Luholo Wajiya Gukhala Futa Wabonga
WAVILE gale gikenene handaga udi nu mulonga udi gugusagesa uvi ushigo nu muthu wa gugukuatesa ba? Tudi mujinga mu “matangua a lamba” ajiya gutulebesa muila nu gutangiza egi tushigo nu muthu wa guwambela ndaga tudi mutagana najio. (2 Tim. 3:1) Uvi gula tudi mutagana nu malamba, gudi nu athu ajiya gutukuatesa. Biblia yana monesa egi idi nu ndando ha gukhala nu mafuta abonga ‘mu matangua a lamba.’—Ish. 17:17.
LUHOLO MAFUTA ABONGA AJIYA GUGUKUATESA
Tangua atunyishile Phaula ha guzoga gu inzo, mafuta enji amukuatesele ha gulandula guhana mahungu gikhesa
Mupostolo phaula watshitshile vuayaje mu mudimo wenji wa gimisionere nu mafuta enji ako, mafuta ene amukuatesele muavula. (Kol. 4:7-11) Tangua Phaula wakhalele mu bologo gu Roma, mafuta enji amukuatesele ha gutshita midimo inyi muene gakhalelego nu luholo lua gutshita. Ha gufezegesa, Ephafelodite wahanele Phaula ima aphangi a gu Filiphi amutumidile. (Fili. 4:18) Tishike wayile nu guhana mikanda inyi Phaula wasonegele mu mahungu a gudisha. (Kol. 4:7) Luholo mafuta enji amukuatesele ya muhanele gikhesa ha gulandula gukuatesa mahungu, ikhale tangua amutunyishile ha guzoga mu inzo yenji nu tangua amumbile mu bologo. Luholo lutshi aye nji wajiya gukhala futa wabonga mangino?
Mangino gudi nji nu aphangi a mala nu a akhetu ana monesa ndaga mafuta ajiya gutshita ha gudikuatesa. Tutadilenu gifezegeselo gia phangi wa mukhetu wakuatesele futa dienji Elisabet udi muvundji wa njila gu Espagne. Tangua minganga yazuelele egi mama wa Elisabet udi mutshigina gufua gu misongo ya cancer, futa dienji muene wakhalele gumusonegela verse jia Biblia mu mikanda ha gumuhana gikhesa. Phangi Elisabet udi muzuela egi: “Mikanda yene yakhalele gunguhana gikhesa lusugu nu lusugu nu yakhalele gungukuatesa ha gutuna gudivua hakhami.”—Ish. 18:24.
Tuajiya gukolesa ufuta wetu nu aphangi’etu Aklisto, gula tudi muya nawo mu mudimo wa gulongesa nga mu gudibungisa gua mu hungu. Ha gufezegesa, wajiya guya mu gudibungisa nga mu mudimo wa gulongesa nu phangi wa yala nga wa mukhetu wa gukola ba? Gula watshita ngenyi, mbawahana gikhesa ene nji mbaaguhana gikhesa. (Roma 1:12) Uvi luholo lutshi tuajiya gukhala mafuta abonga gudi aphangi anyi anago gukhala nu luholo lua guzoga mu jinzo jiawo?
KUATESA APHANGI ANYI ANAGO GUKHALA NU LUHOLO LUA GUWENDA
Aphangi ako anago guya luko mu gudibungisa gu Inzo ya Ufumu mukunda nu misongo nga malamba ako. Tutadilenu gifezegeselo gia David, minganga yamuwambelele egi udi nu misonga ya cancer yana tamegewa egi lymphome. Akhalele gumusaga misongo yene mbeji 6. Ikhale phangi David wakhalele musagewa, uvi wakhalele mulandula gudibungisa gua mu hungu nu mukaji’enji mu njila ya vidéo conférence.
Luholo lutshi mafuta awo a mu hungu akhalele guakuatesa? Gungima dia gudibungisa, aphangi avula akhalele muya mu Inzo ya Ufumu, akhalele mutshita yagasue ha guta maga nu phangi David nu mukaji’enji Lidia mu njila ya vidéoconférence. Tangua akhalele muhana ba komantere, aphangi akhalele guasonegela ba mesaje ha guahana mersi. Gubonga gutshi ahetele? Phangi David nu Lidia akhalelego gudivua hakhawo.
