Ngimbo
Gudi mutuameji wa miziki. Lungimbo lua Davidi.
14 Athu aheya adi muzuela mu mitshima yawo egi:
“Yehowa gana khala ndo guene.”
Makalegelo awo adi abola, adi mukalagala ndaga jia usala;
gushigo nga nu muthu udi mutshita ndaga jiabonga.
2 Uvi Yehowa mu dilu, wana tala ana a athu ha mavu
ha gumona gula gudi nu muthu watema, nga nu muthu udi mukamba Yehowa.
3 Mukut’awo agasue ajimbidile gale njila yabonga;
mukut’awo agasue adi athu abola.
Gushigo nga nu muthu udi mutshita ndaga jiabonga,
nga mumoshi ndo.
4 Mukatshi dia athu awa abola, gushigo nga nu muthu udi mukotelesa ba?
Adi mudia athu ami gifua luholo ana dia mapha.
Ana kombelelago Yehowa.
5 Uvi mbaavua woma wakola,
handaga Yehowa udi nu gindongo gia athu abonga.
6 Enue athu abola, mudi mukamba gubolesa ndaga jidi mutshita muthu udi mu lamba,
uvi Yehowa udi fundo dienji dia gulengela.
7 Ngudi mukombelela egi guhuluga gua Isalele guzogele gu Siona!
Tangua Yehowa mbawubungisa athu enji adi mu uhiga,
Yakoba asuanguluge, ayi, Isalele asuanguluge.