A Jehovah Soal a Rokui el Chad a Lobult

1. Ngera ngmeruul er ngii a chad el lobult?

SEL derellii a cheleuid e ngklou a ultutelel a dobult. A doltirakl er a Biblia e a chad el lobult a mo ouketui er a mekngit el lerirellii, e stob el meruul er ngii, e mla rullii er a rengul el diak el lluut el mo meruul er ngii.—Mt. 3:8; Rel. 3:19; 2 Pe. 3:9.

2. Ngera uchul me kede rokui el ousbech el mo medengelii a bulterreng? (Nehemia 8:​9-11)

² A rokui el chad a ousbech el mo medengelii a bulterreng. E ngerang? E le ngbek el sils el debora klengit. Kid el uldidellel a rsechel a Adam me a Eva a uchul me kede uldiukes er a klengit me a kodall. (Rom 3:23; 5:12) Ngdiak a ta er kid el uleiit er ngii. Mo lmuut er a rechad el kmal uleba blakerreng el ua apostol Paulus me nguleldechelakl er a klengit. (Rom 7:​21-24) Tia ngbelkul a kmo a kngtid a uchul me kede mera el chebuul el chad? Ngdiak, a Jehovah chubechub e soal a lebo el deu a rengud. Molatk er a rechad er a Israel er a taem er a Nehemia. (Monguiu er a Nehemia 8:​9-11.) A Jehovah dimlak el soal a lesal kmal mo mekngit a rengrir er a kngterir er a ngar er a mong, ngbai mle soal a ledeu a rengrir el mengull er ngii. A Jehovah medengei el kmo a bulterreng a mo uchul a deurreng. Me ngolisechakl er kid el kirel. A lsekum kede obult er a kngtid, e ngkmal sebechel mo ulterekokl a rengud el kmo a chubechub el Demad a mo ousubes er kid.

3. Ngera kede mo mesaod er tia el suobel?

³ Ngar tia el suobel e kede mo mesuub el kirel a bulterreng. Kede mo mesaod a edei el tekoi. A kot, kede mo mesuub aike el lullisechakl a Jehovah el mora rechad er a Israel el kirel a bulterreng. Ongingil kede mo mesaod aike el loruul a Jehovah el lolengeseu er a rechad el mora bulterreng. E a ulebongel e kede mo mesaod aike el lullisechakl a Jesus el mora rultirakl er ngii el kirel a bulterreng.

AIKE EL LULLISECHAKL A JEHOVAH EL MORA RECHAD ER A ISRAEL EL KIREL A BULTERRENG

4. Ngera ngullisechakl a Jehovah el mora rechad er a Israel el kirel a bulterreng?

⁴ A Jehovah er a lerelleterir a rechad er a Israel el mo chimo el renged e ngrirellii a telbiil el lobengterir. A lsekum te olengesenges a llechul e ngmo omekerreu e omekngeltengat er tir. Ngmillekoi el kirel aika el llechul el kmo: “A llach el kumeskemiu er chelechal sils a diak le sal meringel ma lechub e le cheroid er kemiu.” (Dut. 30:​11, 16) Engdi a lsekum te mo omtok er ngii el uai a mo mesiou a lmuut el bebil er a chelid, e ngmo choridii a klengeltengat er ngii er tir me te mo chuarm. Me nguaisei mo lmuut er a bo lomtok me ngdirk sebechir el lmuut el nguu a kengei er a Jehovah. Ngmle sebechir el “obult el mor a RUBAK . . . [e mo] olengesenges a tekingel.” (Dut. 30:​1-3, 17-20) Me ngsebechir el lobult. A loruul el uaisei e a Jehovah lmuut el mo kmeed er tir e lmuut el mo omekngeltengat er tir.

5. Ngmilekera Jehovah e ochotii el kmo ngdimlak el give up er a rechedal? (2 King 17:​13, 14)

⁵ A rechedal a Jehovah mlo betok el taem el bo lomtok er ngii. Te mlo mengull a bleob el chelid e mirruul a kmal mekikiongel el tekoi. Tiakid a uchul me te mlo chuarm. Me nguaisei engdi a Jehovah dimlak el give up er tir. Ngmle betok el taem el loldurech er a reprofet er ngii el mo melekoi er tir me lobult e lluut el mei er ngii.—Monguiu er a 2 King 17:​13, 14.

6. Ngmilekera Jehovah lousbech er a reprofet er ngii el lolisechakl er a rechedal a klungel a ultutelel a bulterreng? (Dirrek el momes er a siasing.)

