Landulenu Guwenda mu Gutshigina

1. Mukunda natshi Phaula wakhalele musuanguluga tangua diakhalele muene mutangiza ndaga jia monyo wenji?

MUPOSTOLO Phaula wakhalele mujiya egi gualeha ndo udi naye gushiyiwa, uvi wakhalele nu ndaga jiavula jiakhalele gumusuanguluisa. Wazuelele egi: “Ngazudi phushi uu nu gu gisugishilo, ngabambi gutshigina guami.” (2 Tim. 4:6-8) Phaula wazudile desizio dia ndando dia gukalegela Yehowa mu monyo wenji, wakhalele nji musha mutshima egi Yehowa wakhalele musuanguluga n’enji. Esue nji tuana tshigina guzula badesizio abonga nu tuana tshigina egi Yehowa asuanguluge nu esue. Itshi tuajiya gutshita hagula Yehowa asuanguluge nu esue?

2. Guwenda mu gutshigina gudi mukotelesa itshi?

² Phaula wazuelele mukunda nu muene hakhenji nu Aklisto ako akhalele nu gutshigina egi: “Tudi muwenda mu gutshigina, uvi tushigo muwenda mu ima tudi mumona.” (2 Kol. 5:7) Itshi gatshiginyile guzuela diago? Mu Biblia mbimbi, “guwenda” matangua ako yana monesa luholo muthu udi mutuameza monyo wenji. Gula muthu udi muwenda mu ima idi mumona muene, wana zula badesizio phamba mu ndaga jidi mumona meso enji, jidi muvua matshui enji nu mu luholo ludi gudivua muene. Uvi gula muthu udi muwenda mu gutshigina, wana zula badesizio adi gudivua nu gutshigina gua Yehowa. Ndaga jiana tshita muene jiana monesa egi Nzambi mbawumushimbiga nu mbawuheta nji gubonga gula udi mutumagela malongo adi mu Mbimbi yenji.​—Ngi. 119:66; Heb. 11:6.

3. Gubonga gutshi mbatuheta gula tudi muwenda mu gutshigina? (2 Kolinto 4:18)

³ Idi yadiago egi matangua ako mukut’etu agasue tuana zula badesizio mu ndaga tudi mumona, tudi muvua nu luholo tudi gudivua. Uvi gula tudi muzula badesizio phamba mu ndaga tudi mumona nga mu ndaga tudi muvua yajiya gutubatela malamba. Mukunda natshi? Handaga ndaga tuana mona nu jinyi tuana vua jianago gukhala tangua diagasue jia giamatshidia. Gula tudi mutshita ngenyi matangua ako tuajiya gukalagala ndaga jiabola gu meso a Yehowa. (Mulo. 11:9; Mat. 24:37-39) Uvi gula tudi muwenda mu gutshigina, mbatuzula badesizio adi “musuanguluisa Fumu.” (Ef. 5:10) Gutumagela malongo a Nzambi mbagutukuatesa ha gukhala mu guhuima gua giamatshidia nu gusuanguluga. (Ngi. 16:8, 9; Yesh. 48:17, 18) Gula tudi mulandula guwenda mu gutshigina, mbatuheta monyo wa ivo nu ivo.​—Tanga 2 Kolinto 4:18.

4. Luholo lutshi muthu wajiya gujiya gula udi muwenda mu gutshigina nga mu ndaga jidi mumona muene nu meso?

⁴ Mukut’etu agasue tudi naye gudihula mihu eyi: Mu ndaga jitshi ngana sha mutshima tangua ngana zula badesizio? Ngana sha mutshima mu ndaga ngudi mumona ba? Nga ngana bemba egi malongo a Yehowa angutuameze? Mu longo edi tuza mumona luholo tuajiya gumonesa egi tuana landula gushila utuameji wa Yehowa mutshima mu ndaga eji thathu jia ndando: 1) tangua tudi mutomba mudimo, 2) tangua tudi mutshigina gutomba muthu wagudizula n’enji mu ulo nu 3) tangua tudi muheta malongo akatuga mu ulondegi wa Yehowa. Mu ndaga jiene jiagasue, tuza muzuelela ndaga tudi naye gutadila gutuama ha guzula badesizio abonga.

