Kede Milekerang e Mlo Chad?

A Genesis, el kot el babier er a Biblia a mesaod er a uchelel a eanged me a chutem el ousbech a di mekesai el tekoi el kmo: “Ser a lomuchel a Dios el omeob er a beluulchad ma bek el tekoi el ngar a melidiul.” (Genesis 1:1) Me a uriul er a lomeob a dellomel me a charm, e a Dios a milebeterir tirke el kot el chad, el Adam me a Eva. Te kuk mle ngodech er a charm e le te ullab a bebil el blekerdelel a Dios, el uldimukl er a llemeltir el melilt a tekoi. Me tiang a uchul me ngkirir el mo mesaod er tir el kirel a omerellir. Me a lsekum e te olengesenges aike el ulekrael er a Dios, e ngmo sebechir el oureor el oltaut er a moktek er a Dios, el mo kot el chedam me a chedil er a telungalek er a klechad el mo oldeu a rengrir er a cherrungel el klengar el ngar er a budech er tia el chutem el mo cherechar.

Engdi a ta el anghel a uluusbech er a techellel el mlo sebechel el mengesuseu er a rechad el di mo meruul a soal. Seikid e ngmlo Satan, el belkul a kmo “Ngike el Omtok.” Me ngii el Satan a milengedecheduch el okiu a bersoech e chilebeldir a Eva er a ledu er ngii el kmo ngmo uchul a klungiolel a lak loltirakl a ulekrael er a Dios. Me a Adam me a Eva a uleltirakl er a Satan me te tilemellii sel deleuill er tir el obengkel Ngike el Ulemeob er tir. Tia el mekngit el omelilt er tir a uchul, me a kot el demad me a delad a urridii sel diak a ulebengelel el klengar e uliuelii el mei er kid el rokui a klengit, diak el cherrungel el blekeradel, me a kodall.

A Dios a di mle mereched el ouchais er a uldesuel el mo mesmechokl er tia el chelebuul e mesterir a ruldidellel a Adam a rolel e ngmo sebechir el nguu a diak a ulebengelel el klengar. A Dios a ulemlaoch el kirel a ‘uldidellel a rasech,’ el ngii a ileakl el chad, el mo okngemedii a Satan e sumechokl a rokui el ringel el lulemekdubech a Satan, Adam me a Eva. (Genesis 3:15) Ngtechang ngika el ‘uldidellel a rasech’? Kede mo medengei er a uriul.

Cherengel a taem, e a Satan a mle blechoel el melasem el melemall er sel ungil el moktek er a Dios. A klengit me a chelebirukel el omeruul a di mle mereched el oberk. Me a Dios a tilbir el mo olekngemed er a remekngit el chad el okiu a ieleb. Ngdilu er a melemalt el chad el Noah me loleketek er a arhe, el ngii a klou el omechakl el baks, el mo olsobel er ngii me a telungalek er ngii me aike el charm el mle kirel el lolsiseb er a arhe.

A ta el rak er a uriul er a lomuchel a Ieleb, e a Noah me a telungalek er ngii a tilobed er a arhe el mo er a mla mekikiid el chutem. Engdi a ‘uldidellel a rasech’ a dirkak el be lduum.

​—Mlengai er a Genesis 1-11 el bliongel; Jude 6, 14, 15; Ocholt 12:9.