Khala Muzula Badesizio adi Musuanguluisa Yehowa

1. Ndaga itshi ya lamba mukut’etu agasue tuana tagana nayo?

LUSUGU nu lusugu tuana zula badesizio. Badesizio gifua atadila ima ya gudia nga tangua dia gubanda, akhalago akola ha guzula. Uvi yakhala lamba ha guzula badesizio ako, handaga badesizio ene ajiya gutadila sante yetu, gusuanguluga guetu, fami yetu nga gikombelelo gietu. Tuana tshigina egi badesizio ene atubatele gubonga nu enya fami yetu. Uvi ndaga yabalega ndando idi egi, badesizio ene adi naye gusuanguluisa Yehowa.​—Roma 12:1, 2.

2. Itshi wajiya gutshita ha guzula badesizio abonga?

² Wajiya guzula badesizio abonga gula 1) udi mukamba gujiya ndaga muabonga, 2) udi mukamba gujiya matangi a Yehowa mu ndaga yene nu 3) udi mutangigiza muabonga. Mu longo edi tuza muzuelela ndaga eji thathu, ndaga jiene jiza gutukuatesa ha gujiya luholo tuajiya gukalegela ndunge jietu ha guzula badesizio abonga.​—Ish. 2:11.

KAMBA GUJIYA NDAGA MUABONGA

3. Hana gifezegeselo gidi mumonesa mukunda natshi idi ndando ha gukamba gujiya ndaga muabonga gutuama dia guzula desizio.

³ Ndaga ya thomo udi naye gutshita ha guzula badesizio abonga idi gukamba gujiya ndaga muabonga. Mukunda natshi idi nu ndando? Tangiza gale egi muthu mumoshi udi mukata misongo yakola waya mumona munganga hagula amusage. Udi mutangiza egi, munganga muene wajiya gumuhana ihemba gula khenji gamutshita ndo examen nga gumuhula mihu ha gujiya gula itshi idi gumusagesa? Ndo sha. Gula aye nji udi mutangigiza thomo muabonga nu gukamba gujiya ndaga jidi gudivua nu mulonga waye, mbayigukuatesa ha guzula badesizio abonga gifua munganga watema wana diangela guhula mihu gudi mukhashi. Luholo lutshi wajiya guyitshita?

4. Ha gutadila Ishima 18:13, itshi yajiya gugukuatesa ha gujiya ndaga muabonga? (Tala nji gifuanesa.)

⁴ Wajiya gujiya ndaga muabonga gula udi nu khadilo dia guhula mihu. Ha gufezegesa, tangiza gale egi agutamega ha guya gu wano umoshi mbawubungisa athu avula. Itshi yajiya gugukuatesa ha guya ha fundo diene? Gula ushigo mujiya muthu udi mutshitshisa wano wene nga ndaga mbajikalegewa ha fundo diene, wajiya gudihula mihu gifua: “Fundo ditshi nu tangua ditshi wano wene mbawukalegewa? Athu guvula gutshi mbaakhala guene? Nanyi mbawutuameza wano wene? Akhuatshi mbaakhala gu wano wene? Ndaga jitshi mbajikalegewa guene? Matombe akola mbaakhala guene ba?” Gula waheta mvutu jiabonga jia mihu eyi mbayigukuatesa ha guzula badesizio abonga.​—Tanga Ishima 18:13.

