Olengeseu er Tirke el Dirkak Bo el Sebechir el Mesuub er a Biblia Olisechakl el Babier

1. A rokui el chad te di kot e sorir el mesuub er a Biblia Olisechakl el babier? Mosaod.

¹ A lsekum a chad a mo mesiou er a Jehovah, e ngkmal kirel el mesuub aike el lolisechakl a Biblia. Me nguaisei, engdi te ngar er ngii a rechad el chedal a klechelid el diak el Kristiano e diak lomes er a Biblia el kmo ng Tekingel a Dios. A rebebil a kuk diak loumerang er a Dios e diak a omengull er tir el kirel a Biblia. Ngera el babier a mla ngosuterir a chouaitirka el chad el tir a dimlak el lekengei el mesuub er a Biblia Olisechakl el babier? Aika el ulekrael el bo dosaod a mengai er a tekingir a rumerk er a klumech el kiei er a bekord el 20 el kakerous el beluu.

2. A lsekum a chad a dmu er kid el kmo ngdiak loumerang er a Dios, e ngera kired el mo medengei, e ngera uchul?

² Tirke el Diak Loumerang er a Dios: A lsekum a chad a kmo ngdiak loumerang er a Dios, e ngungil a bo dodengei el kmo ngera uchul. Ngika el chad ngoumerang el kmo kede mla er a mongkii el mei? Ngmla mo diak loumerang er a Dios e le ngchelebirukel el omeruul el lomes er a beluulechad me a cheleblad er a klechelid? Ngika el chad ngkiei er a beluu el merrob er a rechad me te diak loumerang er a Dios? Alta ngdiak el mesisiich sel uldesuel el kmo ngdiak a Dios, engdi ngdiak lomdasu el kmo ngkirel el oumerang er Ngii. A rebetok el omerk er a klumech a mla metik el kmo sel loker el kmo, “Kau ngmeketeketang el momdasu el uaisei?” e ngrullii a chad el mo soal el mesaod er a uldesuel. Ngungil a omorrenges e lak mongedecheduch. E le sel bo dodengei el kmo ngera uchul me a chad a diak loumerang er a Dios, e kede mo medengei el kmo ngmekerang a donger er ngii me a ngera el babier a bo dousbech.​—Osi. 18:13.

3. Kede mekerang e olecholt a omengull el mo er a chad me a tekoi el loumerang?

³ Sel omonger er a chad, e bo mkerekikl me lak mrellii a chad el mo omdasu el kmo ke omtok er a uldesuel. Tiakid el ulekrael a mla er a Merikel el mei el kmo: “Ngklou a ultutelel a molecholt a omengull el kirel sel llemeltir a rechad el melilt el kmo ngera te mo oumerang er ngii. Me ngungil a molilt a ker el meruul er a rechad el mo omdasu e di tir el mo medengelii a tekoi, er a bai molasem el mo kats er a klauteketok.” A uriul er a lorrenges er a chad er a blai el mesaod er a uldesuel, e a ta el odam el oldingel a ongdibel a blechoel el oker el kmo “Ngmla ta el molatk el kmo tia el tekoi nglocha klemerang me a lechub e ngdiak?”