Khala mulongesa nu aphangi a mala nu a akhetu anyi ashigo nu luholo lua guzoga gu jinzo jiawo
Itshi tuajiya guzuela mukunda nu aphangi anyi ana khalago luko nu luholo lua guzoga ha guya mu mudimo wa gulongesa? Tuajiya gusombegesa programe yetu ha gulongesa nawo hamoshi, gutshita ngenyi mbagumonesa egi tuabuitshilego mutshima. (Ish. 3:27) Muajiya gusonega nawo mikanda nga gulongesa nawo gu telefone. Akulu ajiya gulondega ndaga hagula aphangi ene alandule gudibungisa mukunda nu mudimo wa gulongesa mu njila ya vidéoconférence. Phangi David nu Lidia asuangulugile luholo aphangi a mu hungu diawo atshitshile ngenyi. Phangi David wazuelele egi: “Gudibungisa hamoshi nu aphangi a mu hunji dia mudimo wa gulongesa nu gutshita nawo gisambu, yana gutuhana gikhesa.” Gula luholo ludi guene, wajiya gubata muthu wana gulongesa Biblia gumbo dia phangi muene hagula mulonguge nenji.
Gula tudi mukalagala mudimo nu aphangi anyi ashigo nu luholo lua guzoga gu jinzo jiawo nu tudi mutala makalegelo awo abonga, mbayitukuatesa ha gukolesa ufuta wetu nawo. Ha gufezegesa, gula wamona luholo adi mukalegela Mbimbi ya Nzambi ha gukuata mutshima wa muthu, mbayigutuma ha guazumba luko muavula. Wajiya gukuata mafuta ahe-ahe gula udi mukuatesa aphangi a mala nu a akhetu ha guya nawo mu gudibungisa gua mu hungu nga mu mudimo wa gulongesa.—2 Kol. 6:13.
Tangua Phaula wakhalele mutagana nu malamba, futa dienji Tito wayile gumutala nu wamukuatesele ha guheta gikhesa. (2 Kol. 7:5-7) Idi ndaga yabonga ha guhana aphangi a mala nu a akhetu gikhesa mu mbimbi jietu, uvi gifezegeselo gia Tito gidi gutulongesa egi tuajiya nji guhana aphangi gikhesa gula tudi mubalegesa nawo tangua nu gukalagala yagasue ha guakuatesa.—1 Yone 3:18.
KHALA MUKUATESA MAFUTA AYE TANGUA ADI MUTAGANA NU USAGESHI
Aphangi etu a mala nu a akhetu a gu Russie adi gifezegeselo giabonga mu ndaga yatadila gukuatesa athu ako. Tuzuelelenu gifezegeselo gia phangi Sergey nu mukaji’enji Tatyana. Maphulushi akhalele guakamba mu inzo, gungima a akuatele ha guahula mihu. Abembele phangi Tatyana ha guvutuga gu inzo. Phangi Sergey wazuelele egi: “Matangua azonda gungima dia guheta gua Tatyana gu inzo, phangi mumoshi wa mukhetu wajile gumutala. Gungima, aphangi avula a mala nu a akhetu ajile gutukuatesa ha gulondega inzo.”
Phangi Sergey udi muzuela luko egi: “Ngana tshigina muavula mukanda wa Ishima 17:17 wana zuela egi: ‘Futa wabonga wana zumba tangua diagasue, udi phangi wavualewe mukunda nu matangua a lamba.’ Mu tangua diene dia usageshi, ngakhalele diago nu funu ya ukuateshi wa mafuta ami, hene ngakotelesele egi mbimbi jia Ishima 17:17 jidi diago jia giamatshidia. Yehowa wakalegele mafuta ami ha gungukuatesa nu gunguhana gikhesa.”
Tuana khala nu funu ya ukuateshi wa mafuta tangua tuana tagana nu ndaga jia lamba. Mbatukhala nji nu funu ya mafuta muavula mu tangua dia lamba diakola. Hene tutshitenu yagasue ha gukhala mafuta abonga sendese mangino!—1 Phet. 4:7, 8.