⁶ A Jehovah mle blechoel el lousbech er a reprofet er ngii el mo omeklatk e mesmechokl er a rechedal. El ua tiang nguleak a Jeremia e ngdilu el kmo: “Mobult el mer ngak, kau el melaok a rengum el Israel, ng diak bo lolengasech a renguk er kau ele ngak a chubechubechad me ng diak kulemolem er a ngesechel a renguk el mo cherechar. Ngii di mkengei el kmo ke mlo mekngit e ulemtok e mlo ikrii a RUBAK.” (Jer. 3:​12, 13) E oeak a Joel e a Jehovah dilu el kmo: “Mluut el mei er ngak loba rengmiu el rokir.” (Joel 2:​12, 13, NW) Ngdilu er a Isaia me ledu el kmo: “Molecholb el mo beches. E le mereko ikal rokui el mekngit el kumes er kemiu el meruul.” (Isa. 1:​16-19) Me a Jehovah uleker el loeak a Esekiel el kmo: “Cho momdasu e ng dmeu a renguk el mesa tal mekngit el chad el mad? . . . Ng kmal diak, ng bai soak el mesang el obult e mo ngar. Ng diak el soak a tal chad a le mad, . . . Mereko omeruul el klengit me bo mngar.” (Ese. 18:​23, 32) A Jehovah kmal soal mesterir a rechad el lobult e le ngsoal a lolemolem el ngar el mo cherechar! Me a Jehovah diak lechelellakl el mengiil er a rechad el ngar er a klengit el ngmodech a blekerdelir e mochu olengeseu er tir. Me dosaod a bebil lochotel.

7. A Jehovah nguluusbech er a profet Hosea me a bechil lolisechakl er a rechedal er a ngerang?

⁷ Mutebengii a lulsisecheklii er a rechedal a Jehovah loeak a example er a profet Hosea me a bechil er a Gomer. A Gomer a mlora laokreng e chilitii a Hosea e mo obengterir a rekuk bebil er a resechal. Me ngikang, ngdimlekea el sebechel el mongeseu? A Jehovah el menguiu a reng a dilu er a Hosea el kmo: “Mluut el mong, e bo lebetik a rengum er ngika el redil el ngar ngii a songel e ngar er a laokreng, el ua Jehovah loubltikerreng el mora rechad er a Israel el tir a mla obult el mora ngodech el chelid.” (Hos. 3:​1, NW; Osi. 16:2) Mutebengii el kmo a bechil a Hosea a dirk mirruul oberaod el klengit. Me nguaisei engdi Jehovah dilu er a Hosea me lluut el mo er ngii e le offer lousubes er ngii e lmuut el nguu el mo bechil.a Ngdi osisiu a Jehovah dimlak el give up er tirka el medecherecher a rengrir el chad. Alta te mirruul a kmal mekngit el tekoi, ngkmal dirk mle betik a rengul er tir e millemolem el melasem el olengeseu er tir el lobult e ngmodech a omerellir. Tia ngbelkul a kmo, a Jehovah el merriter a reng, a melasem el lolengeseu er a rechad el dirk meruul oberaod el klengit el mo obult er a kngterir? (Osi. 17:3) Ka me dosaod.

AIKE EL LORUUL A JEHOVAH EL LOLENGESEU ER A RECHAD EL MORA BULTERRENG

8. Ngera ngmirruul a Jehovah el lolengeseu er a Kain el mora bulterreng? (Genesis 4:​3-7) (Dirrek el momes er a siasing.)

⁸ A Kain a mle ketengel a Adam me a Eva. Ngmludiukes er a klengit er a demal me a delal. Me a lmuut kung, a Biblia melekoi el kirel el kmo: “A ikel lurruul a mle mekngit.” (1 Jn. 3:12) Tia locha smodii a uchul me a Jehovah “dimlak bo lungil a rengul er a Kain ma tengetengel” er a lolenget el mo er ngii. A Kain a dimlak lengedechii a blekerdelel ngbai “kmal mlo kesib a rengul me ng mlo chelisngull a medal.” Me ngmilekerang a Jehovah? Ngmlengedecheduch er ngii. (Monguiu er a Genesis 4:​3-7.) Mutebengii el kmo a Jehovah mle ungil mengedecheduch er a Kain e dilu er ngii el kmo, ngmo omekngeltengat er ngii a lsekum e ngmo meruul a ungil. Ngdirrek el ulemeklatk er ngii el kmo a ngesechel a rengul a sebechel rullii el mo meruul a mekngit. Ngklengiterreng e le Kain a dimlak lorrenges. Ngdimlak lebecherei a Jehovah me lengesuir el lobult. Tia ngmlo ulebongel er a Jehovah el melasem el lolengeseu er a rechad el mora bulterreng? Ngkmal diak!

