Ongeteruich ma Ongede el Suobel
Ngmekerang e Sebechem el Metik er a Mera el Klechelid?
A rokui el klechelid ngoldeu er a rengul a Dios, ma lechub e ngdi ta el klechelid? (1)
Ngera me ngkmal betok a klechelid el melekoi el kmo te Kristiano? (2)
Ngmekerang e sebechem el dongcheterir a remera el Kristiano? (3-7)
1. A Jesus a milechelii a di chimo el mera el klechelid er a Rekristiano. Me chelecha el sils e ngulterekokl el ngar er ngii a di ta el chelechad, ma lechub e ngcheldebechel, el mera el mengull er a Jehovah el Dios. (Johanes 4:23, 24; Efesus 4:4, 5) A Biblia a olisechakl el kmo te di mekesai el chad a ngar er sel obutek el rael el mo er a klengar.—Matteus 7:13, 14.
2. A Biblia a ulemlaoch el kmo uriul er a kodellir a rechapostol, e a klsuul el losisechakl ma omeruul el diak leblekerdelir a Rekristiano a mekekokil el merael el me soiseb er a chelsel a ongdibel er a Rekristiano. Te ngar er ngii a rechad el mo melasem el mengetikaik er a rechad el mo oltirakl er tir er a bai loltirakl er a Kristus. (Matteus 7:15, 21-23; Rellir 20:29, 30) Seikid a uchul me kede mes a kmal betok el klechelid el melekoi el kmo te Kristiano. Me ngmekerang e sebeched el dongcheterir a remera el Kristiano?
3. Sel kot el ngar er a bab el olengchelir a remera el Kristiano a kmo ngngar er ngii a mera el bltikerreng er a delongelir. (Johanes 13:34, 35) Ngdiak lemosisechakl el mo omdasu el kmo te kuk ungil er a rebebil er a rechad ma lechub e tirke el kuk ngodech a color er a bedengir. Ngdirrek el diak lemosisechakl el mo ouketui er a rechad er a kuk bebil er a beluu. (Rellir 10:34, 35) Seikid a uchul me ngdiak lebo lteloi er a mekemad. Ma omerellir a remera el Kristiano el mo er a tang ma tang a di ua lebo er a rudam ma rudos er tir.—1 Johanes 4:20, 21.
4. A ta er a olengchelel a mera el klechelid a kmo a rechedal ngii el klechelid a oba dmolech el lomengull el mo er a Biblia. Te kongei er ngii el kmo ngmera el Tekingel a Dios e oumerang aike el lolekoi. (Johanes 17:17; 2 Timoteus 3:16, 17) Te omes a Tekingel a Dios el kmo ngkuk klou a ultutelel er a di uldesuir a rechad ma lechub e ngsiukang er tir. (Matteus 15:1-3, 7-9) Te melasem el loltaut a tekoi el lolekoi a Biblia er a chelsel a klengar er tir er a bek el sils. Me seikid e ngdiak lomerk er a ta er a tekoi e tir loruul a kuk bebil.—Titus 1:15, 16.
5. A mera el klechelid a dirrek el kirel el mengedaol er a ngklel a Dios. (Matteus 6:9) A Jesus a ulechotii a ngklel a Dios, el Jehovah, el mo er a rebebil. Ma remera el Kristiano a dirrek el kirir el meruul el uaisei. (Johanes 17:6, 26; Rom 10:13, 14) Te ngera el chad el ngar er a chelsel a beluu el mkiei er ngii a ouchais er a rebebil er a ngklel a Dios?
6. A remera el Kristiano a kirir el lomerk el kirel a Rengedel a Dios. A Jesus a mirruul el uaisei. Ngmle blechoel el mesaod er a Renged. (Lukas 8:1) Ngdirrek el mlellach er a redisciplo er ngii el mo omerk er a osisiu el klumech el mo er a beluulechad el rokir. (Matteus 24:14; 28:19, 20) A remera el Kristiano a oumerang el kmo ngdi ta el Rengedel a Dios a sebechel el mo rullii a mera el budech ma ulekerreu er tia el chutem.—Psalm 146:3-5.
7. A redisciplo er a Jesus a diak el kirir el mo teloi er tia el mekngit el blekeradel er a beluulechad. (Johanes 17:16) Ngdiak bo longesechusem er tir er a tekoi er a politiks er a beluulechad ma ka bo el teloi er aike el meklou el luldikel el ngar er ngii er a chelsel a beluu. Te mengeroid er tir er a mekngit el blekeradel, ma omeruul, ma teletael el kora rolel a klengar er tia el beluulechad. (Jakobus 1:27; 4:4) Kau ngsebechem el dongchii a cheldebechel er a klechelid el ngar er a chelsel a beluam el tir a olecholt aika el olengchelir a remera el Kristiano?
[Siasing el ngar er a 26, 27 el llel]
A remera el Kristiano a kaubltikerreng, e mengull er a Biblia, e omerk el kirel a Rengedel a Dios