Oba Betik er a Rengum e Molemolem el Oba Deurreng

1-2. Ngera uldesuel a Jehovah el kirir tirke el obang a smecher me a lechub ngmechudelang? (Osisechakl 19:17) (Dirrek el momes a siasing.)

A JIN-YEOL el odam er a Korea a melekoi el kmo: “Ngak me a bechik a mla bechiil el 32 el rak. Aika el last el eim el rak e a kubang e le ngsmecher er a Parkinson’s disease me ngmeringel er ngii a move a bedengel. Ngkmal betik a renguk er a bechik me ngdmeu a renguk el sebechek lomekerreu er ngii. Bek el klebesei e ngbad er a bet er a osbitar el ngar er a blimam. Ak bad er bita er ngii e aki mechiuaiu el kaiuereked el chim.”

² Kau, koba betik er a rengum el locha chad er a blim, bechim, ngelekem, me a lechub ngsechelim el smecher me a lechub ngchudelang? A leuaisei e ke locha kmal appreciate er a ileakl el techall el mobang el sebechem el ngosuir el ngar tia el ileakl el rolel. Ke dirrek el meruul er ngii lolechotel a blakerreng er kau el mora Jehovah. (1 Ti. 5:​4, 8, NW; Jak. 1:27) Me nguaisei engdi ngdiak lebeot el tekoi a doba ta er a chad. A lebebil e ngmo er ngii a ringel el omchebangel el diak a chad el medengei el kirel. Nglocha ngar ngii aike el taem e ke mo feel el kmo ngdiak a chad el understand el kmo ke chuarm. A rechad a locha omes er kau el di smile engdi ngdiak lodengei el kmo sel di lekau el tang e ngdiak el sebechem lorreked a iuechel a medam. (Psa. 6:6) Me alta rechad a diak lodengei el kmo ngngera ke chebangel engdi a Jehovah a medengei e kmal understand er kau. (Momekesiu er a Exodus 3:7.) Ngmes aike el rokui el dikea el sebechem el meruul le koba betik er a rengum e mes a rokui el meringel el urerem e mesekau sel bo mlangel. Aika uchul me ngkmal betik a rengul er kau. (Psa. 56:8; 126:5) Ngmelekoi el kmo ngbelsem el kirel aika el omoruul e tibir el kmo ngmo mtechei a sulem.—Monguiu er a Osisechakl 19:17.

3. Ngera el omelsemai a locha blo lechebangel a Abraham me a Sara er a lobang a Tera?

³ Te betok el ngar er a Biblia dirrek el mla er ngii a chad el lobang. Molatk er a Abraham me a Sara. Sera letuobed er a Ur e a demerir er a Tera a mle 200 a rekil. Engdi ngmirrael el lobengterir. Te mirrael el 600 el mael el mora Haran. (Gen. 11:​31, 32) A Abraham me a Sara a ulterekokl el kmal mle betik a rengrir er a Tera engdi ka molatk omelsemai el blo lechebangel er a lobang, tokubets sel lengar er a omerael. Te ulterekokl el mirrael el ngar er a kiamo me a lechub ng donkey. Nglocha mle meringel er a Tera a ngmasech er a ta er aika el charm e dengchokl er ngii el kemanget el taem. Me a Abraham me a Sara a ulterekokl el mla er ngii aike el taem el kmal mlo mesaul a bedengir. A Jehovah ulterekokl el millisiich er tir. Ngdirrek el mo melisiich er kau el ua lullisiich er a Abraham me a Sara.—Psa. 55:22.

4. Ngera kede mo mesaod er tia el suobel?

⁴ Ngmo beot er kau a melemolem el obang a betik er a rengum a lsekum ke happy. (Osi. 15:13) A chad el dmeu a rengul a sebechel melemolem el happy mo lmuut me a bo lemeringel a klengar er ngii. (Jak. 1:​2, 3) Ngmekera sebechem el mo obang chouaitia el deurreng? A ta er a rolel a obo multuil er a Jehovah loeak a nglunguuch e molengit er ngii me lengesukau el mo oba positive el attitude. Ngar tia el suobel e kede mo mesaod a lmuut el bebil er a tekoi el sebechir tirke el obang a smecher me a lechub ngchudelang el meruul me lolemolem el loba deurreng. Kede dirrek el mo mesaod aike el sebechir a rebebil el meruul el olengeseu er tir. Engdi a kot e me dosaod er a uchul me a rubetiterir a resmecher me a remechudelang a kirir el melemolem loba deurreng me aike el sebechel mo uchul e te oridii a deurreng er tir.

