Di Mereched el Ngosuterir Tirke el Semeriar er a Ungil Chais

1. Ngera te locha mo meruul er ngii a rechad sel domerk el mo er tir? (Rellir 13:​47, 48, NW; 16:​14, 15)

REBETOK el chad er a taem er a rekot el Kristiano er a lerenges el kirel a Jesus e te di mle mereched el kongei er a klemerang. (Monguiu er a Rellir 13:​47, 48, NW; 16:​14, 15.a) Ngdi osisiu, chelecha el taem e a rebebil sel lekot el rongesii a ungil chais e ngkmal mo dmeu a rengrir. Mo lmuut er tirke el dimlak el semeriar er a uchelel me nglocha mo obok a rengrir er a uriul e kongei er ngii. Ngera ungil doruul er ngii sel debetik er a rechad el sorir el mo medengei el kirel a Dios me a Biblia?

2. Ngoeak a ngera el rolel e a ureor el meruul er a remo disaiplo a di uai a chad er a sers?

² Ka molatk er tia el okesiu. Ngsebeched lomekesiu er a ureor el meruul er a remo disaiplo el mora chad er a sers. A lsekum a rdechel a ta er a dellomel a merkang e ngulterekokl el mo ridmii alta ngdirk mesib er a chutem me a lechub ngdirk melalem a dellomel er a sersel. Ngdi osisiu, sel debetik er a chad el soal lorrenges er a klumech el dobang, e ngsoad el di mereched el mo ngosuir el mo ta er a disaiplo er a Kristus. A osisiu el taem e kede melemolem el olengeseu er tirke el lousbech a taem el mo medengelii a kerresel a tekoi el lorrenges er ngii. (Jn. 4:​35, 36) A sekutaberreng a mo ngosukid el mo medengelii sel mo oureor el kirir tirke el orrenges er kid. Ka me dosaod er a sebeched el meruul er ngii sel dekot el mengedecheduch er a rechad el semeriar. A uriul e kede mo mesaod er a rolel e ngsebeched el ngosuterir el mo melemolem el olengeriakl.

SEL LESEMERIAR A RECHAD

3. Ngera ungil doruul er ngii sel debetik er a rechad el semeriar? (1 Korinth 9:​26, BT)

³ Sel debetik er a rechad el semeriar e ngsoad el ngosuterir me lemereched el mo merael er a rael el mora klengar. Me sel dekot el mengedecheduch er tir e ngungil di demereched el offer er tir a omesubel a Biblia e demereched el invite er tir el mei er a miting.—Monguiu er a 1 Korinth 9:​26, BT.b

4. Mouchais er a experience er a chad el di mle mereched el kongei er a omesubel a Biblia.

⁴ Offer omesubel a Biblia. A rebebil el dongedecheduch er tir a locha kmal di mereched el kongei er a omesubel a Biblia. El ua tiang, a ta el Ongeua el Ureor e ngmla er ngii a ta el kekerei el redil er a Canada el mlora cart er kid e nguu a copy er a Mkiei el Mo Cherechar! el brochure. A odos el mlara cart a silodii el mo er ngii el kmo tia el brochure a obengkel a di tada el omesubel a Biblia. Ngika el redil a kmal mle semeriar me te mle exchange a dengua er tir. Uriul er tia el osisiu el sils e ngika el redil a mle text er a odos el mesaod er a temel a study. A odos a mle offer el mong er a weekend engdi ngika el redil a dilu el kmo: “E a klukuk? Ak free er a klukuk.” Me te milsuub er a Friday. Ngika el redil a dirrek el mlora kot el miting er ngii er tiakid el weekend e di mle mereched el olengeriakl.

5. Ngmekera sekutaberreng e ngosukid el mo medengei el kmo ngngera kot lungil rolel e kede offer omesubel a Biblia? (Dirrek el momes a siasing.)

⁵ Me nguaisei engdi ngkmal diak de expect el kmo a rokui el chad a mo uai ngika el redil el di mle mereched el mo omuchel el mesuub. A rebebil er a rechad a locha mo ousbech a taem. Nglocha mo kired el omuchel el mesaod er a tekoi el lesemeriar er ngii. Me nguaisei engdi a dolemolem loba positive el uldasu e dolemolem el olecholt er a personal interest er a chad e nglocha di chelsel a kedeb el taem e kede mechelii omesubel a Biblia el lobengkel. Sel de offer omesubel a Biblia e ngera sebeched el dmung? Ka me desa el kmo ngngera te dmung a rebebil el odam me a odos el kmal meduch el omuchel omesubel a Biblia.