4. Kede mekerang e ngosuterir a rechad el oumerang er a Buddha?

⁴ A rechad el oumerang er a Buddha a diak lodengelii a Dios. A rebebil el omerk er a klumech el ngar er a beluu er a Britain a ousbech er a brochure el Lasting Peace and Happiness​—How to Find Them sel longedecheduch er a chouaitirka el chad. A uriul er a losaod er a uchelel tia el babier, e te mo mesaod er sel suobel el ngar er a chelsel el dai er ngii a “Is There Really a Most High Creator?” me a dirrek el “A Guidebook for the Blessing of All Mankind.” A uriul e nglocha mo sebechir el ochotii a Biblia Olisechakl el babier e dmu el kmo, “Me alta e ngdiak moumerang er a Dios, e ngdi a omesubel a Biblia a klou a ultutelel e le ngar er ngii a ungil el ulekrael el ngar er a chelsel.” A ta el pioneer el ngar er a Merikel el mesiou el ngar er a basio el ngar er ngii a rechad er a Sina a kmo: “A rebetok el ngar er a territory er kemam a sorir el menguiu. Me te blechoel el chiuii a babier el rokir er a uchei er a ki mluut el mo oldingel er tir. Engdi nglocha diak lodengelii sel uldasu el kirel a omesubel a Biblia. Me ngsoak el omesterir sel brochure el Ungil Chais sel leketengek el mengedecheduch er a rechad e le ngmileketmokl el mo melisiich er a rechad me te otobed a uldesuir.” A ta el odam el oldingel a ongdibel el mesiou aike el ongdibel el melekoi a tekoi er a Sina el ngar er a Merikel a melekoi el kmo ngkmal sebeched el ousbech er a Biblia Olisechakl el babier sel dekot el mengedecheduch er a chad. Me nguaisei, engdi nglocha ungil a omomuchel el mesuub er a 2 el bliongel el mesaod er a Biblia, er a bai momuchel er a 1 el bliongel el mesaod el kirel a Dios.

5. Ngera uchul me ngkired el mo oba kllourreng?

⁵ A chad a ousbech a taem el mo meleketek er a klaumerang er ngii er a Dios, me ngkired el mo oba kllourreng. Sel dekot mengedecheduch er a chad e nglocha diak lerellii el mo kongei el kmo ngar er ngii a Ulemeob. Engdi nglocha mo er ngii a taem e ngkongei el kmo nglocha ngar er ngii a Ulemeob, me a lechub e ngkmo ngmedengelii a uchul me a rebebil a mo omdasu el uaisei.

6. Ngera uchul me a rebebil el chad a diak lesemeriar er a Biblia?

⁶ Tirke el Diak Lesemeriar me a lechub e Ngdiak a Klaumerang er Tir er a Biblia: Me nguaisei, engdi a oumesingd el taem e a chad el medengei el kmo ngar er ngii a Dios a diak lesemeriar el kirel a osisechakl er a Biblia e le ngdiak loumerang el kmo ng Tekingel a Dios. Ngika el chad a locha kiei er a basio el diak a Rekristiano er ngii e omes er a Biblia el ta er a telengtengil a klsuul klechelid. Ngdirrek el locha kiei er a basio el ngar er ngii a rechad el leko te Rekristiano er ngii el di melisiich a tekoi er a kerruul me nglocha mo diak lomdasu el kmo ngousbech er a Biblia. Kede mekerang e ngosuterir a choua tirka el chad el mo omekeroul er a klemeriarreng er tir er a Biblia e bo lekengei el mesuub er a Biblia Olisechakl el babier?

7. Ngerang a ungil el rolel e kede melisiich er a chad el mo semeriar er a Biblia?

⁷ A branch office el ngar er a Gris a milluches el kmo: “Sel kot el ungil el rolel e kede olengeseu er a rechad el diak el semeriar er a Biblia a oeak sel dochotii el kmo ngera ngar er a chelsel. A rebetok el omerk er a klumech a mla mesa el kmo a klumech el ngar er a Biblia a lmuut el mesisiich er a ngii di el tekoi el bo lolekoi e le ngar er ngii a lerellii er a rengul a chad. (Heb. 4:12) A rebetok el chad el mla mesa ngklel a Dios el ngar er a Biblia a mla mongeseu el mo omekeroul er a urungulir el mo blak a rengrir el mesuub er a Biblia.” A branch office el ngar er a India a milluches el kmo: “A klemerang el kirel a klengar me a kodall a mera el lesemeriar er ngii a rechad er a Hindu. Te dirrek el semeriar er a telbiil el ngar er a Biblia el kirel a beluulechad el diak a omengetukel er ngii.” A rumerk er a klumech sel losaod el kirel a mondai el lechelebangel a rechad er a beluu el lengar er ngii, e ngblechoel el mesterir a techall el mo olecholt aike el lolekoi a Biblia el kirel aike el bo loruul a Rengedel a Dios el mesmechokl a tekoi.

8. Ngera sebeched el melekoi el mo er tirke el diak el ungil a osengir el kirel a Biblia e le ngtirke el leko te Kristiano a uchul?