LERELLII ER A DEURRENG ER A CHAD

5. Ngera uchul me a rubetiterir a resmecher me a remechudelang a diak el kirir el oridii a deurreng er tir?

⁵ A lsekum a chad loba ta er a chad a oridii a deurreng er ngii e ngsebechel mo beot er ngii el mo diak a dechal a rengul lobang. (Osi. 24:10) E sel lemesaul a rengul e ngmo beot er ngii a mo mekngit el mengedecheduch er a chad e mo diak lungil el kutmeklii. Ngera sebechel mo uchul me a rubetiterir a resmecher me a remechudelang a oridii a deurreng er tir?

6. Ngera me a rebebil lobang a smecher me a lechub ngchudelang a mo burnout?

⁶ Ngsebechir el burnout. A odos el Leah a kmo: “Mo lmuut me a di lungil merael a rokui el tekoi, me ak blechoel el feel el stressed e diak a klisichel a bedengek er a ulebengelel a sils er ngak. A lebebil e ngmo diak a klisichek el respond er a text er a chad.” A rekuk bebil a mo diak el enough a cheliuir me a lechub ngdiak a temir el relax, el tekoi el kmal lousbech. A odos el Inés a kmo: “Ngdiak el sebechel mo enough a cheliuek. Sel leklebesei e ak blechoel el mekiis er a bek el eru el sikang el mo omekerreu er a delal a bechik. E ngak me a bechik a mla mo betok el rak er a lak ki mou vacation.” A rebebil el obang a smecher me a lechub ngchudelang a mo kirir el kotouar a invitation el mo obengterir a re friends me a lechub te kotouar a assignment e le te obang a betik er a rengrir el full-time. Tiakid a uchul me te locha mo feel el sabisi me a lechub te feel el chelseches.

7. Ngera uchul me a rebebil loba chad a di mo oldechelakl er tir a ukltkir me a lechub ngkmal mo imis el mekngit a rengrir?

⁷ Ngsebechel di mo oldechelakl er tir a ukltkir me a lechub ngkmal mo imis el mekngit a rengrir. A odos el Jessica a kmo: “Ak blechoel el mo feel el kmo ngkirek el meruul a lmuut el betok lomekerreu er ngii. Ak dirrek el mo feel bad sel kungoit a taem el olengull e le kmo feel el kmo, ak kmal di melatk er a di ngak.” A rebebil lobetiterir a smecher me a mechudelang a bekikl el kmo nglocha diak el enough a loruul lolengeseu er a betik er a rengrir. Me a lechub a lebebil e te mo feel el kmo ngdikea el sebechir el melemolem lobang. E sel bo lemesaul a bedengir e te locha mo dmung me a lechub e te rullii a tekoi el diak lungil. Aikakid a uchul me nglocha ngkmal mo mekngit a rengrir. (Jak. 3:2) A rebebil a locha mo mekngit a rengrir sel lomes er a betik er a rengrir el riiedang a mle klungiolir. A odos el Barbara a kmo: “A ta er a tekoi el kmal mo meringel er ngak a omes er a betik er a renguk er a bek el sils el di merael el mong.”