6. Ngmekera sebeched el offer el mo melemolem er a cheldechedechad lobengkel a chad el semeriar?

⁶ Tirka el odam me a odos el luleker er tir el kirel a domuchel a omesubel a Biblia a dmu el kmo, ngar er a bebil el beluu e sel mosaod er a omesubel a Biblia e ngungil olak mousbech er a tekoi el “mesuub,” “mesuub er a Biblia,” “omesubel a Biblia,” me a lechub “olisechakl er kau.” Te miltik el kmo ngbai kmal ungil omousbech a tekoi el ua “cheldecheduch,” “omesaod,” me a lechub “mo medengelii a Biblia.” A lsoam el rullii me a chad bo el soal lmuut el mo mengedecheduch er kau e ngsebechem el dmu el kmo, “Ngkmal mechas a rengud e le Biblia onger aike el meklou a ultutelel el ker el kirel a klengar,” me a lechub kede dmu el kmo, “A Biblia diak di el babier er a klechelid ngdirrek el kmal ngosukid er a klengar er kid er a bek el sils.” Ngsebechem el dochelir el kmo: “Ngdiak lousbech er a klou el taem. Ngsebechel di 10 to 15 minutes e ngsebechem el suubii a tekoi el kmal mo ngosukau.” Ngdiak a belkul mousbech a tekoi el ua “appointment” me a lechub ng “every week,” e le ika sebechel rullii a chad el mo feel el kmo tia mocha ta er a tekoi el kirel meruul er ngii.

7. A rebebil te kot el mo mtebengii a klemerang er ker? (1 Korinth 14:​23-25)

⁷ Invite er tir el mei er a miting. Taem er a apostol Paulus e te mla er ngii a mlo mtebengii a klemerang er a Biblia e le tir el mlora miting er a ongdibel. (Monguiu er a 1 Korinth 14:​23-25.) Tia dirrek el klemerang er chelecha el taem. Oumesingd er a rechad a di mereched el mo olengeriakl sel lomuchel el ngar er a miting. Me ngoingerang a ungil om invite er tir? A 10 el suobel er a Mkiei el Mo Cherechar! a mengelechel er a chad el mei er a miting me nguaisei engdi ngdiak mousbech el mengiil el mo er tia el part er a omesuub. Sel mkot el mengedecheduch er a chad e ngsebechem el invite er ngii el mei er a miting er a Sandei e locha dirrek el sebechem louchais er ngii er a dai er a cheldecheduch me a lechub ng point el ngar er a suobel el bo dosuub er ngii er a Ongkerongel.

8. Ngera sebeched louchais er a chad sel de invite er ngii el mei er a miting? (Isaia 54:13)

⁸ Sel em invite er a chad el semeriar e msodii el mo er ngii a rolel e a miting er kid a ngodech er aike el locha lodengei el kirel a mora ikelesia. A ta el mesuub a Biblia er a lekot el mora Omesubel a Ongkerongel e nguleker er a odos el mesuub lobengkel el kmo, “Ngika el meruul er a Ongkerongel ngmedengei a ngklir a rokui el chad?” Me a odos a silodii el mo er ngii el kmo kede melasem el mo medengei a ngklir a rokui el chedal a ongdibel e le ongdibel a ua chimo el telungalek. Ngika el redil a dilu el kmo a ruumesingd er a rechad er a ikelesia er ngii a diak lodengei a ngklir a rechad. Ngdi osisiu a rebetok a diak lodengelii a uchul me kede mo kldibel. (Monguiu er a Isaia 54:13.) Kid a mo kldibel el mo mengull er a Jehovah e melai a klubeled er ngii, e kasisiich er a delongeled. (Heb. 2:12; 10:​24, 25) Tiakid a uchul me a miting er kid a chelderoder, kmal ngosukid, e diak doruul a tekoi el di siukang. (1 Ko. 14:40) A blil a miting er kid a simple e mleketmokl el rullii el mo beot er kid a mesuub. E kmal diak dolab el mora rekakerous el chad er a balatiks e le ngdiak domekbitang me a diak deteloi a debate me a lechub e dosaod a uldesued el kired. Nglocha mo ngosuir a chad el mesuub omochotii er ngii a video el Ngera Meketmokl er a Blil a Ongdibel? Seikid e ngsebechel mo medengei el kmo ngera ngsebechel expect er ngii.

9-10. Sel om invite er a chad el mei er a miting, e ngera sebechem el louchais er ngii me ngmo diak lemedakt el mei? (Dirrek el momes er a siasing.)

