Msisichii a Omereng el Saul er Kau er a Cheldebechelel a Jehovah

1. Ngmilekera longederoder er a rechedal a Jehovah er a taem er a rekot el Kristiano?

A JEHOVAH sel lebesterir a rechedal a tekoi el kirir el meruul e ng expect er tir el mo meruul er ngii el ngar er a chelderoder el rolel. (1 Ko. 14:33) El ua tiang, a Dios a soal a ungil chais a loberk er a beluulechad el rokir. (Mt. 24:14) A Jehovah mla omekngerachel er a Jesus el mo omekrael er tia el ureor. Me a Jesus a mla oterekeklii el kmo ngmeketmokl el ngar er a chelderoder el rolel. Taem er a rekot el Kristiano er a lebo er ngii ongdibel er a kakerous el basio e te millutk er a remechuodel el mo omekrael. (Rel. 14:23) Ngar er a Jerusalem e ngmla er ngii a cheldellel a remechuodel el mle uldimukl er tir a rechapostol me a lmuut el bebil er a rudam el mirruul omelilt el mle kirel a rokui el ongdibel el oltirakl. (Rel. 15:2; 16:4) Tirka el rudam me a rudos el ullengesenges aika el ulekrael a uchul me a “ongdibel a mengal mlo mesisiich a klaumerang er tir me a ildisir a mle bek el sils el di lorael el mo betok.”—Rel. 16:​5, NW.

2. Ngulemuchel er a 1919 el mei e ngmekera Jehovah lomeskid a ulekrael me a kall er a klereng?

² A Jehovah melemolem el mengederoder er a rechedal er chelecha el taem. Ngulemuchel er a 1919 el mei, e ngoeak a ulekrolel a Jehovah e a Jesus a mla ousbech er a kekerei el cheldellel a rengellitel el odam el mengederoder er a ureor er a berkel a klumech e omesterir a rultirakl er ngii a kall er a klereng.a (Lk. 12:42) E kmal bleketakl el kmo a Jehovah omekngeltengat er a urerel tia el kekerei el cheldellel a rengellitel el odam.—Isa. 60:22; 65:​13, 14.

3-4. (a) Mosaod er a ta er a klungiolel a dechelderoder. (b) Ngera kede mo mesaod er tia el suobel?

³ A lsekum e ngdiak dechelderoder e ngdiak el sebeched el kutmeklii tia el ureor el Jesus a mla meskid. (Mt. 28:​19, 20) El ua tiang, okmo ngdimlak le assign a territory me a rokui el chad a sebechir el lomerk er sel sorir. A bebil territory a locha di bo loureor er ngii el betok el taem a rekakerous el chad e a bebil a mo mechoit. Ngsebechem el lmatk a lmuut el bebil er a klungiolel sel dechelderoder?

⁴ Aike el lurruul a Jesus er a lengar tia el chutem a kiltmeklii a rolel e kede chelderoder er chelecha el taem. Ngar tia el suobel e kede mo melatk er a kerebai el lekiltmeklii a Jesus me a rolel e a cheldebecheled oltirakl er tia el kerebai. Kede dirrek el mo mesaod er a rolel e ngsebeched lochotii omereng el saul er kid er a cheldebechelel a Jehovah.

A CHELDEBECHELED OLTIRAKL ER A KEREBIL A JESUS

5. Ngera ta er a rolel e kede oltirakl er a kerebil a Jesus? (Johanes 8:28)

⁵ A Jesus a silubii er a Demal el kmo ngera bo loruul me a bo lolekoi. Me a cheldebechelel a Jehovah oltirakl er a kerebil a Jesus, el osisecheklir er a ungil me a mekngit me a dirrek el ulekrael er tir a mengai er a Tekingel a Dios. (Monguiu er a Johanes 8:28; 2 Ti. 3:​16, 17) Kede blechoel el melai a ulekrael el mo menguiu e oltaut a Tekingel a Dios. Ngera el klungiaol a dengai er tia el omellach?