TANGUA TUDI MUTOMBA MUDIMO

5. Ndaga jitshi tudi naye gutangiza gula tudi mutshigina gutomba mudimo?

⁵ Mukut’etu agasue tuana tshigina gutagenesa nzala jietu nu jia enya fami yetu. (Mulo. 7:12; 1 Tim. 5:8) Midimo iko yana futa mbongo jiavula. Midimo iko yana kuatesa muthu ha gutagenesa nzala jia enya fami yenji nu ha gubamba ndambo ya mbongo mukunda nu masugu adi muza. Uvi iko yana kuatesa phamba ha gutagenesa nzala jietu gifua gusumba ima ya gudia, fundo dia gubanda nu milele. Hene gula tudi mutshigina gutomba mudimo umoshi, tudi naye gutangiza gula makuta guvula gutshi mbaakhala gutufuta. Uvi gula tudi mutangiza phamba guvula gua mbongo mbatukhala muheta, mbayimonesa egi tudi mu tuamezewa gu ndaga tudi mumona.

6. Luholo lutshi tuajiya guwenda mu gutshigina tangua tudi mutshigina gutomba mudimo? (Hebelu 13:5)

⁶ Gula tudi muwenda mu gutshigina, tudi naye gutangiza gula mudimo tudi mutshigina gutshita mbawutukuatesa ha gukolesa ufuta wetu nu Yehowa nga ndo. Tuajiya gudihula egi: ‘Mudimo wene udi gungutuma ha gukalagala ndaga Yehowa wana tuna ba?’ (Ish. 6:16-19) ‘Mbawungukanga njila ha guya mu gudibungisa, mu mudimo wa gulongesa, ha gutshita gulonguga guami hakhami nga gubalegesa tangua nu enya fami yami ba?’ (Fili. 1:10) Gula idi ngenyi, yajiya gukhala ndaga yabonga ha gutuna gutshigina mudimo wa luholo elu ngatshima guheta mudimo gudi lamba. Luholo tuana wenda mu gutshigina, tuana zula badesizio adi mumonesa egi tudi nu gutshigina egi Yehowa mbawutagenesa nzala jietu.​—Mat. 6:33; tanga Hebelu 13:5.

7-8. Luholo lutshi phangi Javier wawendele mu gutshigina? (Tala nji gifuanesa.)

⁷ Phangi Javiera wana khala gu Amérique du Sud wakotelesele egi guwenda mu gutshigina gudi nu ndando. Wazuelele egi: “Ngakhalele mukamba mudimo wabonga unu akhalele naye gungufuta makuta avula gubalega mudimo ngakhalele mutshita.” Uvi phangi Javier wakhalele mutshigina gubua muvundji wa njila. Udi muzuela luko egi: “Fumu mumoshi wa mudimo wangutamegele ha gunguhula mihu ha gujiya gula ajiya gunguzula gu mudimo. Gutuama egi asendese gunguhula mihu, ngatogele Yehowa ha gungukuatesa, handaga Yehowa wana jiya ndaga yabonga mukunda nu ame. Ngakhalele mutshigina gukhala nu mudimo wabonga, uvi ngakhalelego mutshigina egi mudimo ngajiya guheta ungukange njila ha gutagenesa mafelela ami a mu nyuma.”

⁸ Phangi Javier udi muzuela egi: “Tangua tuakhalele muta n’enji maga, wanguwambelele egi mbangukhala mulezela matangua ako gu mudimo. Ngamuhanele mvutu nu gisemo giagasue egi ngajiyilego gutshita mudimo wene handaga ngana gudihana mu mudimo wa gulongesa.” Phangi Javier watunyile mudimo wene. Gungima dia phoso mbadi, wasendesele gutshita mudimo wa muvundji wa njila. Mu givo giene, wahetele mudimo wakhalele gumuzula matangua azonda. Udi muzuela egi: “Yehowa wavile isambu yami, wangukuatesele ha guheta mudimo wakhalele gunguhana njila ha gutagenesa mudimo wami wa muvundji wa njila. Ngudi nu gusuanguluga luholo ngahetele mudimo wangukuatesele ha gudihana muavula mu mudimo wa Yehowa nu gukuatesa aphangi.”