5. Itshi udi naye gutshita gula wajiya ndaga jiagasue?

⁵ Gula waheta gale ndaga wakhadi mukamba, ndaga ya mbadi yagutshita idi gutangiza muabonga gu mulonga wene ha guzula desizio diabonga. Ha gufezegesa, itshi wajiya gutshita gula aguwambela egi athu anago gutumagela mikhuala ya Yehowa mbaakhala nji gu wano wene? Nga ndo itshi wajiya gutshita gula wavua egi matombe akola mbaakhala guene uvi mbagushigo mukhala nu muthu wagutuameza ndaga jiene? Mihu eyi tuazuelela yagukuatesa ha gukotelesa egi wano wene mbawushigo mukhala wabonga ba? (1 Phet. 4:3) Nga ndo itshi udi naye gutshita gula wakotelesa egi wano wene mbawugukanga njila ha gutuna guya mu gudibungisa gua mu hungu nga mu mudimo wa gulongesa? Gula wakotelesa muabonga ndaga jiagasue mbajibalega gu wano wene mbayigukuatesa ha guzula desizio diabonga. Uvi gudi nu ndaga jiko udi naye gutshita. Henyaha wakotelesa muabonga mulonga wene, uvi dihule egi: Luholo lutshi Yehowa udi gudivua mukunda nu ndaga yene?​—Ish. 2:6.

KAMBA GUJIYA MATANGI A YEHOWA

6. Ha gutadila Yakoba 1:5, mukunda natshi tudi naye gutoga Yehowa ha gutukuatesa?

⁶ Toga Yehowa ha gugukuatesa ha gukotelesa matangi enji mukunda nu ndaga yene. Yehowa watulayele egi mbawutuhana ndunge ha gukotelesa gula badesizio etu mbaamusuanguluisa nga ndo. Wana hana ndunge jiene gudi ‘athu agasue ana gumutoga najio, uvi ganago guabalela.’​—Tanga Yakoba 1:5.

7. Luholo lutshi tuajiya gujiya matangi a Yehowa mu ndaga imoshi ngenyi? Hana gifezegeselo.

⁷ Gula watoga Yehowa ha gugukuatesa, tshita ngolo ha gukotelesa mvutu yenji gu gisambu giaye. Ha gufezegesa, gula ushigo mujiya fundo udi muya, wajiya guhula athu ana jinga ha fundo diene ha gugukuatesa. Uvi udi naye guya gualeha gutuama egi muthu muene aguhane mvutu ba? Ndo sha. Udi naye gutegelela muabonga ndaga jidi guguwambela muthu muene. Luholo lumoshi nji gula watoga Yehowa ndunge mu gisambu, kamba mvutu yenji mu mikhuala nu malongo adi gudivua nu ndaga idi gugusagesa. Ha gufezegesa, gula udi mutshigina guzula desizio dia guya gu wano tuazuelela guthunda, wajiya gutadila malongo a Biblia ana zuelela mawano abola nu mafuta abola. Wajiya nji gutadila mukunda natshi idi nu ndando ha gusha ufuta waye nu Nzambi ha fundo dia thomo.​—Mat. 6:33; Roma 13:13; 1 Kol. 15:33.

8. Itshi yajiya gugukuatesa ha guheta mene udi najio funu? (Tala nji gifuanesa.)

⁸ Uvi matangua ako yajiya gutoga matangua avula ha guheta ndaga udi najio funu. Phangi mumoshi wa yala nga wa mukhetu udi nu eksperianse wajiya guguhana malongo. Uvi aye hakhaye wajiya guheta gubonga guavula gula watshita ba recherche mu mikanda yetu gifua, mu Guide de recherche pour les Témoins de Jéhovah nu mu mukanda Mbimbi ya Nzambi Yajiya Gugukuatesa ha guheta mene jiavula. Ujimbilago egi felela diaye didi diaguzula desizio diabonga dinyi mbadisuanguluisa Yehowa.

9. Itshi yajiya gutukuatesa ha gujiya gula desizio dietu mbadisuanguluisa Yehowa? (Efeso 5:17)

⁹ Itshi yajiya gutukuatesa ha gujiya gula desizio dietu mbadisuanguluisa Yehowa? Ndaga ya thomo idi egi tudi naye gulonguga ha gumujiya muabonga. Biblia idi muzuela egi: “Gula wajiya Nzambi wa Gijila mbawukhala nu jindunge.” (Ish. 9:10) Yadiago, tuana heta ujiyi wa giamatshidia gula tuajiya makalegelo a Yehowa, felela dienji, ndaga jiana tshigina muene nu jinyi ganago gutshigina. Dihule egi: ‘Ha gutadila ndaga ngudi mujiya mukunda nu Yehowa, desizio ditshi ngudi naye guzula ha gumusuanguluisa?’​—Tanga Efeso 5:17.