8. Mouchais a experience el ngii ochotii a lerellii el mora chad loba smecher sel doreng a sulel.

⁸ A rebebil a mo feel el kmo a rechad a diak loba omereng el saul el kirel aike el loruul. E ngerang? E le rechad a diak leblechoel loreng a sulel me a me a lechub lechat er a chad loba smecher el kirel a meringel el urerel me a sacrifice er ngii. Me sel doreng a sulel e ngkmal melisiich er ngii. (1 Th. 5:18) A odos el Melissa a kmo: “A lebebil ak lmangel e le ak kmal mo frustrated. Engdi sel ledu er ngak a chad el kubang el kmo, ‘Ke mesulang er a bek el tekoi el moruul el kirek,’ e ngkmal di mo mesisiich a renguk! Aika el tekingel a ngosukak el mekiis er a next el day el kltmokl e soak el melemolem el obang.” A odam el Ahmadu me a bechil a oba niece er tir el smecher el epileptic e blechoel el mo kakar. Ngkiei lobengterir. A Ahmadu mesaod er a lerellii el mo er ngii sel loreng a sulel a niece er ngii el kmo: “Alta ngdiak lodengelii a klungel a sacrifice el ki moruul er ngii el kirel engdi ngkmal di mo ungil a renguk sel loreng a sulam me a lechub e nglulechesii a ‘I love you.’”

ROLEL A LOLEMOLEM EL DMEU A RENGUM

9. Ngmekera chad loba ta er a chad e sebechel moba klengariourreng?

⁹ Bo lengariou a rengum. (Osi. 11:2) Kede rokui el diak bo leblechoel el ngar ngii a temed me a lechub ngklisichel a bedenged el kutmokl a rokui el tekoi el soad. Me ngkirem el mo set a boundaries er kau el kmo ngngera sebechem me a diak el sebechem el meruul me a lebebil e ngmo kirem el kotouar er a chad. E tiang a kmal OK! Kau olecholt er a klengariourreng. E a lsekum a rebebil a offer lolengeseu e mkengei er tir me lengesukau. A odam el Jay a kmo: “Ngdiak el sebeched el remuul a rokui el tekoi. Sel bo dodengelii a limit er kid e diak doruul a tekoi el lengelakl er ngii e ngmo ngosukid el mo melemolem loba deurreng.”

10. Ngera uchul me ngklou a ultutelel a chad el loba ta er a chad a bo loba sekutaberreng? (Osisechakl 19:​11, NW)

¹⁰ Bo moba sekutaberreng. (Monguiu er a Osisechakl 19:​11, NW.a) Sel bo moba sekutaberreng e ngmo ngosukau el melemolem el chelellakl a rengum sel lebo er ngii a melasem er kau. A chad loba sekutaberreng a melasem el mo understand er a uchul me a chad a uaisei a blekerdelel. A bebil el rakt a rullii a chad el mo remuul a tekoi el diak el kse er ngii a uaisei. (Oli. 7:​7, NW) A lsekum koba chad el ngar ngii oberaod el secherel e nglocha mo ngosukau obo modengei a lmuut el betok el kirel ngii el rektel. El ua tiang, a chad el kmal ungil a omerellel me a cheldechedechal a locha mo soal di outoketok. Me a lechub e ngmo soal di complain me a lechub ngdi ngmasech a rengul. Sel bom understand er a secherel e ngmo sebechem el mesa el kmo chad a diak el soal uaisei er kau ngbai secherel a uchul me ngmo uaisei.—Osi. 14:29.

11. Tirke el oba chad ngngera el meklou a ultutelel el tekoi a kirir el mengetmokl a temir el meruul? (Psalm 132:​4, 5)

¹¹ Em make a taem el mo melisiich er a deleuill er kau me a Jehovah. A lebebil e ngmo kirem el mengesadel a temem el meruul a bebil el tekoi me lebo er ngii a enough el temem el meruul a “lmuut el meklou a ultutelel el tekoi.” (Fil. 1:​10, NW) A ta er aika el meklou a ultutelel el tekoi a melisiich er a deleuill er kau me a Jehovah. A David a mle king me ngkmal mle mechesang. Engdi omengull el mora Jehovah sel mle kot el klou a ultutelel el tekoi er a klengar er ngii. (Monguiu er a Psalm 132:​4, 5.) Ngdi osisiu, alta ke locha kmal mo mechesang engdi ngkirem el kutmeklii a taem er a bek el sils el mo menguiu er a Biblia e meluluuch. A odos el Elisha a kmo: “Sel kululuuch el mora Jehovah e kunguiu e kulebedebek a bades er a Psalm e ngcholleklii a renguk e ngosukak el mo melemolem loba deurreng. A nglunguuch a otil a renguk. Ak metik er ngak el kmo ak blechoel el meluluuch el betok el taem er a chelsel a sils er ngak el mengellakl er a renguk.”