6. Ngera ta er a klou a ultutelel el rolel e kede ngmai a klungioled er a omesubed er a Biblia?

⁶ Ngmo uchul a klungioled sel dosuub er a Biblia lousbech aike el babilenged el mengai er a Biblia. El ua tiang, ngsebeched lomekesiu aike el lolekoi a Biblia er aike el ulekrael el dolai er a cheldebechel. Sel desang el kmo a ulekrael el dolai a mengai er a Bades e ngmukeroul a klaumerang er kid er a cheldebechelel a Jehovah.—Rom 12:2.

7. Ngera el klumech a lulemerk er ngii a Jesus, e mekera cheldebechelel a Jehovah e oltirakl er a kerebai er ngii?

⁷ A Jesus ulemerk er a “Ungil Chais er a Rengedel a Dios.” (Lk. 4:​43, 44) A Jesus a dilu er a redisaiplo er ngii me bo lomerk el kirel a Renged. (Lk. 9:​1, 2; 10:​8, 9) Chelecha el taem e tirke el rokui el teloi er a cheldebechelel a Jehovah omerk er a klumech er a Renged el diak el ior er a basio el lekiei er ngii me a lechub e ngildisel a ngerachel el lolab.

8. Ngera el ileakl el techall a dobang?

⁸ Kede mera el omes er ngii el ileakl el techall el sebeched el share er a klemerang er a Rengedel a Dios el mora rebebil! Tia el ileakl el techall a diak di lebora ngii di el chad. El ua tiang, a Jesus er a lengar tia el chutem e ngdimlak el kengei er a remekngit el chelid me le sioning el kirel. (Lk. 4:41) Me chelecha el taem e a uchei er a bo el sebechel a chad el lomerk lobengterir a rechedal a Jehovah e ngkirel qualify el mo omerk. Kede ochotii a klungel omereng el saul er kid el kirel tia el ileakl el techall loeak sel domerk er a ngii di el ker el sebeched. Ngdi ua Jesus, a turrekong er kid a melalem e melubs a tane er a klemerang er a rengrir a rechad.—Mt. 13:​3, 23; 1 Ko. 3:6.

9. Ngmekera cheldebechel e olecholt er a ngklel a Dios?

⁹ A Jesus ulecholt er a ngklel a Dios. Ngar er a nglunguchel a Jesus el mora Demal e ngdilu el kmo: “Kmla ochotii a ngklem er tir.” (Jn. 17:​26, BT) Me ngoltirakl er a kerebil a Jesus e a cheldebechelel a Jehovah meruul aike el rokui el sebechel lolengeseu er a rechad el mo medengelii a ngklel a Dios. A ta er a rolel e te meruul er tiang a oeak a New World Translation of the Holy Scriptures. Tia el oidel a Biblia mla loia ngklel a Dios er aike el basio el lemla er ngii er a lekot el meluches. Tia el Biblia a mla motobed a cherrungel me a lechub e ngtedebechel el ngar er a betok er a 270 el omelekoi. Ngar er a booklet el Ngeso el Kirel a Omesubel a Tekingel a Dios er a 1-13 el llel, e ke mo metik a komakai el omesodel a ngklel a Dios el mla lmuut el mora ike el basio el lemla er ngii er a lekot el melluches. Ngar er a Appendix C el debetik er ngii er a study Bible e kede dirrek el mo metik er a omesodel a uchul me a ngklel a Dios a kired el metik er ngii el 237 el taem er aike el Bades el Tekoi er a Grik.

10. Ngera ke suub er a tekingel a redil er a Myanmar?

¹⁰ Ngua Jesus, ngsoad el ngosuterir a rokui el sebeched el mo medengelii a ngklel a Dios. A 67 a rekil el redil er a Myanmar er a bo lodengelii a ngklel a Dios e ngmlo merael a iuechel a medal e melekoi el kmo: “Tia ketengek er a klengar er ngak el rongesii el kmo a Jehovah a ngklel a Dios . . . Kau a mla osisecheklak er sel kot el klou a ultutelel el tekoi el sebechek el suubii.” Ngua desang er tia el experience, a rechad sel lesubii a ngklel a Dios e ngsebechel ngmodech a klengar er tir.