9. Ngmilekera Jehovah e ngosuir a David el mora bulterreng?

⁹ A Jehovah kmal mle betik a rengul er a King David. Ngulemekedong er ngii el kmo “ngchad el lodeuir a renguk.” (Rel. 13:​22, NW) Me nguaisei a David a riruul oberaod el klengit el luldimukl er ngii a laokreng me a okodellel a chad. A doltirakl er a Llach er a Moses e a David a mle kirel lokodall. (Lev. 20:10; Ule. 35:31) Me nguaisei a Jehovah mle soal ngosuir a David lobult.b Ngulderechii a profet Nathan el mo odngelii alta ngdiak olechotel a kmo a David a mla mora bulterreng. A Nathan uluusbech er a okesiu el mleketmokl el mo rutechii a rengul a David. Me a David a mlo mtebengii el kmo ngkmal tilemellii a rengul a Jehovah, me ngulebult er a kngtil. (2 Sa. 12:​1-14) Nglilechesii a chelitakl el ngii ochotii el kmo ngkmal uluuchel a rengul er a kngtil. (Psa. 51, superscription) Tia el babier er a chelitakl a mla mengelaod er a rebetok el mla mora klengit, e odbecheterir el mo obult. Ngdiak el sal kmal dmeu a rengud e le Jehovah uleba bltikerreng e ngilsuir a betik er a rengul el mesiungel er a David el mora bulterreng?

10. Ngmo uangerang a feeling er kau sel modengei el kmo a Jehovah oba kllourreng el bedul el kid el ngar er a klengit e ousubes er kid?

¹⁰ A Jehovah kmal ouketui a klengit e kmal diak lekengei a ngii di el bedengel a klengit. (Psa. 5:​4, 5) Engdi ngmedengei el kmo kede rokui el ngar er a klengit, me ngoeak a bltkil a rengul el mei er kid e ngiltii el lolengeseu er kid el loldechelakl a klengit. Ngika olengeseu er a rengar er a klengit me lobult e bo lekeed er ngii, mo lmuut er tirke el meruul a kmal mekngit el tekoi. Ngkmal mengelaod er kid sel dodengei el kmo a Jehovah soal lousubes er kid! Sel dolatk er a kllourreng me a klausubes er a Jehovah e ngrullid el mo melemolem loba blakerreng el mo er ngii e mereched el lobult sel derellii a klengit. Ka me dosaod er a rolel e a ongdibel er a Rekristiano a mlosisechakl el kirel bulterreng.

AIKE EL LULLISECHAKL A JESUS EL MORA RULTIRAKL ER NGII EL KIREL A BULTERRENG

11-12. Ngera ngullisechakl er a rulerrenges er ngii a Jesus el kirel a klausubes er a Demal? (Momes er a siasing.)

¹¹ A Mesias a mle temel el duum er a taem er a rekot el Kristiano. Ngua losaod a uleak uchei el suobel, a Jehovah uluusbech er a Johanes el Chad er a Techolb me a Jesus Kristus el lolisechakl er a rechad er a klungel a ultutelel a bulterreng.—Mt. 3:​1, 2; 4:17.

¹² A Jesus er a lomerk er a klumech e ngullisechakl er a rulerrenges er ngii el kmo a Demal a kmal soal lousubes. A ta er a rolel e ngmirruul er tiang a sera louchais er a klebokel el okesiu er a ririid el ngalek. Ngika el ngalek a ngileltii el mo kiei el ngar er a klengit. Engdi ngmlo ‘ouechela a rengul’ e liluut el mo remei. Ngmilekerang a Demal? A Jesus a kmo ngika el ngalek a “dirk mle cheroid er a blai e a demal a mesang, me ng kmal mlo chubur, me ng rirurt el mong el mechulii ngiil ngelekel e turengur a medal.” Ngika el ngalek a mle soal lolengit el mo ta er a mesiou er a blil a demal, engdi demal a ulemekedong er ngii el “ngikal ngelekek” e liluut el lolutii el mora deruchellel er a telungalek. A chedam a dilu el kmo: “Ng ririid e kede mla metik er ngii.” (Lk. 15:​11-32) A Jesus er uchei er a lemei er tia el chutem e ngmlara eanged e ulterekokl el milsa rolel e a Demal ullecholt er a klechubechub el mora rebetok el chad el mlora klengit e obult. Tia el okesiu ochotii el kmo, a Jehovah a chubechub el Demad e mera el rutechii a rengud e mengelaod er kid!