⁹ A rebebil a omai er a rengrir a mei er a miting e le te omdasu el kmo kede melai er tir el me chedad. Molterekokl er a rengul el kmo ngkmal soad a re visitors e kmal sebechel di mei e orrenges e diak el lousbech el mo meruul a ngii di el ngerang. Kede outkeu er a retelungalek luldimukl er tirke el mekekerei a rengelekir. A rengalek a diak doleakl er tir er a rechad er a blirir. Te bai dengchokl el mesuub el lobengterir a rechad er a blirir. Ngoeak tiakid el rolel e a ruungalek a medengei el kmo a rengelekir te ngar er ker me a ngera te olisechakl er tir. (Dut. 31:12) Ngkmal diak a merael el melai a tenget. Kede bai oltirakl a tekingel a Jesus el dilu el kmo: “Kom ngilai el diak locheraol, mo morous el diak locheraol.” (Mt. 10:​8, BT) Ngdirrek el sebechem el dmu er ngii el kmo ngdiak lousbech loubail a meringel a cheral el bail. A Dios omes er a rengul a chad ngdiak el teletelel er a ikrel.—1 Sa. 16:7.

¹⁰ A lsekum a chad a mei, e moruul aike el rokui el sebechem el mo rullii el mo feel el kmo ngkmal dmeu a rengud er ngii el mlei. Em introduce er ngii el mora remechuodel me a rechedal a ongdibel. A lsekum ngmo feel el kmo ngkmal dmeu a rengud er ngii el mlei e nglocha mo soal lmuut el mei. A lsekum ngdiak a Biblia er ngii em share er a Biblia er kau lobengkel er a temel a miting e mngesuir el mo understand er a cheldecheduch loltobed er ngii me a rolel e kede dmak el mesuub.

SEL MOMUCHEL EL MESUUB ER A BIBLIA

11. Ngmekera sebechem el lochotii el kmo ke respect er a temel a chad me a schedule er ngii?

¹¹ Ngera kired el melatk sel dosuub lobengkel a chad? Em respect er a temel a chad me a schedule er ngii. El ua tiang, a lsekum ko mla kutmeklii a taem el bo mosuub e motireklii, mo lmuut me a lsekum ngdiak el blekerdelir a rechad el lolab a taem. Me a lmuut kung, nglocha ungil sel kot el taem el mosuub el di lekekedeb a temel a omesubiu. A rebebil er a publisher el mla mesuub lobengterir a rebetok el chad a melekoi el kmo ngungil di mkedebengii mo lmuut me a lsekum ngdirk soal melemolem. E lak di mongedecheduch. Becherei a chad er a blai me louchais aike el ngar er a rengul me a uldesuel.—Osi. 10:19.

12. Ngera kirel turrekong er kid er a di uchelel?

¹² Ngdi uchelel e a turrekong er kau bo mngosuir a chad el mosuub lobengkel el mo medengelii a Jehovah me a Jesus e mo betik a rengul er tir. Ke meruul tiang loeak sel molecholt er ngii aike el lolekoi a Biblia ngdiak el klemedengei er kau er a Biblia. (Rel. 10:​25, 26) A apostol Paulus er a lolisechakl e ngmle blechoel el meruul er a rechad el mo melatk er a Jesus Kristus, el ngike el lulderchii a Jehovah el me olengeseu er kid el mo medengelii e mo betik a rengud er ngii. (1 Ko. 2:​1, 2) A Paulus a dirrek el mileketeklii a klungel a ultutelel a dolengeseu er a rebeches el disaiplo el mekeroul a ungil blekeradel el sebeched lomekesiu el mora kolt, silber, me a meringel el chad el bad. (1 Ko. 3:​11-15) Aika el ungil blekeradel a uldimukl er ngii a klaumerang, llomeserreng, sekutaberreng, me a omeluu er a Jehovah. (Psa. 19:​9, 10; Osi. 3:​13-15; 1 Pe. 1:7) Moukerebai er a rolel e a Paulus a ullisechakl loeak omngesuir a chad el mosuub lobengkel el mo mekurulii a mesisiich el klaumerang me a kmes el deleuill er ngii me a Demad el ngar er a eanged.—2 Ko. 1:24.

13. Ngmekera sebeched lochotii a kllourreng me a tabesul el uldasu sel dolengeseu er a rechad el semeriar? (2 Korinth 10:​4, 5, NW) (Dirrek el momes er a siasing.)