MOLEMOLEM EL LOLECHOLT ER A OMERENG EL SAUL ER KAU EL KIREL A CHELDEBECHEL

11. Te mekera remechuodel e sebechir lochotii omereng el saul er tir el kirel a cheldebechelel a Jehovah? (Dirrek el momes er a siasing.)

¹¹ Ngera ta er a rolel e a remechuodel a sebechir lochotii el kmo te oba omereng el saul el kirel a cheldebechelel a Dios? A remechuodel sel lengai a ulekrael e ngkirir el mo kerekikl el menguiu e meruul aike el rokui el sebechir el mo oltaut er ngii. El ua tiang, te diak di lengai a ulekrael el kirel a rolel a loltobed a part e loluluuch el kirel a ongdibel, te dirrek el ngmai a ulekrael el kirel a rolel a lomekerreu er a resib er a Kristus. A remechuodel el oltirakl a ulekrael er a cheldebechel a ngosuterir tirke el ngar cheungel a ulekerreuir el mo feel er a bltikerreng e ulekerreu.

12. (a) Ngera uchul me ngkired loureor lobengterir tirke el omekrael? (Hebru 13:​7, 17, NW) (b) Ngera uchul me ngkired el mo omes aike el positive el blekerdelir tirke el omekrael?

¹² Sel dengai a ulekrael er a remechuodel e ngkired el kongei el loltirakl. Sel doruul el uaisei e kede rullii el mo beot er a rumekrael el meruul a ngerechelir. A Biblia melisiich er kid el mo olengesenges e chederedall er tirke el omekrael. (Monguiu er a Hebru 13:​7, 17, NW.b) Tia sebechel mo meringel er kid a meruul er ngii. E ngerang? E le tirka el chad a diak lemecherrungel. Me nguaisei a lsekum kede di omes aike el negative el blekerdelir e diak domes aike el positive, e kede mo ua dolengeseu er a recherroued. Ngoeak a ngera el rolel? Kede mo melasem er a klaumerang er kid er a cheldebechelel a Dios el ngii a tekoi el sorir a rumtok er kid el meruul er ngii. Ngera sebeched el meruul er ngii el mo medengei e oltngakl a blulekngir a recherroued?

LAK BECHITITERIR A REBEBIL ME LECHITECHETUR OMERENG EL SAUL ER KAU

13. Te mekera recherrouel a Dios e melasem el melemall er a chisel a cheldebechelel a Jehovah?

¹³ A rumtok er a Dios a meruul aike el lungil el kirel a cheldebecheled el mo uai a lemekngit. El ua tiang, kede mla suubii er a Bades el kmo a Jehovah expect er a remengull er ngii el mo clean, e klikiid omerellir me a omengull er tir. Ngdirrek el mengerechir el kmo, a ngii di el chad el diak lekengei el lobult er a klengit a mo diak el chedal a ongdibel. (1 Ko. 5:​11-13; 6:​9, 10) Kede olengesenges er tia el omellach er a Biblia. Engdi rumtok er kid a ousbech er tiang el melemall er kid e melekoi el kmo ngblutek a uldesued, e oltngakl er a rechad e diak lebetik a rengud er tir.

14. Ngtecha uchul aike el blulak el kirel a cheldebechelel a Jehovah?

¹⁴ Bo modengei el kmo ngtecha mera el luchul aika el odechelakl el mora cheldebechel. A Satan el Diabelong ngike el uchul aika el blulak. Ngika “demal a bek el blulak.” (Jn. 8:44; Gen. 3:​1-5) Me kede expect er a Satan el mousbech er a re support er ngii el mo promote a blulak el kirel a cheldebechelel a Jehovah. Tiakid a dilubech el mora Jesus me a rekot el Kristiano.