10. Mukunda natshi malongo a Biblia adi nu ndando yavula gubalega kutime jia mu dimbo dietu?

¹⁰ Matangua ako ha gusuanguluisa Yehowa, yajiya gutoga guzula desizio dinyi dishigo musuanguluisa athu tuana jinga nawo hehi. Ha gufezegesa, mvuaji jiko jiajiya gushinjiga mun’awo wa mukhetu ha gudizula mu ulo nu yala munu udi nu umonyi wavula nga ndo yala munu mbawahana ima ya ulo yavula ngatshima yala muene gashigo nu ufuta wabonga nu Yehowa. Ishigo ndaga yabola gudi mvuaji jiene ha gudisagesa egi mun’awo akhale nu lujingu luabonga, uvi mona mukhetu muene udi naye gudihula egi: Yala ngudi muzumba mbawungukuatesa ha gukhala nu ufuta wabonga nu Yehowa ba? Luholo lutshi Yehowa udi mutadila ndaga yene? Mukanda wa Matayo 6:33 udi muhana mvutu gu muhu wene. Verse yene, idi mutoga Aklisto ‘ha gukamba thomo Ufumu wa Nzambi.’ Ngatshima tuana nemesa mvuaji jietu nu tuana kamba gukhala muabonga nu athu tuana jinga nawo, uvi ndaga ya balega ndando idi gutshita ndaga jidi musuanguluisa Yehowa.

TANGIGIZA MUABONGA

11. Ha gutadila mukanda wa Filiphi 1:9, 10 itshi yajiya gugukuatesa ha gutangiza muabonga?

¹¹ Gungima dia guheta malongo a Biblia adi gudivua nu desizio udi mutshigina guzula, zula tangua dia gutangigiza muabonga ndaga udi naye gutshita. (Tanga Filiphi 1:9, 10.) Ndunge mbajigukuatesa ha gutangiza muabonga gutuama gula badesizio ene mbaagubatela gubonga nga ndo. Matangua ako yana khala yaleba ha guzula badesizio. Uvi badesizio agasue ana khalago aleba. Ikhale watagana nu ndaga yakola, gutangiza muabonga mbagugukuatesa ha guzula badesizio abonga.

12-13. Luholo lutshi gutangiza muabonga mbagugukuatesa ha guzula desizio diabonga diatadila mudimo udi naye gutshita?

¹² Tangiza gale ndaga eyi. Udi mukamba mudimo ha gukuatesa fami yaye. Uvi waheta midimo mbadi. Watadila ndaga jiagasue jiatadila midimo yene gifua, guvula gua masugu nu matangua mbawukhala mubalegesa guene nu ndaga jiko. Gungima wakotelesa egi midimo yene yagasue mbadi ishigo yabola gudi Aklisto ha gutshita. Yajiya gukhala egi wasuanguluga muavula nu mudimo umoshi mukatshi dia midimo yene mbadi, handaga wana tshigina mudimo wene muavula, nga ndo handaga mbaagufuta mbongo jiavula. Uvi ujimbilago egi gudi nji nu ndaga jiko udi naye gutangiza gutuama dia guzula desizio.

¹³ Ha gufezegesa, mudimo wene mbawugukuatesa ha guya mu gudibungisa gua mu hungu phoso nu phoso ba? Mbawugukuatesa ha guheta tangua dia gukuatesa enya fami yaye ha gudivua mu ubambi nu gusuena hehi nu Yehowa ba? Gudihula mihu eyi mbagugukuatesa ha gusha “ndaga jiabalega ndando” ha fundo dia thomo, yakotelesa egi gukombelela Yehowa nu gutagenesa nzala jia enya fami yaye ha fundo dia gukamba mbongo jiavula-vula. Ngenyi wajiya guzula desizio mbadisuanguluisa Yehowa.