9. Longo ditshi wazula mu lumene lua phangi Trésor?

⁹ Itshi tuajiya gutshita gula tuakotelesa egi mudimo tudi mukalagala ushigo gutuhana njila ha gutshita ndaga jia mu nyuma? Tutadilenu gifezegeselo gia phangi Trésor wana khala gu République du Congo (Congo-Brazzaville). Udi muzuela egi: “Ngakhalele muzumba mudimo wami uhe-uhe muavula diago. Akhalele gungufuta makuta avula gubalega makuta anyi akhalele gungufuta gu mudimo wami wa thomo, athu akhalele nji gungunemesa mukunda nu mudimo wene.” Mudimo wene wakhalele gumuzula matangua avula, hene gakhalelego muya luko mu gudibungisa phoso nu phoso. Athu ako akhalele mutshita nawo mudimo akhalele gumutuma ha gumba mambo. Phangi Trésor wakhalele mutshigina gubemba mudimo wene, uvi wakhalele gudisagesa handaga gakhalelego nu mudimo uko. Itshi yamukuatesele? Udi muzuela egi: “Mukanda wa Habakuka 3:17-19 wangukuatesele ha gujiya egi Yehowa mbawungukuatesa ikhale mudimo wangufua, hene ngabembele mudimo wene.” Udi muzuela luko egi: “Mafumu a midimo avula ana tangiza egi gula muthu waheta mudimo wabonga, wajiya genji gubemba ima yagasue gifua enya fami nu ndaga jia mu nyuma. Ngudi nu gusuanguluga guavula luholo ngabambele ufuta wabonga nu Yehowa nu enya fami yami. Gungima dia givo gimoshi, Yehowa wangukuatesele ha guheta mudimo wabonga wakhalele gungukuatesa ha gutagenesa nzala jia enya fami yami nu gudihana muavula mu ndaga jia mu nyuma. Gula tuasha Yehowa ha fundo dia thomo mu monyo wetu, matangua ako tuajiya gutagana nu lamba dia mbongo, uvi Yehowa mbawulandula gutukuatesa.” Idi yadiago egi gula tuatumagela malongo a Yehowa nu tuasha mutshima mu ndaga jiana laya muene, mbatulandula guwenda mu gutshigina, muene nji mbawutushimbiga.

TANGUA UDI MUTSHIGINA GUTOMBA MUTHU WAGUDIZULA N’ENJI MU ULO

10. a) Itshi udi naye gujiya tangua udi mukamba muthu wa gudizula n’enji mu ulo? b) Mukunda natshi ushigo naye gutadila phamba ndaga jiene?

¹⁰ Ulo udi khapho diana katuga gudi Yehowa, hene ishigo ndaga yabola gula muthu udi mutshigina guzula yala nga mukhetu mu ulo. Tangua phangi wa mukhetu udi mukamba yala wa gudizula n’enji mu ulo, udi naye gukamba gujiya makalegelo enji, gujiya gula udi yala wabonga mukunda nu muene, luholo athu ana gumutadila, luholo luana kalegela muene makuta, inemo ana khala nayo mu fami yawo nu gujiya gula yala muene udi gumusuanguluisa.b Idi nu ndando ha gutadila ndaga eji. Uvi gula phangi wa mukhetu udi mutadila phamba ndaga eji, yajiya gumonesa egi udi muwenda mu ndaga jidi mumona muene.

