A Rolel a Domekeroul er a Bltkil a Rengud el Mora Dios me a Rengar Bita er Kid

Alta Rekristiano a dikea el ngar cheungel a Llach er a Moses, engdi aike el eru el ngarbab el llach el mo betik a rengud er a Dios me a rengar bita er kid, a dirk soal a Jehovah a doruul. (Mt 22:37-39) E a chouaisei el bltikerreng a diak di demechell e dobang a uchul me ngkired lomekeroul er ngii. El okiu a ngera el rolel? A ta er a klou a ultutelel el rolel a okiu a omengiuel a Biblia er a bek el sils. Sel dorriter a kakerous el blekerdelel a Jehovah el ngar er a Bades, e kede mo medengelii a “klungiolel” a Jehovah. (Psa 27:4) E seikid e ngmengal mo betik a rengud er ngii e mo oba uldesuel. Tia smisichid el mo oltirakl a llechul, el uldimukl er sel llach el mo olecholt a bltikerreng el mora rechad. (Jn 13:34, 35; 1Jn 5:3) Me aikaikid a edei el rolel e ngsebeched loldeu a rengud er a omengiuel a Biblia:

• Mousbech er a uldesuem, e momelechesiu a tekoi. Molatk el kmo omko ke ngar isei, e nglocha ngera bo mues, e morrenges, e molungel? Nglocha ngera te mo omelechesiu er ngii tirke el mla er isei?

• Mngedechii a rolel a omonguiu. Aikaikid a bebil er a rolel. Bo leklou a ngerem el menguiu, me a lechub e morrenges a audio recording e moltirakl er a omengiuel a Biblia. Monguiu el kirel a ileakl el chad me a lechub a tekoi el losaod er ngii a Biblia er a bai di monguiu el oltirakl er a bldeklel a bliongel. El ua tiang, ngsebechem el ousbech er a Bliongel 4 me a lechub a 16 er a babier el Ngeso el Kirel a Omesubel a Tekingel a Dios el menguiu el kirel a Jesus. Ngdirrek el sebechem el chiuii sel bliongel el lemlengai er ngii a bades er sel sils me a lechub e ke menguiu aike el babier er a Biblia el oltirakl er a temel a omelechesel.

• Monguiu el mo medengei. A omonguiu er a ta el bliongel er a ta el sils e molebedebek er ngii a kuk ungil er a omonguiu a betok el bliongel e le kau el soam el merekui er a omengiuem. Me ngungil a omolatk a tekoi el dilubech e morriter aike el komakai el tekoi e dirrek el mo ungil ousbech a map me a marginal references. Moruul a research er a tekoi el diak modengelii a omesodel. E a lsebechel, e mongoit a osisiu el taem el melebedebek el uai sel monguiu.