Rolel e Ngmo Diak a Mekemad me a Klautok

A DIOS A MO OKNGEMED A KABELMENT ER A RECHAD

A Dios a mo okngemed a rokui el kabelment er a rechad loeak a mekemad el Biblia omekedong er ngii el kmo ng Armakedon.a (Ocholt 16:16) Tiakid el taem e a “re king er a beluulchad el rokir” a mo mekideb el “kirel sel mekemad el mor ngii er sel klou el Sils er a Dios el Olab a Bek el Klisiich.” (Ocholt 16:14) A Armakedon a mekemedil a Dios el olekngemed a rokui el mekemad.

A Dios a mo mtechei a kabelment er a rechad loba Rengedel me a lechub e ngkabelment er ngii, el ngii a mo ngar er a eanged e mengedereder e diak a sebechel mo okngemedii. (Daniel 2:44) A Dios a mla ngiltii a Ngelekel er a Jesus Kristus el mo King er ngii. (Isaia 9:​6, 7; Mateus 28:18) Tiakid el kabelment a sel Rengedb el Jesus a ullisechakl er a rultirakl er ngii el mo meluluuch el kirel. (Mateus 6:​9, 10) A rokui el chad a mo tang el ngar er cheungel a chimo el kabelment el longedereder er ngii a Jesus.

A Jesus a diak el ua rechad el mengedereder el lousbech er a klisichir el meruul a mo klungiolir. Ngbai ngii el melemalt omerellel e diak longetukel a uchul me ngdiak a chad el mo mechoit. (Isaia 11:​3, 4) Me a rechad a mo diak lousbech el mo oureor el melai a llemeltir. E ngerang? E le Jesus a oureor el kirel a ulekerreuil a rederta el chad. “Ng olsobel er a re mechebuul el tirkel omekedong er ngii, me tirkel metacherbesrir ma re cheloit el chad. . . . Ng olsobel er tir er a ulecheracheb ma mekngit el bekeu el omeruul.”—Psalm 72:​12-14.

A Rengedel a Dios a mo ngmai a rokui el omekodall el klekedall me ngmo diak er a beluulechad. (Mika 4:3) Ngdirrek el mo diak a remekngit el chad el diak el sorir el stob loldechelakl me a lechub te melemall er a budech er a rebebil. (Psalm 37:​9, 10) A rokui el sechal, redil, me a rengalek a mo feel el safe er a ngii di el basio er a beluulechad.—Esekiel 34:28.

A rechad a mo oldeu a rengrir el kiei er a chutem el ngar cheungel a kabelment er a Dios e le rokui el tekoi a di mo ungil. Tia mo choroid aike el rokui el mondai luchul me a rechad a kaudechelakl, el ua chelebuul, klengerenger, me a techerelbesul a delengchokl. Rokui a mo sebechir el mengang a betok el kall lungil er a bedenged e mo er ngii a ungil el delengcheklir.—Psalm 72:16; Isaia 65:​21-23.

Ngar cheungel a Rengedel a Dios e ngmo diak aike el rokui el telemellel a mekemad. Tia diak di losaod a telemellel a bedenged ngdirrek el melutk el kirel a telemellel a uldasu me a reng el rechad a chuarm er chelechang el mekemad a uchul. Mo lmuut er tirke el mla mad me te mo mekiis er a kodall. (Isaia 25:8; 26:19; 35:​5, 6) A retelungalek a lmuut el mo kasoues me a mekngit el memory er kid er a mekemad a mo ta er aike el “di mla tekoi [el] mla mo diak.”—Ocholt 21:4.

A DIOS A MO OKNGEMEDII A KLENGIT

A Rengedel a Dios a mo oldak er a rechad el mo mengull er a di ta el mera el Dios el Jehovah,c el “Dios er a bltikerreng ma budech.” (2 Korinth 13:11) Me a rechad a mo suubii el mo meduch el kiei el ngar er a budech. (Isaia 2:​3, 4; 11:9) Tirke el rokui el mo oltaut aike el losuub a mo mengubet er a klisichel a klengit.—Rom 8:​20, 21.

A DIOS A MO OKNGEMEDII A SATAN ME A REMEKNGIT EL ANGHEL ER NGII

A Rengedel a Dios a mo okngemedii ngike el omuchel a mekemad, el ngii a Satan me a remekngit el anghel er ngii. (Ocholt 20:​1-3, 10) Tir el mo diak a uchul me a budech a mo oberk er a beluulechad el rokir.—Psalm 72:​7, NW.

Ngkmal sebechel mo ulterekokl a rengum el kmo a telbilel a Dios el mo olekngemed a mekemad me a klautok a mera el mo klemerang. Ngngar ngii a klisichel me a dirrek el urungulel el mo okngemedii a mekemad.

• A Dios a oba llomeserreng me a klisiich el dousbech er ngii el mo okngemedii a mekemad me a omelemall er a rechad. (Job 9:4) Ngdiak a tekoi el sebechel stob er ngii el meruul er a soal.—Job 42:2.

• A Dios a chetil lomes er a rechad el chuarm. (Isaia 63:​9, NW) Ngdirrek el louketui er “ngikel soal el meruul a delengerenger.”—Psalm 11:5.

• A Dios a blechoel el lotirakl a tekingel. Ngdiak el sebechel lomulak.—Isaia 55:​10, 11; Titus 1:2.