Ngimbo jia Ufumu Jiana Guhana Gikhesa

Pholo nu Silase atumbuishile Nzambi nu jingimbo tangua akhalele mu bologo. (Makal 16:25) Mu masugu etu, aphangi a Aklisto akhalele muyimba ngimbo jia Ufumu tangua akhalele mu bologo (camp de concentration) gu Sachsenhausen, mu gifutshi gia Allemagne nu tangua akhalele gu Sibérie. Ifezegeselo eyi idi mumonesa luholo ngimbo jidi nu ngolo jia guhana Aklisto gikhesa tangua adi mutagana nu malamba.

Gualeha ndo, mukanda wa ngimbo uhe-uhe mbawuzoga mu mazuelelo avula; mbawutamegewa egi Tuyimbilenu Yehowa nu ‘Gusuanguluga Guagasue’. Tangua mbatuheta mukanda wetu wa ngimbo, mbatukalagala ngolo ha gujiyimba muavula mu gukombelela guetu gua mu fami ha gula tukuate mbimbi jia ngimbo jiene mu muto. (Ef 5:19) Ngenyi, nyuma ya Nzambi mbayitukuatesa ha guwunguluga ngimbo jiene tangua tudi mutagana nu malamba. Ngimbo jia Ufumu jiajiya gutukuatesa ha guhaga mutshima muavula mu felela dietu. Jiajiya gutuhana ngolo tangua tudi mutagana nu malamba. Luko, tangua tudi gudivua muabonga, mbimbi jiabonga jiajiya gututuma ha ‘guyimba nu gusuanguluga guagasue’ mukunda nu mutshima wetu wabonga. (1Gudi 15:16; Ngi 33:1-3) Tukalegelenu muabonga diago ngimbo jietu jia Ufumu!

TALENU VIDEO IDI NU MUTO WA LUMENE EGI UN CANTIQUE INSPIRÉ PAR DES PRISONNIERS. GUNGIMA, HANENU MVUTU GU MIHU EYI:

• Ndaga jitshi jiatumine phangi Frost ha gusonega lungimbo elu?

• Luholo lutshi lungimbo elu luahanele aphangi gikhesa tangua akhalele mu bologo dia Sachsenhausen?

• Mu ndaga jitshi jia masugu agasue ngimbo jia Ufumu jiajiya guguhana gikhesa?

• Ngimbo jitshi jia Ufumu mbawutshigina gukuata mu muto?