14. Luholo lutshi gutangiza muabonga nu guzumba guajiya gutukuatesa ha gutuna gukhakhuisa athu ako?

¹⁴ Gutangiza muabonga mbagutukuatesa ha guzula badesizio anyi ajiyilego ‘gubuisa athu ako mu gubola.’ (Fili. 1:10) Ndaga eyi idi nu ndando tangua tudi muzula badesizio atadila gusudiga nga gulondega muila. Ha gufezegesa, yajiya gukhale egi tuana tshigina gusudiga nga gulondega muila mu luholo lumoshi ngenyi. Uvi itshi tuajiya gutshita gula luholo luetu lua gusudiga nga lua gulondega muila ludi mukhakhuisa athu ako nga aphangi mu hungu? Gutangiza muabonga mbagutukuatesa ha gunemesa matangi awo. Guzumba mbagututuma ha gukamba “gubonga gua athu ako” nu gukhala nu khadilo dia gudibulumuisa. (1 Kol. 10:23, 24, 32; 1 Tim. 2:9, 10) Ngenyi mbatuzula desizio didi mumonesa egi tuana zumba nu tuana nemesa athu ako.

15. Ndaga Itshi udi naye gutshita gutuama dia guzula desizio dia ndando?

¹⁵ Gula udi mutshigina guzula desizio dimoshi dia ndando, tangiza ndaga udi naye gutshita ha gutagenesa desizio diene. Yesu watulongesele egi gutuama dia gutshita ndaga imoshi ngenyi, tudi naye thomo gutangiza guvula gua “falanga” idi naye guzula. (Luka 14:28) Hene gutuama dia guzula desizio dimoshi, tadila thomo guvula gua matangua, mbongo nu ndaga jinyi wajiya gutshita ha gutagenesa desizio diene. Matangua ako yajiya gutoga guta maga nu enya fami yaye ha gujiya ndaga muthu wagasue mukatshi diawo wajiya gutshita hagula utagenese desizio diaye. Mukunda natshi gutshita ngenyi gudi nu ndando? Handaga yajiya gugukuatesa ha gujiya gula desizio diene didi naye gusombegesewa nga gutshita ndaga iko. Gula wawambela enya fami yaye ndaga yene nu waategelela muabonga, ajiya gugukuatesa ha guzula desizio diabonga.​—Ish. 15:22.

ZULA DESIZIO MBADIGUBATELA GUBONGA

16. Ndaga jitshi mbajigukuatesa ha guzula desizio diabonga? (Tala nji galuanda, “Luholo Wajiya Guzula Badesizio Abonga.”)

¹⁶ Gula watshita ndaga eji jiagasue tuazuelela mu longo edi, mbawuzula desizio diabonga. Gula wamona egi ndaga jiagasue jidi jiabonga nu watadila malongo a Biblia adi muzuelela ndaga yene, mbawuzula desizio mbadisuanguluisa Yehowa. Gungima wajiya gutoga Yehowa ha gugukuatesa hagula desizio diaye dibinge.

17. Itshi yajiya gugukuatesa ha guzula badesizio abonga?

¹⁷ Ikhale wana zula gale badesizio abonga sendese mualeha, ujimbilago egi ndaga yabalega ndando udi naye gutshita idi gushila Yehowa mutshima uvi mu ndunge jiaye hakhaye ndo. Muene wajiya guguhana ujiyi wa giamatshidia, ukoteleshi wa ndaga nu gutangiza guabonga. Gutshita ngenyi guana monesa egi muthu udi nu ndunge jia guzula badesizio abonga (Ish. 2:1-5) Yehowa wajiya gugukuatesa ha guzula badesizio anyi mbaamusuanguluisa.​—Ngi. 23:2, 3.