⁸ A lsekum a chad a diak el ungil a osengel el kirel a Biblia e le ngtirke el leko te Kristiano a uchul, e ngungil a mouchais er ngii el kmo tirke el leko te Kristiano a mla choudur a Biblia me aike el lolisechakl. A branch office el ngar er a India a milluches el kmo: “A lebebil er a taem, e ngkired el ngosuterir a rechad el mesa el kmo aika el ikelesia a diak el ungil el omekerreu er a Biblia.” Te uluuchais el kmo a rechad er a Hindu a blechoel el mechas a rengrir er a suobel 4 er a brochure el What Is the Purpose of Life? How Can You Find It?, el mesaod a rolel e aika el ikelesia a mla kikingelii e tomellii a Tekingel a Dios. A ta el pioneer el ngar er a Brazil a dmu er a rechad el kmo: “Ngungil a bo modengei a lmuut el betok el kirel a Biblia. A rebetok el chad a kongei el mesuub, engdi ngdiak el belkul a kmo te mocha chedal tia el klechelid. Ke locha mo mechas a rengum er aike el tekoi el bo msuub.”

9. Ngera uchul me ngdiak el kirel el mo mechitechut a rengud a lsekum a chad a di kot e ngdiak lesemeriar aike el lolisechakl a Biblia?

⁹ A Jehovah a omes a rengrir a derta me a derta el chad. (1 Sa. 16:7; Osi. 21:2) Ngomekrael er tirke el melemalt a rengrir el mo er a mera el omengull. (Jn. 6:44) A rebetok er tirka el chad a dimlak a ta el lemosisechakl el kirel a Dios e dimlak el sal medengelii a Biblia. A omesiunged a mesterir a techall me “bo le sobel e bo lodengelii a klemerang.” (1 Ti. 2:4) Me nguaisei, engdi a lsekum a rebebil a di kot e ngdiak el semeriar aike el lolisechakl a Biblia, e lak bo lemechitechut a rengum! Mousbech a kuk bebil er a babier el mo omeksemeriar er tir. Cherengel a taem, e ngmo sebechem el mo omuchel el ousbech er sel babier el dousbech er ngii el olisechakl er a rechad el kirel a Biblia, el dai er ngii a kmo Ngerang Mera el Lolisechakl a Biblia?

[Baks el ngar er a 4 el llel]

A lsekum a chad er a blai a dmu el kmo ngdiak loumerang er a Dios, e molasem er tiang:

• Moker el kmo, “Kau ngmeketeketa el moba tia el uldasu?” me bo modengelii a uchul.

• A lsekum e ngchad el oumerang er a Buddha, e mousbech er a brochure el Lasting Peace and Happiness​—How to Find Them, el ngar er a 9-12 el llel.

• A lsekum e ngoumerang el kmo kede mla er a mongkii el mei, e aika el babier a sebechel el ngosukau:

A Awake! el babier el dai er ngii a kmo “Was it Designed?”

A video el dai er ngii a kmo The Wonders of Creation Reveal God’s Glory

Brochure el dai er ngii a kmo A Satisfying Life​—How to Attain It, suobel 4; Was Life Created?; me a The Origin of Life​—Five Questions Worth Asking

• A lsekum e ngmla mo diak loumerang er a Dios e le ngchelebirukel me a ringel a uchul, e aika el babier a sebechel el ngosuir:

Babier el Is There a Creator Who Cares About You?, 10 el bliongel

Brochure el Does God Really Care About Us?, suobel 6, me a What Is the Purpose of Life?, suobel 6

• Ngsebechem el mo ousbech er a Biblia Olisechakl el babier sel bo lomdasu el kmo a Dios a locha mera el ngar er ngii. Nglocha ungil a momuchel el mesuub er a 2 el bliongel me a lechub e ngta er a suobel el ungil el kirel.

[Baks el ngar er a 5 el llel]

Molasem er tiang a lsekum a chad er a blai a diak loumerang er a Biblia:

• Momes er a 17 me a 18 el bliongel er a babier el Life​—How Did It Get Here? By Evolution or by Creation?

• Sel mongedecheduch er a rechad er a Hindu, e mousbech er a brochure el Why Should We Worship God in Love and Truth?

• Sel mongedecheduch er a rechad er a Judea, e mousbech er a brochure el Will There Ever Be a World Without War?, 3-11 el llel.

