A Babier el Mla er a Rechelechad er a Ruungerachel

Betik er a Rengmam el Kldemam el Sioning er a Jehovah:

Kede kmal ngeltengat er a techall el sebeched el oba ngklel a Imong el Kedidai er a uldekial a eanged me a chutem, el Jehovah! Tia el ngakl a di ngar er ngii el mo cherechar e diak el ngemed me a diak a mekesiur. Ngii el Jehovah a milskid a ngklel el dobang e olecholt er ngii, el ileakl er sera 1931 el mei, e kede meldangch el obengkel ngii el ngakl. (Isa. 43:10) Me ngklou el chetengakl el sebeched el medangch el kmo kede Sioning er a Jehovah.

A Diabelong a kmal diak lemekimd el melasem el omart er a ngklel a Dios. Me ngngar er a cheungel a klisichel, e aika el renged a oltngakl er a ngklel a Jehovah. A Kloul Babilon, el cheldellel a klsuul el klechelid er a beluulechad el rokir, a ouketui er tia el chedaol el ngakl e mla otebedii er a betok el oidel a Biblia. Ngar er a kuk bitang, e a Jesus a milengebkall er a ngklel a Demal, e rirellii el mo kot el ngaruchei el tekoi er a chelsel sel kerebai el nglunguuch el lullisechakl er ngii er a rulebengkel. Ngdilu el kmo: “Misei e moluluuch el ua ika el kmo: A Demmam el ngara eanged, le mechedaol a ngklem.” (Mt. 6:9) E a uriul, me loluluuch el kmal ngar er a rengul el mo er a Demal, e ngdilu el kmo: “Ak mla mo ochotii a ngklem er tirikel chad el mngiliiteterir ra belulechad el meskak.” (Jn. 17:6) Me a leuaisei el soad el oltirakl er a ungil el kerebil a Jesus, e ngkirel el mengal mo blak a rengud el ouchais er a ngklel a Jehovah el mo er a bek el merekelel a beluulechad.

A bades er a rak er a 2009 el kmo, “Mo cherrungel el olecholt er a Evangkelio,” a millisiich er kid el mo churrungel a omesiunged. (Rel. 20:24) Ngulterekokl a Jehovah el kmal ulemekngeltengat a urered er tia el mlo merek el rak er a omesiou. Ngklou el ureor er a klsioning a mleketmokl er a beluulechad el rokir el kirel a klebkellel me a odengesel a ngklel a Jehovah. A beches el ildois er a rechad el mla mo oldingel el 7,313,173 a dilak el omerk el mo er a rokui el chad, e dirrek el ullisechakl er tirke el melemalt a rengrir el osiik a semecheklel a betok el mondai el chelebangel er a bek el sils. A re 18,168,323 el mlo kldibel er a Chedaol el Blsoil er a kodellel a Kristus a olecholt el kmo ngdirk ngar er ngii a relmuut el betok el miliol el chad el dirk sebechir el mo omekedong er a ngklel a Jehovah er a uchei er a ulebongel er tia el mekngit el blekeradel er a beluulechad.

Me sel klemengetel el dirk el kengei a Jehovah, e kede melemolem el omerk er tia el ungil el chais er a Renged el oba blakerreng, el lousbech a ngii di el rolel e ngmo sebeched el mengedecheduch er a rechad el ngar er a basio el domerk er a klumech er ngii. (Mt. 24:14; Mk. 13:10) Me a dengar er a blai el mo er a blai, dongedecheduch er a rechad el ngar er a rael, doluches a babier me a lechub e doudengua, me a lechub e kede mengedecheduch er a rechad er a taem el diak doldingel, e bo el blak a rengud el mo olecholt er a ngklel a Jehovah me a moktek er ngii el mo er tirke el rokui el sebeched el mengedecheduch er tir.

Ngbetok a ungil el uchul e ngsebeched el oumerang el kmo a Jehovah a di kmedung e ngmo mengikiid er a ngklel. (Ese. 36:23) Ngdi kmedung e ngmei sel taem el tirke el rokui el oltuub er a ngklel a bo lebutek a ngerir. Ngkol ua ngera el kebkall el sils a mo er ngii el kirir a rokui el blak a rengrir el mesiungel a Jehovah, el tir a uluuchais er a ngklel e millisiich er a omengederederel er a uldekial a eanged me a chutem!

A bltkil a rengul a Jehovah el mo er a rechedal a bleketakl el mlocholt er sel “Mongkar” el Klou el Ongdibel er a 2009 el mla er ngii el meliuekl er a oumesingd el beluu er a beluulechad. Aika el ongdibel a ulebeketakl el bebil er a meklou a ultutelel el tekoi er a reksi er a ongdibel er kid, el melisiich er kid el mengal mo ungil el medengei el kmo ngkired el blechoel el di klekar el kirel a sils er a Jehovah.​—Mk. 13:37; 1 Th. 5:1, 2, 4.

A Jehovah a mera el ungil er kid, e omekeek er a rengud er a deurreng. Ngongellid er a basio el mellekulek a chudel er ngii, e mengetikaik er kid el mo er a chelellakl el ralm.​—Psa. 23:​1, 2; 100:2, 5.

Bo lulterekokl a rengum er a klengeltengat el lebeskau a Jehovah a omolemolem el blak a rengum er a omesiungem er aika el merael el mei el buil!

Oba mekeald el bltikerreng er a Rekristiano el mo er a rudam er kemam er a beluulechad el rokir,

Rudam er kemiu,

Rechelechad er a Ruungerachel er a Resioning er a Jehovah