Dousbech er a “Ngera Sebeched el Suub er a Tekingel a Dios?” el Omuchel a Cheldechedechad

1. Ngera el beches el babier a bla denguu el kirel a omesiunged?

¹ A Chelechad er a Ruungerachel a mla otebedii a babier el “Ngera Sebeched el Suub er a Tekingel a Dios?” el ngar er a betok el omelekoi.a Me ngmekerang a dousbech er tia el babier sel dongetmokl er kid el kirel a odingel? Tiang a di ua Reasoning el babier el oldak aike el bades el mesaod er a di ta el tekoi, me ngkmal ungil el dousbech er ngii el omuchel a cheldechedechad.

2. Ngmekerang a dousbech er a babier el “Ngera Sebeched el Suub er a Tekingel a Dios?” sel doldingel?

² Nglocha sebechem el ousbech er sel 8 el ker e kmo: “Aki di oldingel er a rechad er a belumiu e le te betok a oker el kmo, ‘A Dios ngmera el uchul a ringel el mo er a rechad?’ [Ngar er a bebil el beluu, e ngungil el dochotii a ker el mo er a chad.] Ngera uldesuem? [Mongiil er a nger er ngii.] A Biblia a meskid a kmal ungil el nger er tia el ker.” Monguiu e mosaod er a 1 me a lechub a bebil el bades el ngar er a Biblia er kau. Me a lsekum ngii el chad a semeriar e ngsebechem el ocholt aike el 20 el ker el ngar er a uchelel tia el babier e mdu er ngii me lengiltii a soal el bo mosaod er ngii sel mluut el mong. Me a lechub e ke msang a ta er aike el babier el dousbech er ngii el mesuub el ngar er ngii a lmuut el bebil er a omesodel a tekoi el mosaod er ngii el terung.

3. Ngmekerang a dousbech er a babier el “Ngera Sebeched el Suub er a Tekingel a Dios?” sel doldingel aike el basio el rechad er ngii a diak el Kristiano?

³ Aike el ker er a 4, me a 13-17, a kmal ungil el dousbech sel doldingel er aike el basio el rechad er ngii a diak el Kristiano. El ua tiang, ngsebechem el ousbech aike el tekoi er sel 17 el ker e kmo: “Aki di oldingel e mengedecheduch er a rechad el melasem el olengeseu a telungalek. Me kau, ke kongei el kmo a telungalek er chelechang a chelebangel a betok el omelsemai? [Mongiil er a nger er ngii.] A rebetok el obekel a mla metik a klungiolir sel loltaut aika el tekoi: A “re bek el redil a kmal kirir el mengull er a re becherir.” [Ngungil a lak mouchais el kmo tiang a mlengai er a Efesus 5:33. Me a lsekum ke mengedecheduch er a redil e ngsebechem el mesaod aike el tekoi el ngar er a Efesus 5:28.] Omomdasu e ngmo uchul a klungiolel a chebechiil a lsekum a rubekel a oltaut aika el tekoi?”

4. Ke mo mekerang er sel ulebongel er a cheldechedecham el obengkel a chad el diak el Kristiano?

⁴ Me a rekil a cheldechedechemiu e mketmeklii a ta er taem el mluut el mong e molemolem el mesaod aika el tekoi. Nglocha sebechem el mo mesaod er a ta er a tekoi el ousbech aike el bades el mulsaod. Me a lebo er ngii a techellem, e mouchais er a chad er a blai el kmo a tekoi el mulsaod el obengkel a mengai er a Biblia. Bsang a babier el momdasu e ngsoal, e tiang a di mo ultuil er a cheldechedechemiu me a dirrek el uldesuel el kirel a Biblia.​—Momes er a 3-6 el llel sel December 2013 el Omesiunged el Kirel a Renged.