er tia el beluu! Bsa chance a Africa. Ngkmal mo somiu ngii el beluu.” E mera el uaisei. A rudam me a rudos er a Africa kmal oubltikerreng e kangingai. Me sera bo lorrob er a urered e bocha el kiram el choitii a Zaire er a 6 el rak er uriul, e ak mle smile e le kmlo metik er ngak er chelechang el meluluuch el mora Jehovah el melekoi el kmo, “Please ki di mkiei er a Africa.”

Ngera el klengeltengat obla mngai er aika el mereko el rak?

Mats: Aki mla mak a kmeed el klausechelei er kemam lobengterir a remissionari el chad er a kakerous el beluu. Dirrek el ngar er a bebil assignment er kemam e aki milsuub a Biblia lobengterir a rebetok el chad el lebebil e a ta el chad a mesuub lobengterir a re 20 el chad! Ngdirrek el kmal diak kubes er a bltikerreng er a rudam me a rudos er a Africa me a rolel a lomtechakl. Aki mle blechoel el bad er a van er kemam sel ki moldingel ongdibel me a rudam me a rudos alta te kmal chebuul engdi te ulterekeklii el kmo ngmla er ngii a rokui el ki mousbech. (2 Ko. 8:3) A story time a ta er a tekoi el kmal mle ileakl er a rengmam. Tia sel taem er a ulebengelel a derta el sils, el ngak me a Ann-Catrin a mo dengchokl e mesaod er a sils er kemam e mereng a sulel a Jehovah le ngii el obengkemam.

Ann-Catrin: A kuk denguu er ngak e ngtia el techall el mle sebechek el mo medengelterir a rudam me a rudos el meliuekl er a beluulechad el rokir. Aki siluub a beches el lomelekoi el ua Farsi, French, Luganda, me a Swahili e mlo medengei a kakerous el siukang. Aki ullengeseu el train er a rebeches el odam me a odos, milak a ungil klausechelei, e uluureor el “kaukledem” el mesiou er a Jehovah.—Sef. 3:​9, NW.

Aki dirrek el miles a betok el klebokel el blebelel a Jehovah. A derta el taem el ki mkilengei er a beches el assignment er a omesiou e aki mle feel el kmo aki ngar omerael e a Jehovah a Guide er kemam. Ngmilskemam a tekoi el dimlak el sebecham el di kemam e ngmai.

Ngera el omelsemai oblo mchebangel e ngera ngilsukemiu el outekangel?

Mats: A lebebil aki ngmai a rakt el ua malaria. A Ann-Catrin a mle kirel mora bebil el botk el dimlak ki em expect. Aki dirrek el mle bekikl el kirir a rechad er a blimam el mechudelang. Me aki kmal oba omereng el saul el kirel ochellek me a ruchedal me a merrengel a Ann-Catrin el ulemekerreu er tir. Te ulemekerreu er a rechad er a blimam loba kllourreng, deurreng, me a bltikerreng. (1 Ti. 5:4) Me nguaisei alta aki mirruul a rokui el sebecham el olengeseu, engdi kemam el kiei el kmal cheroid a uchul me a lebebil aki mo oldechelakl er a rengmam le ngdiak el sebechemam el meruul a lmuut el betok lolengeseu er tir.

Ann-Catrin: A 1983 er aki mosiou el ngar er a Zaire e ak mlo imis el smecher er a cholera. A toktang a dilu er a Mats el kmo, “Mnguu er chelecha el taem el tuobed er tia el beluu!” A bo lekukuk e aki ngilasech er a skoki loltak a klalo e dimlak el rruul loltak er a rechad engdi tia di mle ta el rolel e ngsebecham el mora Sweden.

Mats: Aki mlo omdasu el kmo tia ulebengelel a omesiungam el missionari, me aki kmal lilangel. Engdi alta toktang ulemdasu el kmo a Ann-Catrin a diak el sebechel mo ungil, ngmlo mesisiich. A ta el rak er uriul e ngmle sebecham el lmuut el mora Zaire, el mo mesiou er a kekerei el ongdibel er a Lubumbashi el melekoi a tekoi er a Swahili.

Ann-Catrin: Sera ki mngara Lubumbashi e ak mlo dioll engdi ngmilengai a ngelekam. Me alta ngdimlak ki molatk a mo oungalek, engdi ngkmal mlo mekngit a renguk er a lemad a ngelekam. Temel tia el taem er a klengiterreng e a Jehovah milskemam a sengk el dimlak ki em expect er ngii. Aki miluchel a kmal betok el study. Ngdirkak el bo el ta el rak e a ongdibel el mle 35 a rechad er ngii a mlo 70 a re publisher er ngii me a rechad el mlei er a miting a mle 40 e ngmasech el mo 220. Aki kmal mle mechesang er a berkel a klumech me a Jehovah ulemekngeltengat er kemam. Tia milengelaod er ngak. Me nguaisei engdi aki blechoel el melatk e mesaod el kirel a ngelekam. Aki kmal lomes el beduluchei el mo er sel taem el Jehovah mo omekungil a rokui el ringelel a rengud.

Mats: Ngar ngii a taem el Ann-Catrin a kmal mlo mechitechut e mesaul a bedengel. Osisiu el taem e ak miltik el kmo ng stage-four el kasinoma a colon er ngak. Engdi chelecha el taem ak mla mo daijob me a Ann-Catrin a meruul aike el rokui el sebechel.