¹³ Moltirakl er a rolel e a Jesus a ullisechakl loba kllourreng me a tabesul el uldasu. Lak moker a ker el ngii a rullii a chad el mo merur me a lechub ngmetitur. A lebo er ngii a tekoi el meringel er ngii e becherei e molemolem er a omesuub e a uriul e mluut el mei er ngii. Lak em force er ngii el mo kongei er a tekoi bai bsa taem el mo melatk er ngii e dolemii ngii el klemerang er a rengul. (Jn. 16:12; Kol. 2:​6, 7) A Biblia a melekoi el kmo a klsuul el osisechakl a di uai a “aike el mera el blekerdelel a chad er a chelsel a rengul” el kired el mult. (Monguiu er a 2 Korinth 10:​4, 5, NW.c) Nglocha diak lebeot er a chad a stob loumerang a tekoi el meketeketang er a loumerang. Me a leuaisei ngkired el kot e kede ngosuir el mo er ngii a mesisiich el deleuill er ngii me a Jehovah e seikid e ngmo beot er ngii a chemoit aika el klsuul el osisechakl el delalem er a rengul.—Psa. 118:14.

SEL LOMUCHEL EL NGAR ER A MITING

14. Ngkirel uangerang omerelled el mo er tirke el beches el mei er a miting?

¹⁴ A Jehovah expect er kid el diak domekbitang omerelled el mora rebeches el mei; a lechad er a ngodech el beluu, ngodech a siukang er tir, me a lebetok a ududir me a lak. (Jak. 2:​1-4, 9) Me ngmekera sebeched lochotii a bltikerreng el mo er tirke el beches el mei er a miting?

15-16. Ngmekera sebeched el rulleterir a rebeches el mei er a miting el mo feel el comfortable?

¹⁵ A rebebil el mei er a miting a mei e le ngsorir el mo medengei el kmo ngua doruul ongdibel er kid me a lechub e te mei e le ngngar er ngii a chad el chedal a kuk ta er a ongdibel el millisiich er tir el mei. Me sel meseterir a rebeches el mei er a miting e mongedecheduch er tir. Moutkeu er tir engdi lak moruul er tir el mo feel diak el comfortable. Em invite er tir el mo dengchokl lobengkem. Em share er a Biblia er kau me a babilengem el lobengterir me a lechub e besterir a copy er tir. Me a lmuut kung, molatk a feelings er tir. A ta el chad el mlei er a Blil a Ongdibel a dilu er a odam el uluuetkeu er ngii el kmo ngkora metitur e le bilel a dimlak el ua bilir a rokui el chad. A odam a ulterekokl er a rengul el kmo a Resioning er a Jehovah a di ua rebek el chad. Ngika el chad el uriul ngulengeriakl el mo nguu a techolb a dirkak a ta el lobes er a rolel e ngika el odam a rirellii el mo comfortable. Me nguaisei sel dolecholt er a personal interest el mora rebeches el mei er a ongdibel e kede kerekikl me ngdiak bo doker er tir a ker el ngii omekrur er tir me a lechub ng too personal.—1 Pe. 4:15.

¹⁶ Ngdirrek el sebeched el rulleterir a rebeches el mei el mo feel el comfortable el ngar er a lmuut el ta er a rolel. El ua tiang, sel dosaod el kirir tirke el diak el Sioning me a lechub ngklaumerang er tir e kede ochotii omengull el ngar er a cheldechedechad, nger er kid, me a dirrek el part er kid er a miting. Ngdiak el soad el ousbech a tekoi el mo tomall a rengrir a rebeches el mei me a lechub derelleterir me bo lak el sorir el lmuut el mei. (Tit. 2:8; 3:2) Ngdiak bo dosaod a mekngit el kirel a klaumerang er a rechad. (2 Ko. 6:3) A rudam el loltobed a cheldecheduch a kirir el kmal mo kerekikl er tiang. Te dirrek el melatk er a rechad el diak el Sioning lorrenges loeak sel explain a tekoi me a lechub e nguldasu el rechad er a buai a diak el lodengei.

17. Ngera turrekong er kid sel debetik er a resemeriar?

¹⁷ A urered el meruul er a remo disaiplo a di merael el lmuut el menga el mo orechudel er a bek el sils. Kede melemolem el metik er a rechad el “rredemelel a diak a ulebengelel el klengar.” (Rel. 13:​48, NW) Sel debetik er tir e di demereched el mo offer omesubel a Biblia er tir e de invite er tir el mei er a miting. Sel doruul el uaisei e ngsebeched el ngosuterir el mo omuchel el merael er a rael el mora klengar.—Mt. 7:14.