11. Luholo lutshi tuajiya guwenda mu gutshigina tangua tudi mukamba muthu wa gudizula n’enji mu ulo? (1 Kolinto 7:39)

¹¹ Yehowa wana suanguluga tangua diana mona muene aphangi a mala nu a akhetu mukalegela malongo enji tangua adi mukamba muthu wa gudizula n’enji mu ulo! Ha gufezegesa, ana kalegela malongo a Biblia nu ana nengena uu nu tangua mbaabalegesa “sungi ya ulenge” gutuama egi akambe muthu wa gudizula n’enji mu ulo. (1 Kol. 7:36) Ana kamba gujiya gula yala nga mukhetu muene udi nu makalegelo ana suanguluisa Yehowa. (Ish. 31:10-13, 26-28; Ef. 5:33; 1 Tim. 5:8) Gula muthu mumoshi gashigo Temue wa Yehowa wasendesa guzumba phangi mumoshi, phangi muene udi naye gukalegela longo didi mu 1 Kolinto 7:39 (Tanga) diana zuela egi udi naye gudizula mu ulo ‘phamba nu muthu udi mulandudi wa Fumu.’ Aphangi ana landula guwenda mu gutshigina handaga ana gusha mutshima egi Yehowa mbawakuatesa ha gutagenesa nzala jiawo.​—Ngi. 55:22.

12. Longo ditshi wazula mu gifezegeselo gia phangi Rosa?

¹² Tutadilenu gifezegeselo gia phangi Rosa udi muvundji wa njila gu Colombie. Wakhalele mukalagala mudimo fundo dimoshi nu yala mumoshi munu gakhalelego Temue wa Yehowa, yala muene wasendesele gumuzumba. Phangi Rosa wakhalele musuanguluga nu yala muene moshi’a mutshima. Udi muzuela egi: “Yala muene wakhalele mumonega gifua wakhalele nu makalegelo abonga. Wakhalele mukuatesa athu nu wakhalele mumonega gifua udi yala wabonga. Wakhalele nji gungumonesela gisemo. Wakhalele nu makalegelo abonga ngakhalele mutshigina egi muthu ngudi naye gudizula nenji mu ulo udi naye gukhala nawo, uvi gakhalelego Temue wa Yehowa.” Phangi Rosa udi muzuela luko egi: “Yakhalele lamba ha gumutuna handaga ame nji ngakhalele gumuzumba. Mu tangua diene ngakhalele gudisagesa handaga ngakhalele nu funu ya guzudiwa mu ulo, uvi yakhalele lamba ha guheta yala mu ulondegi wa Yehowa.” Phangi Rosa gakhalelego mutala phamba ndaga jiakhalele mumona muene. Watangijile luholo desizio diene diajiya gubolesa ufuta wenji nu Yehowa. Gakhalelego luko mubalegesa tangua nu yala muene nu walanduile gudihana muavula mu mudimo wa Yehowa. Masugu azonda gungima, watamegewe gu Khalasa dia Alongeshi a Ufumu, henyaha udi pionye spesiale. Udi muzuela egi: “Yehowa wanguhanele ishimbigo yavula yana gungusuanguluisa.” Gula tuakudisa gale nzala ya gutshita ndaga imoshi ngenyi, yana khalago yaleba ha gutshita ndaga jiana suanguluisa Yehowa, uvi gula tuabemba egi muene atutuameze mbatuheta gubonga guavula.

TANGUA TUAHETA MALONGO AKATUGA MU ULONDEGI WA YEHOWA

13. Itshi tuajiya gutshita gula tuaheta malongo akatuga mu ulondegi wa Yehowa?

¹³ Ulondegi wa Yehowa wana gutuhana malongo mu njila ya akulu, atadi awendi, Betele nu mu njila ya Hunji dia Akulu Atuameji. Malongo ene ana gutukuatesa ha gukombelela Yehowa muabonga. Uvi matangua ako tuanago gukotelesa mukunda natshi aphangi atuhanyi longo dimoshi ngenyi. Hene tuajiya gusendesa gutangiza egi utuameji wene ushigo wabonga. Ndaga yene yajiya gututuma ha gutala phamba ndaga jiana jimbila aphangi adi gututuameza.

14. Itshi yajiya gutukuatesa ha gutumagela utuameji udi mukatuga mu ulondegi wa Yehowa? (Hebelu 13:17)

¹⁴ Tangua tuana wenda mu gutshigina, tuana sha mutshima egi Yehowa wana tuameza ulondegi wenji nu wana jiya ndaga tudi mutagana najio. Ndaga yene yana gututuma ha gutumagela utuameji wenji nu mutshima umoshi. (Tanga Hebelu 13:17.) Tuana jiya muabonga egi gula tudi mutumagela Yehowa, mbatukhala mu gudivua guabonga nu aphangi mu hungu. (Ef. 4:2, 3) Tudi nji mujiya muabonga egi aphangi ana gututuameza ashigo athu atagana. Uvi gula tudi guatumagela, Yehowa mbawutushimbiga. (1 Sam. 15:22) Gula idi mutoga egi ndaga imoshi isombegesewe mu ulondegi wa Yehowa, muene mbawuyikalagala mu tangua diabonga.​—Mika 7:7.