12. Ngera uchul me a chad lobang a ta er a chad a kirel el make a taem el mo omekerreu er a health er ngii?

¹² Em make a taem el mo omekerreu er a health er kau. A rechad el mechesang el uai a chad lobang a ta er a chad a locha mo meringel er tir a metik a taem el mo omechar e meruul a kall el lungil er a bedengir. Engdi a ungil prokuram er a diet me a exercise a klou a ultutelel el kirel a physical me a mental health er kau. Me alta ngdiak el klou a temem engdi ngklou a ultutelel a omongang a kall el ungil er a bedengem e mblechoel el exercise. (Efe. 5:​15, 16) Me a lmuut kung ngkirel enough a cheliuem. (Oli. 4:6) A omesuub ochotii el kmo a cheliuaiu a sebechel remove a toxins er a brain er kau. A article el “How Sleep Can Affect Stress,” el lultebedii a Banner Health a kmo sel lungil a cheliuel a chad e ngdirrek el olengeasek a anxiety er ngii e ngosuir el mo meduch el handle a stress. Ngdirrek el kirem el mengoit a taem el meruul a tekoi er a rolel a omilil. (Oli. 8:15) A ta el odos a mesaod er a rullii me ngsebechel melemolem loba deurreng el kmo: “Sel lungil a eanged e ak melasem el mo rikl e melai a dichel a sils. Ngdirrek el tang er a chelsel a ta el buil e ak schedule er a sils er ngak el milil lobengkel a ta er a sechelik.”

13. Ngera uchul me ngungil a docherchur? (Osisechakl 17:22)

¹³ Mosiik a tekoi el rullau el mo ocherchur. (Monguiu er a Osisechakl 17:22; Oli. 3:​1, 4, NW) Ngungil el kirel a bedengem me a uldesuem sel mocherchur. Sel moba ta er a chad e ngblechoel el duubech a tekoi el dimlak em expect. A lsekum ngsebechem locherchur er a bai lengasech a rengum e ngmo ngosukau el mtekangel. E sel mocherchur lobengkel a chad el mobang e ngsebechel smisiich a deleongel er kemiu.

14. Ngmekera ngosukau a omongedecheduch er a sechelim?

¹⁴ Mongedecheduch er a sechelim el moumerang er ngii. Alta ke mora tkurrebab el sebechem el melemolem loba deurreng me nguaisei engdi ngdirk sebechem el mo feel er a klou el berraod. Ngar er a choua ikakid el taem e ngmo ngosukau omongedecheduch louchais a feelings er kau el mora sechelim el ngii a diak bo lerellau el mo feel bad el kirel aike el molekoi. (Osi. 17:17) Sel lorrenges er kau e lolisiich er kau e nglocha mo ngosukau el mo melemolem el loba deurreng.—Osi. 12:25.

15. Ngmekera omongedecheduch el mesaod er a Baradis e sebechel meskau a deurreng?

¹⁵ Em imagine er a klengar er kemiu el terung el ngar er a Baradis. Lak mobes el kmo a urerem lobang a di temporary me a Jehovah dimlak el moktek er ngii el kirir a rechad el mo meruul er a chouaisei el ureor. (2 Ko. 4:​16-18) Ngbai di kmedung e kede mo kiei loltirakl er a klengar el Jehovah a soal el kired. (1 Ti. 6:19) Ke ulterekokl el mo metik er a klou el deurreng sel mongedecheduch er a betik er a rengum el mesaod aike el bo moruul el terung er a Baradis. (Isa. 33:24; 65:21) A odos el Heather a kmo: “Ak blechoel melekoi er tirke el kulengeseu el obetiterir el kmo ngdi kmedung e aki mo dmak el merasem e dmak el remurt e dmak el ngar er a rrat. Aki mo bake a blauang e meruul a kall el kirir a rebetik er a rengmam el mo mekiis er a kodall. Aki dmak el mereng a sulel a Jehovah el kirel a omelatk el dobang.”