13-14. Ngera ngsilubii a apostol Petrus el kirel a bulterreng, e ngera ngullisechakl er a rebebil el kirel a bulterreng? (Dirrek el momes er a siasing.)

¹³ A apostol Petrus a siluub a betok er a Jesus el kirel a bulterreng me a klausubes. A Petrus a mle blechoel el lousbech a klausubes, me a Jesus a mle bekururau lousubes er ngii. El ua tiang, a Petrus er a lotngeklii a Rubak er ngii el edei el taem e a kngtil a kmal mlo omekberaod er ngii. (Mt. 26:​34, 35, 69-75) Engdi uriul er a lebekiis a Jesus e ngmlo duum er a Petrus el di ngii el tang. (Lk. 24:​33, 34; 1 Ko. 15:​3-5) A Jesus a ulterekokl el uluusubes e olterekokl er a rengul ngika el apostol er ngii el mla obult.

¹⁴ A Petrus el ulebult e ngiluu a klausubes a uchul me ngmle sebechel er chelechang el lolisechakl er a rebebil el kirel a bulterreng me a klausubes. Telkib el taem er uriul er a chedaol el sils er a Pentekost, e a Petrus a milengedecheduch er a seked el rechad er a Chijudea el dimlak el loumerang er a Jesus e silodii el mo er tir el kmo te milekodir a Mesias. Me nguaisei engdi ngmilengelechel er tir el kmo: “Molodech a rengmiu e mobult, me le mesuld a kngtmiu, me le me blsechel chomelisiich el mlar medal a Rubak.” (Rel. 3:​14, 15, 17, 19, BT) Me a Petrus a ullisechakl el kmo a chad el ngar er a klengit sel lobult e ngngodechii a cheleuid el uldesuel, stob el meruul er a mekngit, e mo meruul aike el lodeuir a rengul a Dios. Ngika el apostol a dirrek el silodii el kmo a Jehovah mo smuld a kngterir el mo diak. A betok el rak er uriul e a Petrus ulelterekokl a rengrir a Rekristiano el kmo: “[Jehovah] oba kllourreng el kiriu, ele ng diak el soal a ngii di le chad a leriid, e bai soal a rokui el chad a lobult el mo imikr a kngterir.” (2 Pe. 3:9) Ngmera el lungil el hope el kirir a Rekristiano a lerebet er a klengit, mo lmuut er a oberaod el klengit!

15-16. (a) Ngmilekera apostol Paulus e suubii a klausubes? (1 Timothy 1:​12-15) (b) Ngera kede mo mesaod er a ongingil el suobel?

¹⁵ Te di kesai er kid a uai a Saulus er a Tarsus el kmal uluusbech er a bulterreng me a klausubes. Ngika kmal mle meringel loldechelakl er a rultirakl er a Kristus. A ruumesingd er a Rekristiano a locha ulemdasu el kmo ngdiak omeltkel e kmal diak el bo lengodech a blekerdelel. Me nguaisei engdi a mla mekiis er a kodall el Jesus a kmal dimlak loba tia el uldesuir a redi chad. Ngii me a Demal a miles a ungil blekerdelel a Saulus. A Jesus a dilu el kmo: “Kmla ngiltii el mo mesiou er ngak.” (Rel. 9:15) A Jesus a rirellii a mengasireng el tekoi el ngosuir a Saulus el mora bult. (Rel. 7:58–8:3; 9:​1-9, 17-20) A uriul er a lebo el Kristiano a Saulus e bo lodengelii a rechad el apostol Paulus, e ngmle blechoel el louchais er omereng el saul er ngii el kirel a krasia me a klechubechub el mlocholt er ngii. (Monguiu er a 1 Timothy 1:​12-15.) Ngika el apostol el kmal uleba omereng el saul a ullisechakl el kmo: “Klechubechub ra Dios chomekrael er kau el mora bult.”—Rom 2:​4, BT.

¹⁶ A ta el taem e a Paulus a rirenges el kmo a ongdibel er a Korinth a milecherei a chad el ngar er a deleboes me ngmelemolem el ngar er a ongdibel. Me ngmilekerang? Aike el ledilung osisecheklid er a rolel e a Jehovah olecholt er a bltikerreng sel losmechokl er a remesiungel e ochotii a klechubechub sel lobult. Kede dirrek el suubii el mo chubechub el uai ngii. Kede mo komakai el mesaod er tiang er a ongingil el suobel.