15-16. Itshi yakuatesele phangi mumoshi ha gutumagela utuameji ahetele ikhale yakhalele lamba? (Tala nji gifuanesa.)

¹⁵ Tutadilenu gifezegeselo gidi mumonesa gubonga tuajiya guheta gula tudi mutumagela utuameji udi mukatuga mu ulondegi wa Yehowa. Mu gifutshi gia Pérou, ana zuela espagnole, uvi athu avula ana zuela mazuelelo ako a mu gifutshi giene gifua Quechua. Ivo yavula yabalega gale, aphangi ana zuela zuelelo dia Quechua akhalele mukamba athu ana zuela zuelelo diene mu terituare yawo. Uvi ha gudivua nu mikhuala ya mafumu a leta, tuasombegesele bametode a gukamba athu ana zuela zuelelo diene. (Roma 13:1) Ndaga yene yatumine aphangi ako ha gutangiza egi mbayikhala lamba ha guheta athu mu terituare. Uvi tangua aphangi atumagele utuameji wene, Yehowa waashimbigile nu ahetele athu avula akhalele muzuela zuelelo diene.

¹⁶ Phangi Kevin udi mukulu mu hungu dia zuelelo dia Quechua wakhalele nji gudisagesa. Udi muzuela egi: “Ngakhalele gudihula egi ‘Luholo lutshi mbatuheta athu adi muzuela zuelelo dia Quechua?’” Itshi phangi Kevin wakalegele? Udi muzuela egi: “Ngatangijile mukanda wa Ishima 3:5 nu lumene lua Moize. Yehowa wamutogele ha gutshita ndaga imoshi yakhalele mumonega gifua idi ya lamba, wamuwambelele ha gutuameza enya Isalele ha guzoga mu uhiga gu Ejipitu nu guatuameza gu khanda ya Kianga gia Benga. Yakhalele mumonega gifua enya Ejipitu akhalele gualandula adi guakuata. Uvi tangua Moize watumagele, Yehowa wamukuatesele ha gutshita ndaga imoshi ya gushimana.” (Guz. 14:1, 2, 9-11, 21, 22) Phangi Kevin wakhalele hehi ha gusombegesa luholo luenji lua gulongesa. Gubonga gutshi ahetele? Udi muzuela egi: “Ngadihudile muavula luholo Yehowa watukuatesele. Thomo tuakhalele mubalegesa matangua avula ha gukamba athu ana zuela Quechua, uvi tuakhalele muheta muthu mumoshi nga muyadi ana zuela zuelelo diene. Uvi henyaha tuanaya phamba mu mafundo anyi athu avula ana zuela phamba zuelelo dia Quechua. Ndaga ya gusuanguluga idi egi henyaha tudi nu athu avula aguta nawo maga, a guvutugila nu alongugi a Biblia. Athu avula nji anaza mu gudibungisa.” Yadiago Yehowa mbawutushimbiga gula tudi muwenda mu gutshigina.

17. Itshi tualonguga mu longo edi?

¹⁷ Mu longo edi, tuazuelela maluholo thathu tuajiya guwenda mu gutshigina. Uvi tuajiya nji gumonesa egi tudi muwenda mu gutshigina tangua tudi mutomba saga jiagubalegesela tangua, badesizio tudi muzula atadila makhalasa nu luholo lua gusasa ana. Gula tudi mutshigina guzula desizio dimoshi ngenyi, tushigo naye gutadila phamba ndaga tudi mumona uvi tudi naye nji gutadila ufuta wetu nu Yehowa, malongo enji nu gusha mutshima egi muene mbawutagenesa nzala jietu. Gula tuatshita ngenyi, “mbatuwenda mu jina dia Yehowa Nzambi wetu ivo nu ivo.”​—Mika 4:5.