15. Ngera te mirruul a remengeteklel a klechelid el mora Jesus me a rultirakl er ngii?

¹⁵ Alta Jesus el Ngelekel a Dios a mle cherrungel e mirruul a betok el lungil mengasireng el tekoi, engdi a Satan uluusbech er a rebebil lomerk a blulak el kirel. El ua tiang, a remengeteklel a klechelid a dilu er a rechad el kmo a klisiich el lulebang loltobed er a remekngit el chelid a mlara “merreder [er] a mekngit el chelid.” (Mk. 3:22) E sera lebora kerrekeriil a Jesus e a remengeteklel a klechelid a ultelecheklii er a otuub e uldbechii a seked el mo melekoi el kmo bo lokodall. (Mt. 27:20) Uriul er a bo lomerk a rultirakl er a Kristus e tirke el ulemtok er tir a “milechelii a uldikel er a delongelir a re Chisentael” me te mlo oldechelakl er a Rekristiano. (Rel. 14:​2, 19) A The Watchtower er a December 1, 1998 a mesaod el kirel a Rellir 14:2 el kmo: “A Rechijudea dimlak di lungil er a rengrir a oltngakl er a klumech, te dirrek el millekoi a mekngit el tekoi el kirir a Rekristiano me a Rechisentael bo lak lorrenges er tir e louketui er tir.”

16. Ngera kired el melatk er ngii sel derenges a blulak el chais?

¹⁶ A Satan a melemolem loumulak el mei er chelechang. Ngika dirk “mengeblad er a beluulchad el rokir.” (Och. 12:9) A lsekum ke remenges a negative el chais el kirel a cheldebechel me a lechub e te rudam el omekrael, e molatk omerellir a rumtok er a Dios el mora Jesus me a rekot el Kristiano. Chelecha el taem e a rechedal a Jehovah loldechelakl er tir e omerk a blulak el kirir el ua lulemlaoch el kirel a Biblia. (Mt. 5:​11, 12) Blulak el chais a diak bo lechoudur a uldesued a lsekum kede mo melatk el kmo ngtecha ngike el uchul aika el blulak e mereched el mo meruul a tekoi el protect er kid er ngii. Ngera kired el meruul?

17. Ngmekera decheridid er a telemellel a blulak el chais? (2 Timothy 1:13) (Dirrek el momes er a baks el “Doruul er Ngii Sel Derenges a Blulak el Chais.”)

¹⁷ Moltngakl a blulak el chais. A apostol Paulus a meskid a bleketakl el ulekrael el kirel sel derenges a blulak el chais. Ngdilu er a Timothy el mo melekoi er a “rebebil el kmo lak . . . momtab a blulak el chais” e “lotngakl a delbochel el cheldecheduch.” (1 Ti. 1:​3, 4, NW; 4:​7, NW) Alta ngalek a soseuii a klalo er a ulaol e nguu lotungii er a ngerel e le ngdiak lodengei a tekoi, a remeklou el chad el medengei a telemellel a diak bo loruul er tia el tekoi. Kede oltngakl a blulak el chais e le kede medengelii ngike el luchul aika el blulak. Kede bai orrenges a “melemalt el osisecheklel” a klemerang.—Monguiu er a 2 Timothy 1:13.

18. Ngmekera sebeched el lochotii omereng el saul er kid el kirel a cheldebechelel a Jehovah?

¹⁸ Kede mla smaod a di edei el rolel e a cheldebechelel a Dios oukerebai er a Jesus. Sel mosuub a Biblia e momtab aike el lmuut el bebil er a rolel e a cheldebechel oltirakl er a kerebil a Jesus. Molengeseu er a rebebil er a ongdibel el mo mekurulii a omereng el saul er tir er a cheldebechel. E molemolem el lolecholt er a omereng el saul er kau loeak a omosiou er a Jehovah loba blakerreng e molemolem el kmeed er a cheldebechel lousbech er ngii el meruul er a soal. (Psa. 37:​28, NW) Mada dolemolem el mengreos er a ileakl el techelled el teloi er a reblak a rengrir el chedal a Jehovah el kmal olecholt er a bltikerreng.