Heta Gusuanguluga Tangua udi Munengena Yehowa nu Guhuiminyina Guagasue
WANA nengena ha gumona tangua Yehowa mbawusugisa ndaga jiabola nu mbawubuisa ima yagasue ihe-ihe ba? (Gumo. 21:1-5) Idi ngenyi! Uvi, yana khalago yaleba tangua diagasue ha gunengena Yehowa nu guhuiminyina, gula tudi mutagana nu malamba. Tuajiya guleba muila gula ndaga imoshi tuakhadi munengena yatagenelego gifua luholo tudi gudifelela.—Ish. 13:12.
Yehowa udi gututoga ha gunengenena nu guhuiminyina guagasue egi atshite ndaga mu tangua diatombele muene. Mukunda natshi Yehowa udi gututoga ha gunengenena? Itshi yajiya gutukuatesa ha gukhala nu gusuanguluga tangua tudi gumunengenena?
MUKUNDA NATSHI YEHOWA UDI GUTUTOGA HA GUMUNENGENENA?
Biblia yana zuela egi: ‘Yehowa wana nengena nu guhuimimyina guagasue ha gumimonesela mutshima wabonga, nu mbawumivuila diago khenda. Handaga Yehowa udi Nzambi watagana. Athu adi mulandula gumunengena adi nu gusuanguluga.’ (Yesh. 30:18) Mbimbi eji jidi mu mukanda wa Yeshaya jiasonegewe thomo mukunda nu enya Yuda. (Yesh. 30:1) Uvi mbimbi eji jiakhalele nji muhana felela gudi athu ako anyi akhalele mukombelela Yehowa mukatshi dia enya Yuda. Mangino nji, mbimbi jiene jiana hana felela gudi akombeledi a Yehowa a gujinginyina.
Hene, tudi naye gunengena nu guiminyina guagasue gifua Yehowa. Wahagele gale tangua mbadishiya muene mavu awa abola, wana nengena egi lusugu luene nu tangua diene ditagane. (Mat. 24:36) Mu tangua diene, mambo anyi Diabulu wana mbila Yehowa nu akombeledi enji, mbaazoga haphelo. Gungima, Yehowa mbawushiya Satana nu athu agasue adi gu khanda yenji, uvi esue ‘mbawutuvila khenda.’
Mangino, Yehowa khenji gakatula ndo malamba tudi mutagana nawo, uvi udi gutuwambela egi tuajiya gukhala nu gusuanguluga ha tudi gumunenga. Gifua muazuelele Yeshaya, tuajiya gukhala nu gusuanguluga ha tudi munenga egi ndaga imoshi yabonga ikalegewe muphushi. (Yesh. 30:18)a Luholo lutshi tuajiya guheta gusuanguluga guene? Gudi nu ndanga nguana jiajiya gutukuatesa.
LUHOLO TUAJIYA GUHETA GUSUANGULUGA HA TUDI MUNENGENA
Tangiza ndaga jiabonga jiana gugusuanguluisa. Fumu Davidi wamonele ndaga jiavula jiabola mu monyo wenji. (Ngi. 37:35) Uvi, wasonegele egi: ‘Khala tedie gutuama dia Yehowa, munengenene nu mutshima zagu-zagu. Uvuigo khabu mukunda nu muthu wabola udi mukalagala midimo yenji yabola.’ (Ngi. 37:7) Davidi walanduile longo edi, wakhalele muhaga mutshima phamba mu laji diamulayele Yehowa egi mbawumuhuluisa. Wakhalele nji mumona ndaga jiagasue jiabonga jiakhalele gumukalegela Yehowa. (Ngi. 40:5) Gula esue nji tudi mutangiza ndaga jiabonga mu monyo wetu nu tushigo mutala phamba malamba tudi mutagana nawo, mbatumona egi idi yaleba ha gunengena Yehowa.
Kalegela ba okazio agasue ha gutumbuisa Yehowa. Muthu wasonegele mukanda wa Ngimbo 71 yajiya gukhala Davidi, wazuelele egi: ‘Mbangulandula gugunengena; mbangugutumbuisa luko muavula.’ (Ngi. 71:14) Luholo lutshi luatumbuishile muene Yehowa? Wawambelele athu ako ndaga jiatadila Yehowa nu wamutumbuishile mu ngimbo. (Ngi. 71:16, 23) Esue nji tuajiya guheta gusuanguluga tangua tudi munengena Yehowa gifua Davidi. Tuana gumutumbuisa tangua tuana longesa lukuma luabonga gudi mafuta etu, enya fami yetu nu athu ako, nu tangua tuana yimba ngimbo jietu. Gula udi muyimba lungimbo luetu lua Ufumu, tangigiza muabonga mbimbi jidi mu lungimbo luene nu luholo luajiya gugusuanguluisa
Heta gikhesa ha udi mubalegesa tangua hamoshi nu aphangi a mala nu a akhetu. Tangua Davidi watagenele nu malamba, wawambelele Yehowa egi: ‘Mbanguhaga felela gu jina diaye, gutuama dia akombeledi aye a gujinginyina.’ (Ngi. 52:9) Esue nji, ha guheta gikhesa gudi aphangi’etu, tushigo naye phamba guya nawo mu gudibungisa gua mu hungu nga mu mudimo wa gulongesa, uvi tudi naye nji gubalegesa nawo tangua hamoshi.—Roma 1:11, 12.
Kolesa felela diaye. Mukanda wa Ngimbo 62:5 udi muzuela egi: ‘Ngudi munengena Yehowa tedie handaga felela diami diana katuga gudi muene.’ Idi nu ndando ha gukhala nu gutshigina guakola gula gisugishilo gia mavu awa gishigo muza muphushi gifua luholo tuakhalele gudifelela. Tudi naye gusha mutshima egi Yehowa mbawutagenesa ndaga jialeyele muene ikhale tudi mumona egi jidi mushipha muavula. Tuajiya gukolesa gutshigina guetu gula tudi mutanga Mbimbi ya Nzambi, yakotelesa egi, gula tudi mutangigiza ba profesi adi mu Biblia nu luholo mikanda ya Biblia yana gudivua, nu luholo Yehowa wana monesa makalegelo enji. (Ngi. 1:2, 3) Tudi naye gulandula ‘gukombelela mu utuameji wa nyuma ya Nzambi’ ha gubamba ufuta wabonga nu Yehowa tangua tudi munengena gutagenesewa gua laji dia monyo wa ivo nu ivo.—Yuda 20, 21.
Sha mutshima gifua Fumu Davidi egi, Yehowa wana mona athu agasue ana gumunengena nu wana guamonesela guzumba gua giamatshidia. (Ngi. 33:18, 22) Landula gunengena Yehowa nu guhuiminyina guagasue ha udi musuanguluga nu ima udi nayo, ha udi gumutumbuisa nu guhana aphangi gikhesa nu tangua udi mulandula gukolesa felela diaye.
a Mbimbi ya gishina yabalumuiwe egi: “Gulandula gunengenena,” yajiya nji gukotelesa luko egi, “gudifelela mu ndaga imoshi idi naye gukalegewa,” idi mumonesa egi ishigo yabola ha gunengena egi Yehowa amanesele malamba.