Hunji dia Akulu Atuameji Diaheta Aphangi ako Mbadi

MU LUSUGU lua 18 Janvier 2023, kominike imoshi yazogele mu jw.org yakhalele muzuela egi phangi Gage Fleegle nu phangi Jeffrey Winder atombewa ha gukalagala mudimo gu Hunji dia Akulu Atuameji dia Matemue a Yehowa. Aphangi ene muyadi ana kalegela gale Yehowa mudimo nu gujinginyina guagasue ivo yavula.

Phangi Fleegle wakudile mu dimbo dia Pennsylvanie gu États-Unis, mvuaji jienji jiamulongesele giamatshidia. Hakhalele muene muvuala, fami yawo ayile mu gadimbo gazonda gakhalele nu funu ya alongeshi avula. Gungima wabatijiwe mu lusugu lua 20 Novembre 1988.

Mvuaji jia phangi Fleegle jiakhalele gumuwambela tangua diagasue egi gukalegela Yehowa mudimo wa tangua diagasue gudi nu ndando. Akhalele muyamba muavula atadi awendji nu aphangi a gu Betele gumbo diawo; phangi Fleegle wakhalele nji mumona egi aphangi ene akhalele nu gusuanguluga handaga akhalele mukalagala mudimo wa tangua diagasue. Mbeji jiazonda gungima dia gubatijiwa guenji, wabuile muvundji wa njila wa tangua diagasue mu 1 Septembre 1989. Ivo mbadi gungima, wasendesele gutshita mudimo gu Betele, handaga diene felela diadishidile muene hakhalele muene nu ivo 12. Wasendesele mudimo wene gu Betele ya gu Brooklyn mu mbeji ya Octobre 1991.

Phangi Fleegle wakalegele ivo 8 gu departema yakhalele nu bamashine akhalele muzola mikanda (atelier de reliure), gungima wasendesele gukalagala mudimo gu département pour le service. Mu tangua diene dimoshi, wakhalele mu hungu dia zuelelo dia Russe, watshitshile muene ivo yazonda ha guakuatesa. Mu 2006 wazudile mukaji’enji Nadia mu ulo, gungima muene nu mukaji’enji alanduile gutshita mudimo wawo gu Betele. Mukut’awo agasue mbadi ayile muhana mago mu mudimo wa gulongesa mu hungu dia zuelelo dia Portugais, gungima atshitshile ivo 10 mu hungu dia zuelelo dia Espagnole. Gungima dia ivo yavula, Phangi Fleegle wasendesele gutshita mudimo gu biro ya Comité pour l’enseignement, gungima dienji wayile gu biro ya Comité pour le service. Mu Mars 2022, wabuile mukuateshi gu Comité pour le service ya Hunji dia Akulu Atuameji.

Phangi Winder wakudile gu Murrieta mu dimbo dia Californie gu États-Unis. Mvuaji jienji jiamulongesele giamatshidia, wabatijiwe mu lusugu lua 29 Mars 1986. Mu mbeji yalanduile, wabuile muvundji wa njila wa tangua diazonda. Wasuangulugile muavula nu mudimo wene, hene walanduile guwukalagala. Gungima dia mbeji jiavula, mu 1 Octobre 1986 wabuile muvundji wa njila wa tangua diagasue.

Hakhalele muene muvuala, phangi Winder wayile mutala aphangi’enji mbadi a mala akhalele mutshita mudimo gu Betele mu tangua diene. Ndaga yene wamuhanele nzala ya gutshita mudimo gu Betele hakudile muene. Mu Mai 1990, amutamegele ha gukalagala mudimo gu Betele ya gu Wallkill.

Phangi Winder wakalegele mudimo mu badepartema avula gu Betele gifua gu service maison, gungima wayile mutshita mudimo gu ferme nu gu bureau du Béthel. Mu 1997, wazudile mukaj’enji Angela mu ulo; mukut’awo agasue mbadi ana landula gukalagala mudimo gu Betele. Mu 2014 a atumine gu Warwick hagula phangi Winder wajiya gukuatesa gu midimo ya gutunga jinzo jia biro diakoma dia Matemue a Yehowa. Gungima ayile gu centre d’enseignement des Témoins de Jéhovah ya gu Patterson mu 2016, phangi Winder wakhalele mutshita gu service audio/​vidéo. Gungima dia ivo nguana, avutugile gu Warwick, phangi Winder wasendesele gukalagala mudimo gu biro ya Comité pour le personnel. Mu Mars 2022, wabuile mukuateshi gu Comité pour le personnel ya Hunji dia Akulu Atuameji.

Tudi mukombelela Yehowa egi alandule gukuatesa aphangi awa hagula ajiya gulandula gudihana muavula mu midimo ya Ufumu.​—Ef. 4:8.