ROLEL A REBEBIL A SEBECHIR EL OLENGESEU

16. Ngmekera sebeched el ngosuir a chad el ngar er a ongdibel er kid el ngii oba chad? (Dirrek el momes er a siasing.)

¹⁶ Mngesuir me lebo er ngii a temel el meruul aike el soal. Kid a rudam me a rudos er a ongdibel a sebeched el offer el olengeseu er a smecher me a lechub ngchudelang. Seikid e ngmo er ngii a temir tirka el obetiterir el olengull me a lechub e te meruul aike el sorir el meruul. (Gal. 6:2) A rebebil publisher a mla rullii a schedule er tir er a every week el kirel tiang. A odos el Natalya lobang a bechil el paralyzed a kmo: “Ngngar ngii a odam er a ongdibel el mei el tang me a lechub ngeru el taem er a chelsel a ta el sandei el me mengoit a taem lobengkel a bechik. Te dmak lomerk er a klumech e chadecheduch, e dirrek el omes a movie. Aikang a kmal ileakl el taem er a rengul a bechik e dirrek el meskak a temek el mo remuul aike el soak el meruul el ua tuobed el mo walk.” Ngar er a chelsel a bebil el blekeradel e ngsebechem el offer el loba chad el smecher el mo tutau me ngike el lobang a sebechel mo ungil mechiuaiu.

17. Ngmekera sebeched el ngosuterir a rubetiterir a resmecher me a remechudelang sel temel a miting er a ongdibel?

¹⁷ Mngesuir er a temel a miting. A chad loba smecher a locha diak lebo el klou a lenguu er a miting er a ongdibel, circuit assembly, me a lechub ng convention e le ngmechesang loba betik er a rengul. Tirke el ngar er a ongdibel a sebechir el offer el ngosuir loeak a ledengchokl lobengkel a smecher me a lechub ngchudelang er a temel a bebil er aika el miting me a lechub ngtedebechel ngii el miting. A lsekum a chad a di ngar er a blai e ngsebechem el offer el mora blil e tie in el mora miting lobengkel me a chad lobang a sebechel kuk mora miting er a blil a ongdibel.

18. Ngera dirrek el sebeched el meruul er ngii el kirir tirke el loba smecher me a lechub ngchudelang?

¹⁸ Mchetengii e moluluuch el kirel. Remechuodel bo blechoel el mengoit a taem el melisiich er tirke el ngar ngii a chad el lobang. (Osi. 27:23) E kid el rokui a kired el blechoel el melekoi er tirke el ngar ngii a chad el lobang el kmo ngbetik a rengud er tir e oba omereng el saul el kirel aike el rokui el loruul. Ngdirrek el sebeched el lolengit er a Jehovah me lolemolem el melisiich er tir e lengesuterir me lak loridii a deurreng er tir.—2 Ko. 1:11.

19. Ngera kede omes el beduluchei el kirel?

¹⁹ Ngdi kmedung e a Jehovah mo smuld a rokui el chiuosech er a medad el ringel a uchul. Ngmo diak a secher me a kodall. (Och. 21:​3, 4) “A re chitechut a mo melechesokl e meloik.” (Isa. 35:​5, 6) Seikid ngmo diak dechuarm er a ringelel a cheluodel me a lechub ngringelel obang a betik er a rengud. “A ikel dilubech el tekoi er a ngar a mong a kmal di mo diak a melatk.” (Isa. 65:17) Mo lmuut er chelechang el dongiil er a otutel a omelatk el dobang me a Jehovah diak lebo el chitid. A lsekum kede melemolem el ultuil er ngii el kirel a klisiich, e ngmo ngosukid el “outekangel er a rokui el tekoi el di ungil a [rengud].”—Kol. 1:11.