A NGER ER AIKE EL KER ER A BIBLIA

Ngsebeched el mo ungil medengelii a Biblia?

A Biblia a Tekingel a Dios. Ngdi uai a babier el mla er a betik a rengul el chedam. (2 Timothy 3:16) Ngar er a Biblia, e a Dios a mesaod a rolel e ngsebeched el oldeu er a rengul, me a uchul e ngomechei a mekngit el tekoi me ngduubech, me aike el bo loruul el kirel a klechad er a ngar medad el klebesei. Me nguaisei, engdi a rulisechakl a klechelid a mla chouid a osisechakl er a Biblia el uchul me a rebetok el chad a omdasu el kmo ngdiak el sebechir el mo ungil medengelii a Biblia.​—Rellir 20:29, 30.

A Jehovah el Dios a soal a bo dodengelii a klemerang el kirel. Sei a uchul me ngmla meskid a babier el sebeched el mo ungil medengelii.​—Monguiu er a 1 Timothy 2:3, 4.

Ngmekerang e sebechem el mo ungil medengelii a Biblia?

A Jehovah a dimlak di lebeskid a Biblia, e ngbai dirrek el milskid a ngeso me bo dungil el medengelii. Nguldureklii a Jesus el me olisechakl er kid. (Lukas 4:16-21) A Jesus a ullengeseu er tirke el ulerrenges er ngii el mo ungil medengei a Bades, el oeak a louderta er aika el bades el mesaod.​—Monguiu er a Lukas 24:27, 32, 45.

A Jesus a miluchelii a ongdibel me bo el sebechel el melemolem a ureor el lulemuchel er ngii. (Mateus 28:19, 20) Chelecha el taem, e a remera el oltirakl er a Jesus a olengeseu er a rechad el mo ungil medengei aike el lolisechakl a Biblia el kirel a Dios. A lsekum e ngsoam el mo ungil medengelii a Biblia, e a Resioning er a Jehovah a dmeu a rengrir el mo olengeseu er kau.​—Monguiu er a Rellir 8:30, 31.