Bo Mereched el Meruul a Tekoi

Chelecha el bla lemengodech a Web site er kid, e a ongit el ngar er a internet el kirel a omesubel a Biblia a kmal mla mo betok. A kuk bebil er a ongit a mla mo er ngii el oeak a beches el rolel a dousioning er a buai. A branch office a kirel el mereched el odurokl aika el ongit. El ua tiang, a lsekum a ongit a mo er ngii er a jw.org, e tirke el mechuodel el ngar er sel basio er ngike el semeriar el chad a blechoel el nguu tia el ongit el mla er a branch office er a eru el klebesei er a uriul. Engdi a chais el mla er a ongdibel el mei a melekoi el kmo a rebebil el chad el olengit a omesubel a Biblia a dirkak a chad el mo omes er tir el betok el sandei. Me kede mekerang e oterekeklii el kmo a chad a mereched el nguu a ngeso er a uchei er a bo lak el semeriar?​—Markus 4:14, 15.

A lsekum a chad el diak el kiei er a basio er kau a ochotii el kmo ngsemeriar, e mereched el luchesii sel babier el Please Follow Up (S-43) e mnguu el msang ngike el melechesel a ongdibel er a ongingil el miting. Ngar er a chelsel a tang me a lechub a eru el klebesei e a melechesel a ongdibel a kirel el nguu el msang sel ongdibel el ousbech er tia el babier me a lechub e ngodureklii tia el tekoi el mo er a branch office el ousbech er a botang el Congregation el ngar er a jw.org. Me a remechuodel a kirir el blechoel el omes er a Web site er kid. Me a lsekum te nguu a subed el mo omes er a chad, e ngkirir el mereched el mo mesang. Me ngike el publisher el mla metutk el mo omes er a chad a kirel mereched el mo omes er ngii. A lsekum a chad a dibus er a blil, e nglocha sebechem el mecherei a babier el llechukl a ngklem me a rolel e ngsebechir el omekedong er kau.