Aki mla mo mtebengii el kmo ngdiak di lekemam el tang a ngar ngii aki moutekangel. Uriul er sel klou el omekoad er a rechad el mla er ngii er a Rwanda er a 1994 e aki mlo oldingel er a rebetok el odam me a odos el kiei a refugee camp. Aki milsa klaumerang er tir me a ducherreng er tir me tir el ulemetechakl alta te kiliei er a kmal meringel el delengchokl. Tia ulsisecheklemam el kmo a Jehovah ngar ngii a klisichel loltekau er a rechedal er a chelsel a ngii di el ringel.—Psa. 55:22.

Ann-Catrin: Ngar ngii a lmuut el ta er a ringel el dilubech er a ki bora dedication er a branch er a Uganda er a 2007. A uriul er a prokuram e kemam el 25 el missionari me a re Bethelite a dilak el ngar er a bus el mora Nairobi, Kenya. Uchei er aki bora border er a Kenya e ngmla er ngii a torak el siliseb er a lane er kemam el tuchelemam. Ngdi mlad ngike el ulemekall me a reteim er a resechelimam. A chimo er a odos a mlad er a osbitar er a uriul. Aki kmal lomes el beduluchei el lmuut el mo meseterir!—Job 14:​13-15, NW.

Ngmlo mechubs a telemellel a bedengek engdi ngak me a Mats me a relmuut el bebil el mla er tia el bus a blechoel el mo chuarm er a sebekreng me a ringelel a uldasu el tia el accident a uchul. A denguu er ngak e aika el sebekreng me a ringelel a uldasu a me subechii er ngak sel kmechiuaiu a leklebesei. Ak blechoel mekiis el renguk ak mo heart attack. Tia demedakt er ngii el blekeradel. Engdi a blakerreng er kemam el meluluuch el mora Jehovah me a ongelaod el ki mngai er aike el kot el somam el bades a ngilsukemam loutekangel. Aki dirrek el mlo omes er a retoktang el tir a specialize aikang e tia dirrek el kmal ngilsukemam. Chelechang e ngmla mo sebecham el manage aika el symptoms er kemam. Aki meluluuch lolengit er a Jehovah me lengesukemam el mengelaod er a rechad el dirrek el chuarm er a chouaisei el tekoi.

Kemiu sera omosaod er a rolel e kom uluutekangel aika el meringel el blekeradel, e kom dilu el kmo a Jehovah “ngilikemam el ua chemadech el ngais.” Tia ngngera belkul?

Mats: Tia el tekoi a mengai er a belkul a tekoi er a Swahili el kmo “Tumebebwa kama mayai mabichi,” me a lechub ng “Te ngilikemam el ua chemadech el ngais.” Ngdi ua chad el kerekikl sel lengai a chemadech el ngais me lak lobeu, a Jehovah mla oba bltikerreng el support er kemam er a derta er aika el assignment er kemam. Ngblechoel el ngar ngii aike el ki mousbech, nglmuut el betok er aike el ki mousbech. A ta er a rolel e aki mla omelechesiu er a bltikerreng me a support er a Jehovah a oeak a klechubechub el bla lochotii a Governing Body el mei er kemam.

Ann-Catrin: Ngsoak louchais er a ta er a olechotel a support er a Jehovah el mei er kemam. A ta er a klebesei e aki ngiluu okedong el kmo a demak el ngar er a Sweden a kmal smecher me ngngar er a ICU. A Mats a dirk mlo ungil er a malaria me kemam a diak el sebecham el afford el mo remei. Me aki millib a mo olterau er a mlimam. Engdi aki ngilai a lmuut el teblo el okedong. A ta er ngii a mlara obekel el rirenges el kirel e mle sorir el harau er a chimo er a ticket er kemam. Sel kuk tang a mlara chudelang el odos el mle save a udoud er a baks el label er ngii a kmo, “Mora chad el lousbech a ngeso.” Ngdi mle chelsel a sesei el bung e a Jehovah ngilsukemam!—Heb. 13:6.

Sel molatk aika el betok er a 50 el rak el mngar er a mui el taem el omesiou e ngera ko mla suub?

Ann-Catrin: Ak mla suubii el kmo a bo demesisiich e ngkired el ‘di chelellakl el oumeral ulsirs’ er a Jehovah. Sel doumerang el ulsirs er a Jehovah e ngmo nguu a klakoad er kid el mo klakodil. (Isa. 30:15; 2 Kr. 20:​15, 17) Kemam el mla mesiou er a Jehovah el mo er sel tkurrebab el sebecham el ngar er a derta el assignment er kemam a uchul me aki mla ngmai a betok el klengeltengat el dimlak ki bo mngai a lsekum aki mirruul er a kuk ta er a tekoi.

Mats: Sel kot el klou a ultutelel el tekoi el bla ksuubii a mo oumerang el ulsirs er a Jehovah er a chelsel a rokui el tekoi e mo omes er a rolel e ngmo ngosukak. (Psa. 37:5) Ngdirkak a ta el loietii a tekingel el kmo ngmo ngosukak. Aki dirk omes er ngii lolengeseu er kemam er a assignment er kemam er chelechang er a Myanmar.

Ngomeltkam el kmo a rebetok el mekekerei el sorir el menglou er a omesiungir bo le experience er a diak lemengodech el bltikerreng el Jehovah mla ochotii el mei er kemam. Ngkmal ulterekokl a rengmam el kmo te mo chormii okmo te mecherei a Jehovah me ngrulleterir el mo meloseb er a ngii di el basio el bo lemedalem er ngii.