• Mosaod a klungiolel a doltirakl a omellach er a Biblia. Aike el babier el sebechem el ousbech el mo olecholt er a klungel a ultutelel a Biblia a:

Awake! el babier el mesaod er a suobel el “Help for the Family”

Video el The Bible​—Its Power in Your Life

Brochure el Ungil Chais el Mla er a Dios!, suobel 9 me a 11; A Book for All People, 22-​26 el llel; me a A Satisfying Life​—How to Attain It, suobel 2

Sel mongedecheduch er a rechad el oumerang er a Buddha, e mousbech er a brochure el The Pathway to Peace and Happiness, 3-7 el llel.

Sel mongedecheduch er a rechad er a Muslim, e mousbech er a brochure el Real Faith​—Your Key to a Happy Life, suobel 3.

A lsekum e ke oldingel er a basio el ngar er ngii a omengetukel el kirel a Biblia, e ngungil a lak mouchais el kmo aika el tekoi el molekoi ngmengai er ker el dimerekmo bla bo el betok el taem el bo moldingel er ngii.

• Mosaod el kmo ngmekerang e a ulaoch er a Biblia a mla mutaut. Aike el babier el sebechem el ousbech a:

Video el The Bible​—Accurate History, Reliable Prophecy

Brochure el A Book for All People, 27-29 el llel

• Ngsebechem el ousbech er a Biblia Olisechakl el babier sel sekum a chad a mo oker a bebil er a tekoi el lolisechakl a Biblia.

[Baks el ngar er a 6 el llel]

A lsekum a chad er a blai a kmo: “Ngdiak kuumerang er a Dios,” e ngsebechem el dmu el kmo:

• “Ngsebechek el mesaod er sel uchul e ak mlo oumerang er ngike el Ulemeob?” A uriul e mocholt aike el losaod a Reasoning el babier, 84-86 el llel, me a lechub e mketmeklii a taem el mluut el mong e bsang a babier el kmal mle soam el menguiu er ngii.

• “Engdi a lsekum e ngmla er ngii a Dios, e ngsoam a bo el ua ngerang a blekerdelel?” A ruumesingd el chad er a blai a melekoi el kmo ngsorir a Dios er a bltikerreng, llemalt me a klechubechub, e diak longetukel er a rechad. A uriul e mochotii el okiu a Biblia el kmo a Dios a olab aika el blekeradel. (Nglocha mo sebechem el ousbech er a 1 el bliongel er a Biblia Olisechakl el babier, el omuchel er a parakurab 6.)

A lsekum a chad er a blai a kmo: “Ngdiak kuumerang er a Biblia,” e ngsebechem el dmu el kmo:

• “Te betok el chad a oba tia el uldasu. A rebebil a omdasu el kmo a Biblia a diak loltirakl a tekoi er a science me aike el ulekrael el ngar er a chelsel a diak el sebeched el ousbech er chelechang. Kau ngmla ta el monguiu er a Biblia? [Mongiil er a nger er ngii. E mochotii a uchelel a suobel el ngar er a 3 el llel a brochure el A Book for All People, e mnguu el msang.] A rebetok el chad a omes er a Biblia el diak a belkul e le klechelid a mla chouid a osisechakl er a chelsel. Sel kluut el mei e ngsebeched el mo mesaod er a 4 me a 5 el llel.”

• “A rebetok el chad a oba osisiu el uldasu. Ngsebechek el ochotii er kau a tekoi el ngar er a Biblia el kmal mechas a renguk er ngii? [Monguiu er a Job 26:7 me a lechub a Isaia 40:22, el ochotii el kmo a Biblia a oltirakl a tekoi er a science.] A Biblia a dirrek el ngar er ngii a ungil el ulekrael el sebechel olengeseu a telungalek. Sel kluut el mei e ngsoak el mo ochotii a ta er ngii.”

• “Ke mera el mesulang el ouchais er a ngak er a uldesuem. Omko a Dios a lilechesii a babier el kirir a rechad, e a omomdasu e ngera ngar er a chelsel?” A uriul e mochotii a tekoi el ngar er a Biblia el osisiu er a nger er ngii.